Bext dégen néme?

Bext - sa'adet shundaq bir orun yaki sözlerde özini ashkara qiliduki, u bolsimu biz hayatqa ijabiyliq bilen, ishench we ümid bilen baqqinimizda, bext - sa'adetning ich - ichimizdin taralghanliqini hés qilimiz, goyaki ü bir toxtimaydighan bulaqtek, pütün bedinimizni ijabiy hayat bilen sughurup turidu.

Bext dégen zadi néme?

Bir qétimliq ammiwi ray sinashta, 16 mingdin artuq adem ishtirak qilghan bolup, “Bext dégen néme” dégen so'algha 36 pirsenti bext dégen muhebbet démektur dégen, 29 pirsenti hayatliqta razimenliktür dégen, 18 pirsenti ten - salametlik dégen, pirsenti toy qilip öy tutush dégen, pirsenti bolsa mal - dunya dégen, pirsenti baliliq dewri dégen, pirsenti bolsa seyle - sayahet qilish dégen.

Misirning dangliq mutepekkurliridin abbas el eqqad mundaq deydu: “Méning bir ressam dostum bolup, köp chaghlarda tesewwurgha tayinip resim sizatti, bir küni u bextni tesewwur qilip, 20 yashliq nazinin bir qizning resimini siziptu, u qiz nahayiti xushal körünetti, dostum ü resimni manga körsetti.

Men uninggha: “Lékin men bextni undaq tesewwur qilmaymen. Bu resiming belki xushalliq yaki huzurni ipadilep bérishi mumkin, lékin bext dégen bashqa nerse, bext dégen biz yashighan bir zaman yaki dewrdurki, üni teswirlimek tes. Bextte sükünat we temkinlik menisi bar bolup, ü hergizmu warang - churung yaki shawqun - süren emes, bext dégen wijdanda tépilidighan ichki héssiyattin ibaret, shunga uninggha mutleq bir chüshenche yaki éniqlima bergili bolmaydu,

Üni héchqandaq chüshenchige sighdurghili bolmaydu, belki bext aldimizda bolushi mumkin, lékin üni tonumighanliqtin qolimizdin kétishi mumkin, biz shu chaghda sap - saq, eqlimizge tolghan bolsaqmu üni sézelmeymiz, kichik balilardek ghemsiz, bexiraman bextlik hayatni téximu tapalmaymiz, ashu balilarmu kichik waqtidiki bextni sezmesliki mumkin, lékin chong bolup eqli tolghanda, dunyada bext dégen nersining barliqini angqirghanda, ashu bextni izdeshke bashlaydu, xuddi ü dunyada yoq, tépilghusiz nersidek”.

Eger bext mal - dunya bilen bolsa idi, dunyada hemmidin bankilar, taghlar, kanlar eng bextlik bolghan bolatti, eger bext güzellik bilenla bolsa idi, toz hemmidin bextlik bolghan idi, baharda échilghan gül - chéchekler hemmidin bextlik bolar idi,

Eger bext küch - quwwet, zorluq - zombuluq bilen bolsa idi, dunyada wehshiy yirtquchlar yaki insan qélipidin chiqqan wehshiy insanlar eng bextlik hésablinatti, eger bext exlaq bilen, hékmetlik sözler, yüz - abruy bilenla bolsa idi, dunyada insanlarla eng bextlik bolghan bolatti.

Démek, bext - sa'adet sebiy balining külkiside, rastchilliq bilen sözlen'gen yaxshi söz - nesihetlerde yaki yaratqan igisini yad étip éytqan durudlarda weyaki qérindashlirigha (ularni tonumisimu, körmigen bolsimu) köyünüp, ularni yad etken qelbte, ularning közidiki yashni sürteligende, millet, weten weyaki dini üchün arzu qilip kelgen tilekliri emelge ashqanda, qattiq qiyinchiliqtin kéyin qolgha kelgen ghelibide we uninggha yandashqan rahette özini toluq namayende qilidu. Ene shu chaghda heqiqiy sa'adetni hés qilisen. Bext démek, razimenlik shundaqla bashqilarning qolidikige qarimasliq démektur. Chünki nurghunlighan kishilerning ilikide ularni xushal qilghudek mal - dunya, ten salametlik, yüz - abruy bolushi mumkin, lékin ular özini bashqilargha sélishturup, etrapidiki kishilerdin bezilirining öyi chong, bezilirining puli téximu köp, yene bezilirining mensipi yuqiri ikenlikini körgende köngli yérim bolidu we özini bextsiz hésablap, teleysizlikidin waysashqa, axirida sheytan'gha boyun égip, teqdirige isyan qilishqa bashlaydu. Eger kishi paydiliq ilim, paydiliq ish - emel we yaxshiliqlarda bashqilarning özidin éship kétiwatqanliqini hés qilip, ulargha hewes qilsa we öziningmu shulardin éship kétishini arzu qilsa, bu tamamen bashqa.

Insan eger bir péshkellikke yoluqup, mal - dunyasidin, a'ilisidin, hetta birer ezasidin ayrilip méyip bolup qalsimu, teqdirige ten bérip, yaratqan igisining orunlashturushigha razimenlik bildürse, andin qelbi bext ilikide güllep yashnaydu.

Bir küni, bir méyip ademni kördüm. Bu ademning ezaliridin peqet tili bilen közila bar idi. Lékin uning chirayida birxil xush xuyluq eks étip turatti we kishilerge nahayiti ochuq - yoruq mu'amile qilatti. Uningdiki bu alametlerni téni saq kishilerdinmu körüsh tes idi. Bir qétimliq söhbet jeryanida u manga özining hayat hékayisini sözlep berdi: “Öz waqtida küchke tolghan yash yigit idim, nahayiti éghir nersilernimu des kötürüwétettim, kéyin bir qatnash hadisisi yüz bérip, put - qolumdin ayrilip qaldim, ehwalimgha échinip tola yighlaydighan bolup qaldim. Shuning bilen, akam méni yüdüp doxturxanimu doxturxana aylandi, u yerlerde mendimu bichare, mendinmu better kishilerni kördüm, beziliri aghriq azabidin hoshidin kétishken, beziliri sarang bolay dep qalghan idi, buni körüp özümning halitige könüp qaldim we perwerdigarimgha yüzlendim, emel - ibadetlirimni toluq orundidim, shu arqiliq özümge teselli taptim, mana emdi, méni mushu halda körüp turupsen” dédi u.

Hayatida yüz bergen ushshaq - chüshek péshkelliklerge achchiqlinip, shikayet qilip yürgenler xushalliqni tapalmaydu, bextni téximu sézelmeydu, ularning hayati künséri qarangghu zulmetke aylinidu. Qaqshighini qaqshighan bolup qalidu we hayatidin héch nersini özgertelmeydu. Emma bu péshkelliklerge ten bérip, teqdirige razimenlik bildürgenlerla hayatining peyzini sürüp, azab ichide bextning temini tétiyalaydu.

Xizmet we bext

Xizmet qiliwatqanda, perwerdigarning séni körüp turidighanliqini oyla, shu arqiliq xizmetni ixlas bilen, qétirqinip yaxshi qil, shundaq xizmet qilishmu bextning bir yoli bolup qalidu hem bashqilar bilen dostluq munasiwiti ornitish we kishilerning ishenchige érishishningmu yaxshi pursitidur. Özüng qiliwatqan ishni söyseng, bérilip, qétirqinip qilsang, herqandaq ishtin bext hés qilalaysen, uningdin her netijilerni qolgha keltüreleysen, muradinggha yételeysen.

Hayatqa ijabiyliq we ümid bilen baqqinki hergiz selbiylik yaki chüshkünlük bilen baqma, zérikish hés qilmaysen, qolgha keltürgen azghine addiy netije bolsimu, uni ishqa sélip, téximu chong netijilerni qolgha keltürüshke tirish, meghlubiyetke uchrighiningda, bilginki bu séning ghelibe qilishingning tunji qedimi bolup qalghusi. Meghlubiyettin özüngni tashliwetmey sewr qil, perwerdigaringgha sighin. Özüngni özgertip baqqin.

Burun bir kishi bolghan iken, dunyani 10 yilda özgertmekchi boluptu, lékin bu 10 yil ü sezmestinla héch ish qilalmastin ötüp kétiptu, shuning bilen u kishi: “Aldi bilen dölitimni özgertey” dep besh yil belgileptu, lékin bu besh yilda héch ish qilalmaptu, shuning bilen: “3 Yilda shehirimni özgertey” dep élan qiptu - yu, bunimu qilalmaptu, axiri: “Bir yil ichide özüm yashaydighan mehellini özgertey” dep béqiptu, lékin bunimu qilalmaptu, axiri a'ilisini alte ayda özgertidighan bolup, bunimu qilalmaptu. Shundila u adem öz - özige: “Emdi bildim, men aldi bilen özümni islah qilay” deptu.

Shundaq, bext we utuq aldi bilen özimizdin, özimizni özgertishtin bashlinidu, özimizni tüzitelisek, andin bashqilargha yétekchilik qilalaymiz.

Dawami bar.