Abdulhekimxan mexsumning hayati we küresh yoli (13)

Muxbirimiz qutlan
2018-07-31
Élxet
Pikir
Share
Print
Merhum abdulhekim mexsum hajim.
Merhum abdulhekim mexsum hajim.
RFA

13-Bölüm: istanbuldiki qara kün

2016-Yili 12-ayning 22-küni istanbuldiki Uyghur jama'iti üchün bir qara kün boldi. Abdulhekimxan mexsum hajimning tuyuqsiz wapat bolghanliq xewiri muhajirettiki minglighan qelblerni éghir musibetke chömdürdi. Aridin ikki yilgha yéqin waqit ötken bügünki künde merhumning a'ile tawabi'atliri we sepdashliri bu heqte eslime teqdim qilip, abdulhekimxan mexsum hajim wapat bolushning aldi-keynidiki ehwallar heqqide melumat berdi.

Bash shtabi istanbuldiki sherqiy türkistan ma'arip we hemkarliq jem'iyitining re'isi hidayetulla oghuzxan bu heqte toxtilip, merhum abdulhekimxan mexsumning wapatidin yillar ilgirila uning shexsiy bixeterlikige qarita tehdit we tehlikining shepiliri körülgenlikini tilgha aldi.

Merhum abdulhekimxan mexsumning ayali meryemgül xanimmu bu heqte söz échip, yoldishi wapat bolushtin bir yil ilgiri türkiye istixbarat organlirining uni shexsiy bixeterlik mesilisi boyiche diqqet qilishqa agahlandurghanliqini eskertip ötti.

Merhum abdulhekimxan mexsumning oghli abdusalam teklimakan dadisi taki tuyuqsiz wapat bolghan'gha qeder salametlikide héchqandaq bir mesile körülmigenlikini, hayatining axirqi deqiqilirigiche saghlam we normal yashighanliqini tekitlep ötidu.

Hidayetulla oghuzxan ependi merhum abdulhekimxan mexsum bilen bille mujadile élip barghan shunche yillar dawamida merhumda parche-purat héchqandaq késellikning körülüp baqmighanliqini, uning her waqit tétik, jushqun we ümidwar yashap kelgenlikini, shu wejidin tuyuqsiz kelgen bu qazaning hemme kishide bir xil endikish, silkinish we so'al peyda qilghanliqini ilgiri süridu.

Meryemgül xanim 2016-yili 12-ayning 21-küni, yeni charshenbe küni kechqurun yoldishi abdulhekimxan mexsumning ilgirikidekla normal haliti bilen öyge qaytip kelgenlikini, peqetla "Bir'az charchap qaldim" dégenlikini esleydu.

Abdusalam teklimakanmu shu küni kechqurun dadisining keypiyatida héchqandaq bir binormal ipadini bayqimighanliqini, peqet etisi seherde adettikidin bir sa'et kéchikip ornidin turghanliqini we "Aghzim qurup turidu" dégenlikini esleydu.

Meryemgül xanim 22-dékabir peyshenbe küni etigen sa'et 10:00 lar etrapida yoldishining mijezide tuyuqsiz özgirish bolup, safagha olturushup qalghanliqini, jiddiy qutquzush mashinisi yétip kélip merhumni öyidin doxturxanigha élip barghuche bolghan bir sa'ettin artuqraq waqit ichide yürikining sélishting sélishtin toxtighanliqini bayan qilidu.

Abdusalam teklimakan shu künidiki xatirisini eslep, özining jiddiy qutquzush mashinisigha doxturlar bilen bille chiqqanliqini, dadisining doxturxanigha élip kélin'gen waqitta yürikining alliqachan soqushtin toxtap bolghanliqini tilgha alidu.

Axirida hidayetulla oghuzxan ependi merhum abdulhekimxan mexsumning shu küni öyidin doxturxanigha élip bérilghuche bolghan bir sa'et ichide, hetta doxturxanidiki jiddiy qutquzushqimu ülgürelmey qaza qilishi "Bizge jawabsiz bir so'alni tashlap ketti," deydu.

(Dawami bar)

Toluq bet