លោក ស៊ែហ្ស ម៉ូស្ទូរ៉ា (Serge Mostura) ឯកអគ្គរដ្ឋទូតបារាំង ប្រចាំប្រទេសកម្ពុជា បានឲ្យដឹងក្នុងសន្និសីទកាសែតថ្ងៃអង្គារ ទី៥ ខែកុម្ភៈ នាស្ថានទូតបារាំង តាមសំឡេងអ្នកបកប្រែភាសាថា លោក ហ្សង់-ម៉ាក អេរ៉ូ (Jean-Marc Ayrault) នាយករដ្ឋមន្ត្រីនៃសាធារណរដ្ឋបារាំង ក្នុងដំណើរទស្សនកិច្ច ២ថ្ងៃមកកម្ពុជា ដើម្បីចូលរួមព្រះរាជពិធីថ្វាយព្រះភ្លើង ព្រះមហាវីរក្សត្រ សម្ដេច នរោត្តម សីហនុ លោកឲ្យដឹងថា ក្នុងជំនួបរវាងលោក ហ្សង់-ម៉ាក អេរ៉ូ ជាមួយលោកនាយករដ្ឋមន្ត្រី ហ៊ុន សែន ភាគីទាំងពីរបានសន្យាបន្តពង្រឹងទំនាក់ទំនងឲ្យកាន់តែរឹងមាំលើគ្រប់វិស័យ។ ក្នុងនោះ បារាំង នឹងបន្តផ្តល់ជំនួយឲ្យកម្ពុជា ឲ្យបានច្រើនចាប់ពីឆ្នាំ២០១៣ តទៅ។
លោក ស៊ែហ្ស ម៉ូស្ទូរ៉ា៖ «ឆ្នាំ២០១២ បារាំង បានផ្តល់ជំនួយឥតសំណងមកកម្ពុជា ក្នុងរង្វង់ទឹកប្រាក់ប្រមាណ ៦៥លានដុល្លារសហរដ្ឋអាមេរិក ហើយនឹងបង្កើនជំនួយនេះនៅឆ្នាំ២០១៣ បន្ថែមទៀត។ ជំនួយរបស់បារាំង មិនមែនត្រឹមតែជំនួយទឹកប្រាក់ដែលបារាំង ឲ្យទេ ប៉ុន្តែមានដូចជាឲ្យប្រាក់កម្ចីផងដែរ។ ហើយក្នុងរយៈពេលប៉ុន្មានសប្ដាហ៍ទៀតនេះ នឹងមានការចុះហត្ថលេខាទៅលើកិច្ចព្រមព្រៀងនៃការផលិតទឹកដែលមានទឹកប្រាក់រហូតដល់ជាង ៣០លានដុល្លារ»។
បន្ថែមលើនេះ លោកឯកអគ្គរដ្ឋទូតបារាំង ស៊ែហ្ស ម៉ូស្ទូរ៉ា ក៏បានឲ្យដឹងថា បារាំង នឹងជំរុញឲ្យអ្នកវិនិយោគទុនរបស់ខ្លួនមកកម្ពុជា បានច្រើនថែមទៀតនាថ្ងៃអនាគត។ លោកថា សព្វថ្ងៃនេះទំហំទឹកប្រាក់វិនិយោគបារាំង ក្នុងប្រទេសកម្ពុជា មានប្រមាណ ៤០០លានអឺរ៉ូ ឬស្មើប្រមាណ ៥០០លានដុល្លារសហរដ្ឋអាមេរិក មានដូចជាវិនិយោគទៅលើវិស័យប្រេង វិស័យអគ្គិសនី និងរោងម៉ាស៊ីនកិនស្រូវជាដើម។
ទាក់ទិនបញ្ហានេះ មន្ត្រីគណបក្សប្រឆាំង និងសង្គមស៊ីវិលមួយចំនួននៅកម្ពុជា បានស្នើឲ្យរដ្ឋាភិបាលបារាំង ជួយជំរុញឲ្យប្រព័ន្ធតុលាការកម្ពុជា មានឯករាជ យុត្តិធម៌ គោរពសិទ្ធិមនុស្ស និងមានលទ្ធិប្រជាធិបតេយ្យពិតប្រាកដ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា កន្លងមកឃើញរដ្ឋាភិបាលបារាំង បានផ្តល់ជំនួយ និងជួយពង្រឹងប្រព័ន្ធតុលាការឲ្យមានឯករាជ និងយុត្តិធម៌។ ប៉ុន្តែលោកថា ជំនួយនេះមិនទាន់មានលទ្ធផល ឬប្រសិទ្ធភាពទេ។
លោក អ៊ូ វីរៈ៖ «បារាំង ឃើញជួយខ្លះដែរទាក់ទងរឿងក្រមព្រហ្មទណ្ឌអីហ្នឹង។ តែមកដល់បច្ចុប្បន្ននេះ តុលាការកម្ពុជា ក៏មិនទាន់មានឯករាជ ហើយបារាំង ក៏មិនទាន់បានជួយផ្នែកអីទាក់ទងរឿងឯករាជភាពរបស់តុលាការ គឺមិនទាន់បានជួយទាល់តែសោះ។ ចំពោះខ្ញុំ គឺសញ្ជាតិបារាំង មួយរូបដ៏សំខាន់ គឺលោក ម៉ម សូណង់ដូ កំពុងជាប់ក្នុងពន្ធនាគារ ហើយប្រទេសបារាំង មិនទាន់មានធ្វើអីជាដុំកំភួន ដើម្បីជំរុញឲ្យមានការដោះលែងលោក ម៉ម សូណង់ដូ ហើយទន្ទឹមគ្នាហ្នឹងដែរ បានផ្តល់ជំនួយបន្ថែមជារឿងមួយ។ ខ្ញុំយល់ថា បារាំង គួរយកចិត្តទុកដាក់ដែរ បើសិនជាក្នុងករណីសញ្ជាតិបារាំង មួយ ដែលជាប់ពន្ធនាគារដោយអយុត្តិធម៌ នៅតែបន្តជាប់ពន្ធនាគារ ហើយបារាំង នៅមិនអើពើ ហើយខ្ញុំជឿជាក់ថា នេះជាការឆ្លុះបញ្ចាំងមួយថា បារាំង ជាប្រទេសមួយដែលរើសអើងដល់ខ្មែរមានសញ្ជាតិបារាំង»។
លោក អ៊ូ វីរៈ មានយោបល់ថា រដ្ឋាភិបាលបារាំង គួរបង្កើនការយកចិត្តទុកដាក់របស់ខ្លួនទៅលើការអនុវត្តលទ្ធិប្រជាធិបតេយ្យ សិទ្ធិមនុស្ស និងប្រព័ន្ធតុលាការឲ្យមានឯករាជ និងមិនស្ថិតក្រោមបុគ្គល ឬបក្សនយោបាយទើបប្រសើរ។
យ៉ាងណាក៏ដោយ លោក ស៊ែហ្ស ម៉ូស្ទូរ៉ា ឯកអគ្គរដ្ឋទូតបារាំង ប្រចាំកម្ពុជា បានដកស្រង់សម្ដីលោកនាយករដ្ឋមន្ត្រីបារាំង ឲ្យដឹងថា បារាំង នឹងបង្កើនជំនួយ និងបន្តជួយកម្ពុជា លើវិស័យសុខាភិបាល វិស័យអប់រំ និងជំរុញក្រុមហ៊ុនឲ្យមកបោះទុនវិនិយោគក្នុងប្រទេសកម្ពុជា បានកាន់តែច្រើននាថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។