វេទិកាអ្នកស្ដាប់វិទ្យុអាស៊ីសេរីសម្រាប់រាត្រីថ្ងៃអង្គារ ទី១៧ ខែធ្នូ ឆ្នាំ២០២៤ នេះ ពិភាក្សាលើប្រធានបទ៖ តើរបបត្រកូល ហ៊ុន ចាប់ខ្លួនបងប្អូន សាច់ញាតិ អ្នកប្រឆាំងដាក់គុក ជាអំពើភេរវកម្មដែរឬទេ?
អ្នកវិភាគលើកឡើងថា អតីតនាយករដ្ឋមន្ត្រី លោក ហ៊ុន សែន បានធ្វើនយោបាយយកពលរដ្ឋខ្លួនឯង ដែលប្រឆាំងខ្លួនជាសត្រូវ និងចាត់ទុកមន្ត្រីគណបក្សប្រឆាំងជាឧទ្ទាមជាដើម។
ក្រៅពីលោកបានហៅក្រុមអ្នកប្រឆាំងជាឧទ្ទាមក្រៅច្បាប់ហើយនោះ លោក ហ៊ុន សែន ក៏ប្រើល្បិចនយោបាយសងសឹកដែរ។ ចំពោះអ្នករិះគន់ ឬសកម្មជនគណបក្សប្រឆាំងនៅក្នុងស្រុកមួយចំនួន ត្រូវបានអាជ្ញាធរ នៃរបបត្រកូល ហ៊ុន ចាប់ដាក់គុក។
ដោយឡែកសម្រាប់អ្នកអ្នករិះគន់ ឬអ្នកប្រឆាំងនៅក្រៅស្រុកវិញ លោក ហ៊ុន សែន មិនអាចធ្វើអ្វីពួកគេបាននោះ លោកប្រើយុទ្ធសាស្ត្រចាប់បងប្អូន សាច់ញាតិនៅក្នុងស្រុកធ្វើជាចំណាប់ខ្មាំងនយោបាយ ដើម្បីឱ្យសាច់ញាតិបងប្អូននៅក្រៅស្រុក ឱ្យសុំទោស និងចុះចូលរួមរស់ជាមួយរដ្ឋាភិបាល។ ជាក់ស្ដែងដូចជា ករណីលោក ហៃ វណ្ណា ត្រូវបានអាជ្ញាធររបបត្រកូល ហ៊ុន ចាប់ប្អូនប្រុសរបស់លោកធ្វើជាចំណាប់ខ្មាំង ដើម្បីជាថ្នូរនៃការចុះចូលជាមួយរដ្ឋាភិបាល និងករណីចុងក្រោយគឺ ករណីអាជ្ញាធរចាប់ខ្លួនឪពុករបស់លោក ស៊ន តារា ជាដើម។
តើការប្រើល្បិចកលនយោបាយចាប់បងប្អូន សាច់ញាតិ ឬឪពុកម្ដាយរបស់អ្នករិះគន់នៅក្រៅប្រទេស ធ្វើជាចំណាប់ខ្មាំងនយោបាយនេះ ជាអំពើភេរវកម្មដែរឬទេ?
សូមលោកអ្នកនាងចុចស្ដាប់សំឡេង នៃកិច្ចពិភាក្សារវាងលោក ជុន ច័ន្ទបុត្រ ជាមួយលោក ស៊ន តារា អ្នកអត្ថាធិប្បាយនយោបាយ និងលោក គឹម សុខ អ្នកអត្ថាធិប្បាយនយោបាយ ដែលបានជជែកពិភាក្សាអំពីរឿងនេះ នៅក្នុងនាទីវេទិកាអ្នកស្ដាប់វិទ្យុអាស៊ីសេរី នារាត្រីថ្ងៃអង្គារ ទី១៧ ខែធ្នុ ឆ្នាំ២០២៤៕