ប្រជាជនភូមិអញ្ចាញ ឃុំជ័យជោគ ស្រុកបូរីជលសារ ខេត្តតាកែវ ដែលមានដីស្រែក្បែរកន្លែងបោះបង្គោលព្រំដែនបណ្ដោះអាសន្នលេខ២៧០ បានឲ្យដឹងថា ពួកគាត់នៅមិនទាន់មានការអនុញ្ញាតឲ្យចូលទៅភ្ជួរដីស្រែលុបស្មៅ ត្រៀមធ្វើស្រែពង្រោះដើមឆ្នាំក្រោយដូចសព្វដងបានទេ ក្រោយពីការបោះតម្រុយបង្គោលព្រំដែនមកនោះ។
យុវជនដែលសុំមិនប្រាប់ឈ្មោះនៅភូមិអញ្ចាញ ឃុំជ័យជោគ បានឲ្យដឹងថា ដីស្រែជាង ៣ហិកតា ដែលគេធ្លាប់ដាំស្រូវដើមរដូវរាល់ឆ្នាំនៅចម្ងាយប្រមាណ ២០០ម៉ែត្រពីបង្គោលព្រំដែនបណ្ដោះអាសន្នលេខ២៧០នោះ ទំនងជាមិនអាចធ្វើស្រែបានទេនៅឆ្នាំនេះ ព្រោះថា កាលពីថ្ងៃទី១៧ ខែមិថុនា អាជ្ញាធរវៀតណាម បានមកហាមឃាត់លោកមិនឲ្យភ្ជួរដីស្រែនោះឡើយ។
យុវជនដដែលបានបន្តថា ៖ «ប៉ូលិសយួន ពួកនោះពេលខ្ញុំកំពុងភ្ជួរអ៊ីចឹងវាអត់ឃាត់ទេ ប៉ុន្តែពេលខ្ញុំភ្ជួរជិតហើយហ្នឹង វាឃាត់។ ពេលវានិយាយជាមួយខ្ញុំ ខ្ញុំអត់ចេះស្ដាប់ ខ្ញុំគ្រាន់តែគ្រវីក្បាលដើរចេញ។ មានពូម្នាក់គាត់មកជិតនេះ គាត់ចេះនិយាយវៀតណាមដែរ មកនិយាយជាមួយពូនោះ។ ពូនោះប្រាប់ខ្ញុំថា យួនឈប់ឲ្យភ្ជួរ។ រួចវាទូរស័ព្ទទៅមេវាទៀត មេវាថា បើខ្ញុំមិនព្រមឈប់ភ្ជួរទេ វាឲ្យកូនចៅវាមកដកយកគោយន្ត និងចាប់ពួកខ្ញុំ ដល់ហើយពួកខ្ញុំឈប់ភ្ជួរតាមវាទៅ»។
បុរសអាយុ ៤៦ឆ្នាំម្នាក់ទៀត រស់នៅភូមិអញ្ចាញ បានប្រាប់ឈ្មោះហៅកាត់ថា ម.យ ដោយខ្លាចមានការគំរាមកំហែងពីអាជ្ញាធរ បានឲ្យដឹងថា ដីស្រែគាត់ ២ហិកតាមិនទាន់អាចចូលទៅភ្ជួររាស់ដាស់ដីបាននៅឡើយទេតាំងពីមានការបោះបង្គោលព្រំដែនលេខ២៧០ កន្លងមកនោះ។ លោកថា អ្នកភូមិបាននាំគ្នាទៅភ្ជួរកាលពីពាក់កណ្ដាលខែមិថុនា ប៉ុន្តែមានការហាមឃាត់ពីអាជ្ញាធរវៀតណាម ហេតុនេះហើយធ្វើឲ្យគាត់បារម្ភខ្លាចដីស្រែធ្លាប់ទទួលផលរាល់ឆ្នាំត្រូវទុកទំនេរចោល ព្រោះតែបញ្ហាព្រំដែននោះ។
បុរសឈ្មោះ ម.យ ឲ្យដឹងដូច្នេះ ៖ «ចង់ទៅភ្ជួរពន្លិចទឹកដើម្បីឲ្យងាប់ស្មៅ ហើយដល់សម្រកយើងធ្វើស្រែទៀត។ មិនទាន់ហ៊ានទៅភ្ជួរទេ ប៉ូលិសព្រំដែនគេប្រាប់ថា ចាំច្រូតកាត់ហើយចាំទៅភ្ជួរជាមួយគេ គេទៅដែរ»។
អ្នកភូមិម្នាក់ទៀតអាយុ ៣១ឆ្នាំបានឲ្យដឹងថា ព្រោះតែបញ្ហាព្រំដែន អ្នកភូមិមិនហ៊ានបញ្ចេញឈ្មោះ ឬហ៊ានផ្ដល់ព័ត៌មានឡើយ។ ចំពោះការធ្វើស្រែវិញ ប្រជាពលរដ្ឋកំពុងតែរង់ចាំការអនុញ្ញាតពីអាជ្ញាធរខ្មែរ និងវៀតណាម ប៉ុន្តែមិនដឹងចម្លើយតបថា ព្រមឲ្យភ្ជួរដាស់ដីស្រែឲ្យគល់ជញ្ជ្រាំងលិចទឹក ដែលទឹកនឹងឡើងនៅខែក្រោយនោះទេ ៖ «ចាប់ផ្ដើមបោះបង្គោល(ព្រំដែន) មានប្រជាពលរដ្ឋគាត់ទៅបាញ់ថ្នាំ(ស្រូវ) គេមិនឲ្យបាញ់ទេ គេថា អ្ហែងមិនមើលបង្គោលព្រំដែនទេឬ? គ្នាក៏ឈប់ទៅ។ ដល់ពេលប៉ុន្មានថ្ងៃមុន ទី១៦-១៧ ខែ៦ហ្នឹង ប្រជាពលរដ្ឋទៅភ្ជួរដែរ អាជ្ញាធរយួនគេមិនឲ្យភ្ជួររាស់ទេ..»។
ជំទប់ទី១ ឃុំជ័យជោគ លោក ម៉ង់ សារ៉េត មិនផ្ដល់ការអត្ថាធិប្បាយឡើយជុំវិញបញ្ហានេះ ដោយសារពុំមានការអនុញ្ញាតពីថ្នាក់លើ។
អភិបាលស្រុកបូរីជលសារ លោក ស៊ុត ខុន បានបិទទូរស័ព្ទភ្លាមៗ នៅគ្រាដែលអ្នកយកព័ត៌មានទូរស័ព្ទទៅលោកដើម្បីសុំការបំភ្លឺអំពីការមិនអនុញ្ញាតឲ្យកសិករបានចូលភ្ជួរដីស្រែក្បែរព្រំដែនលេខ២៧០នោះ។
បង្គោលព្រំដែនលេខ២៧០ ដែលបោះបណ្ដោះអាសន្នកាលពីថ្ងៃទី២៥ ខែឧសភា ឆ្នាំ២០១០ កំពុងតែបង្កជាបញ្ហាស្មុគស្មាញដល់ប្រជាកសិករនៅឃុំជ័យជោគ ស្រុកបូរីជលសារ ខេត្តតាកែវ ពាក់ព័ន្ធនឹងការធ្វើស្រែចម្ការនៅឆ្នាំនេះ នៅតែមិនមានភាពច្បាស់លាស់នៅឡើយ៕