Ghulamidin paxtaning hayati (23): men amérikigha néme üchün keldim

Ghulamidin paxta ayali we ikki balisi bilen bille. Yéqinqi yillarda chuken süret.

Amérikigha yéngi kelgen yillirida ayali we ikki balisi bilen birlikte chüshken süriti. 1960-Yillarning axiri, nyu-york.

1966-Yili ghulamidin paxtaning amérikagha kélishi uning muhajirettiki hayatigha yéngi sehipe achidu. Gérmaniyediki on nechche yilliq muhajiret hayatidin kéyin gherb dunyasining siyasiy we iqtisadiy merkizige aylan'ghan amérikada Uyghur awazini anglitish arzusi yash ghulamidin paxtaning könglige pükken nishanliridin biri idi. U amérikagha kelgen deslepki mezgilliride bir tereptin “Azadliq radiyosi” ning Uyghurche we özbékche anglitishi üchün heptide ikki qétimdin xewer teyyarlisa, yene bir tereptin pan-amérika hawa yollirida téxnik xadim bolup xizmet qilidu.

Uzun ötmey ghulamidin paxta bash shtabi washin'gtondiki “Amérika awazi” radiyosining özbékche anglitishida tesis qilin'ghan “Asiyagha échilghan dérize” namliq mexsus sehipe üchün heptide ikki qétimdin maqale teyyarlaydu. Shuning bilen bir waqitta u yene pan-amérika hawa yolliridiki xizmet qulayliqidin paydilinip, amérika we yawropada uyushturulghan ottura asiyagha da'ir ilmiy muhakime yighinlirigha aktipliq bilen qatnishidu we pikir bayan qilidu.

Bu jeryandiki hayat sehipilirini esligen ghulamidin paxta eyni waqitta eger soda-tijaret yaki öy-mülük kespi bilen shoghullan'ghinida idi, özining amérikidiki bir chong iqtisad igisi bolup kétishi mumkinlikini, emma qelbidiki weten sewdasining uni öz ghayisi üchün yashashqa chaqirghanliqini alahide tekitleydu.

1949-Yili kech küzde kindik qéni tökülgen qeshqerdin ayrilip muhajiretke qedem basqan ghulamidin paxta shu yillarda téxi emdila 18 yashqa kirgen bir yash yigit idi. Shundin kéyin u hindistan, türkiye we gérmaniyede özining newqiran yillirini oqush, öginish, xizmet we milliy dewa yoligha serp qilidu. 1966-Yilidin kéyin u amérikada yashashni qarar qilghan bolsimu, emma uning xiyalliri, chüshliri we armanliri haman yiraqtiki wetini bilen yughurulup kétidu.

Weten heqqidiki armanlar ghulamidin paxtani amérikigha ekélip tashlaydu. U “Asmini keng” bu tupraqta wujudigha kindik qéni bilen chigilgen weten burchini ada qilish, dunyaning siyasiy merkizi bolghan amérikada Uyghur awazini anglitish üchün her waqit özige özi heydekchilik qilidu, tiriship-tirmishidu, tépirlaydu. . .

(Dawami bar)