ការស្នើច្បាប់នេះឡើង គឺគេបានចោទថា ប្រទេសកម្ពុជាមិនគោរពច្បាប់អន្តោប្រវេសន៍អន្តរជាតិ ដោយសារតែការបញ្ជូនជនជាតិអ៊ុយហ្គ័រ ២០នាក់ឲ្យត្រឡប់ទៅប្រទេសចិនវិញ កាលពីចុងឆ្នាំ២០០៩។
មន្ត្រីជាន់ខ្ពស់នៃក្រសួងការបរទេសកម្ពុជា បានថ្លែងនៅថ្ងៃ២៥ ឧសភានេះ ថា រដ្ឋាភិបាលនឹងមិនធ្វើការអត្ថាធិប្បាយណាមួយឡើយ ទាក់ទងនឹងសេចក្ដីព្រាងច្បាប់របស់សមាជិកសភាអាមេរិក ២រូបដែលបានស្នើឲ្យសភាអាមេរិកកុំលើកលែងបំណុលកម្ពុជាជំពាក់សហរដ្ឋអាមេរិកនោះ។
លោក កុយ កួង អនុរដ្ឋលេខាធិការ និងជាអ្នកនាំពាក្យក្រសួងការបរទេសផងនោះ មានប្រសាសន៍យ៉ាងដូច្នេះថា ៖ «កម្ពុជាមិនមានប្រតិកម្មអ្វីទេ ដោយសារនេះគឺជាសិទ្ធិរបស់សភាសហរដ្ឋអាមេរិក រីឯកម្ពុជាវិញគឺជាប្រទេសឯករាជ មានអធិបតេយ្យពេញលេញ ហើយកម្ពុជាមាននយោបាយការបរទេសរបស់ខ្លួន មានច្បាប់របស់ខ្លួន។ ដូច្នេះកម្ពុជាត្រូវតែអនុវត្តតាមនយោបាយការបរទេសរបស់ខ្លួន ហើយនិងច្បាប់របស់ខ្លួនប៉ុណ្ណោះ! ខ្ញុំសូមបញ្ជាក់ថា រហូតមកដល់ពេលនេះ សហរដ្ឋអាមេរិក និងរាជរដ្ឋាភិបាលកម្ពុជា គឺទំនាក់ទំនងរវាងរដ្ឋាភិបាលទាំងពីរមិនមានបញ្ហាអ្វីទេ គឺមានលក្ខណៈជាធម្មតា»។
ករណីដែលបណ្ដាលឲ្យសមាជិកសភាសហរដ្ឋអាមេរិកពីររូបធ្វើសេចក្ដីព្រាងច្បាប់ ដើម្បីស្នើទៅសភាអនុម័តកុំលុបបំណុល ដែលប្រទេសកម្ពុជាបានជំពាក់សហរដ្ឋអាមេរិកក្នុងសម័យសង្គ្រាមនោះ គឺដោយសារកាលពីខែធ្នូ ឆ្នាំ២០០៩ ប្រទេសកម្ពុជាបានបញ្ជូនជនជាតិអ៊ុយហ្គ័រចំនួន ២០នាក់ ក្នុងនោះមានកុមារ ២នាក់ផង ឲ្យត្រឡប់ទៅប្រទេសចិនវិញ។ ការបញ្ជូនជនជាតិអ៊ុយហ្គ័រចំនួន ២០នាក់ទៅប្រទេសចិនវិញនោះ បានធ្វើឲ្យប្រទេសកម្ពុជាទទួលរងការថ្កោលទោសជាខ្លាំងពីសហគមន៍អន្តរជាតិ។
អ្នកនាំពាក្យក្រសួងការបរទេសកម្ពុជា លោក កុយ កួង មានប្រសាសន៍ទៀតថា ជនជាតិអ៊ុយហ្គ័រទាំង ២០នាក់នោះ គឺបានចូលមកប្រទេសកម្ពុជាដោយរំលោភច្បាប់អន្តោប្រវេសន៍។
លោក កុយ គួង បានបញ្ជាក់ថា ៖ «កម្ពុជាបានអនុវត្តច្បាប់អន្តោប្រវេសន៍របស់ខ្លួនយ៉ាងត្រឹមត្រូវ ហើយដោយសារតែជនជាតិអ៊ុយហ្គ័រទាំង ២០រូបនោះ ដែលមកកម្ពុជានោះ គឺថា គាត់ចូលមកមិនមានលិខិតស្នាមអ្វីទាំងអស់! ដែលហៅថាជាអន្តោប្រវេសន៍ខុសច្បាប់ ដែលតម្រូវឲ្យយើង កម្ពុជា អនុវត្តច្បាប់អន្តោប្រវេសន៍របស់ខ្លួន»។
សមាជិកសភាអាមេរិកពីររូប គឺលោក វីលៀម ដេឡាហាន់ (William Delahunt) និងលោក ដាណា រ៉ូរ៉ាបាឃើរ៍ (Dana Rohrabacher) បានដាក់សេចក្តីព្រាងច្បាប់របស់ខ្លួនជូនទៅសភាអាមេរិក ដើម្បីទី១ ទប់ស្កាត់ការកាត់បន្ថយបំណុលដែលប្រទេសកម្ពុជាជំពាក់សហរដ្ឋអាមេរិកពីរបប លន់ នល់ និងទី២ ទប់ស្កាត់កុំឲ្យប្រទេសកម្ពុជាទទួលបានការលើកលែងពន្ធពីការនាំសម្លៀកបំពាក់ចូលសហរដ្ឋអាមេរិក។ កាលពីឆ្នាំ២០០៨ គេបានវាយតម្លៃថា ប្រទេសកម្ពុជាបានជំពាក់បំណុលសហរដ្ឋអាមេរិកទាំងការទាំងដើមចំនួន ៣៣៩លានដុល្លារអាមេរិក។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា រាល់ជំនួយ និងបំណុលមួយចំនួន គឺតម្រូវឲ្យប្រទេសកម្ពុជាគោរពសិទ្ធិមនុស្ស ក៏ប៉ុន្តែកម្ពុជាបានខាតប្រយោជន៍យ៉ាងច្រើនទាក់ទងនឹងបញ្ហានេះ។
លោក អ៊ូ វីរៈ បានអះអាងថា ៖ «យើងខាតប្រយោជន៍ច្រើនរួចហើយ ទាក់ទងរឿងអត់គោរពសិទ្ធិមនុស្សនេះ យើងខាតប្រយោជន៍ច្រើនមែនទែន!»។
កន្លងមក ប្រទេសកម្ពុជាធ្លាប់សុំឲ្យអាមេរិកលុបចោលបំណុលដែលខ្លួនជំពាក់ ក៏ប៉ុន្តែសហរដ្ឋអាមេរិកមិនទាន់បានផ្ដល់ចម្លើយជាក់លាក់ណាមួយនៅឡើយទេ។ ក្នុងដំណើរទស្សនកិច្ចមកប្រទេសកម្ពុជាកាលពីខែមករា សមាជិកសភាសហរដ្ឋអាមេរិកបីរូប ធ្លាប់លើកឡើងថា នឹងស្នើសុំឲ្យអាមេរិកពិចារណាបង្វែរបំណុលដែលប្រទេសកម្ពុជាជំពាក់តាំងពីឆ្នាំ១៩៧២នោះ ឲ្យទៅជាជំនួយអភិវឌ្ឍន៍វិញ៕
