ទាហាន​ថៃ​៣​នាក់​លបលួច​ចូល​ភូមិ​ខ្មែរ​ក្នុង​ខែត្រ​ឧត្ដរមានជ័យ

កង​រក្សា​ព្រំដែន​ខ្មែរ​បាន​អះអាង​ថា កង​ទាហាន​ឈុត​ខ្មៅ​ថៃ​៣​នាក់​បាន​លបលួច​ចូល​មក​ក្នុង​ភូមិ​ខ្មែរ​ជាប់​ព្រំដែន​នៃ​ឃុំ​អំពិល ស្រុក​បន្ទាយអំពិល ខែត្រ​ឧត្ដរមានជ័យ កាលពី​យប់​ថ្ងៃ​សុក្រ។
ដោយ សាវយុត
2008.08.30
ប្រាសាទ​តាមាន់ ទាហាន​ថៃ​ឈរ​យាម​នៅ​ខាង​ក្រៅ​ប្រាសាទ​តាមាន់​ធំ ដែល​ស្ថិត​ក្នុង​ស្រុក​បន្ទាយ​អំពិល ខេត្ត​ឧត្ដរ​មានជ័យ រារាំង​ទាហាន​ខ្មែរ​មិន​ឲ្យ​ចូល​ក្នុង​បរិវេណ​ប្រាសាទ នា​ថ្ងៃ​ទី​៨ សីហា ២០០៨។
RFA Photo/Chea Makara

នាយចំណង់​របស់​កង​យោធពល​ខេមរភូមិន្ទ​ប្រចាំ​ព្រំដែន​ច្រក​ជប់គគីរ លោក ពាន សារាម បាន​មាន​ប្រសាសន៍​ឲ្យ​ដឹង​កាលពី​ព្រឹក​ថ្ងៃ​សៅរ៍ ទី​៣០ ខែ​សីហា ថា ទាហាន​ឈុត​ខ្មៅ​ថៃ​មាន​គ្នា​៣​នាក់​ប្រដាប់​ដោយ​អាវុធ​២​ដើម បាន​លបលួច​ចូល​មក​ភូមិ​ជប់គគីរ​ខាង​កើត កាលពី​វេលា​ម៉ោង​ប្រមាណ​៨​យប់​ថ្ងៃ​សុក្រ ទី​២៩ ខែ​សីហា ដោយ​មិន​ដឹង​ពី​បំណង​ចូល​មក​នោះ​យ៉ាង​ណា​នៅ​ឡើយ​ទេ ហើយ​ពួក​គេ​បាន​ប្រញាប់​ចាកចេញ​ទៅ​វិញ​ភ្លាម​ដែរ។

កង​រក្សា​ព្រំដែន​ដដែល​បាន​មាន​ប្រសាសន៍​ថា ការលបលួច​ចូល​ភូមិ​ខ្មែរ​នោះ​បាន​ធ្វើឡើង​បន្ទាប់ពី​កង​ទាហាន​ថៃ​មួយ​ក្រុម​បាន​មក​បំផ្លាញ​ដើម​ដំឡូង​មី​របស់​អ្នក​ភូមិ​ខ្មែរ កាលពី​ពេល​ថ្ងៃ​ម្ដង​រួច​មក​ហើយ។

លោក ពាន សារាម បាន​ឲ្យ​ដឹង​ថា ៖ «ទាហាន​ថៃ​៣​នាក់ យប់​មិញ​វា​ឆ្មក់​ចូល​មក​មួយ​ភ្លែត កម្លាំង​យើង​នៅ​ទី​នេះ វា​ទៅ​វិញ​ភ្លាម។ ម្សិលមិញ​កាប់​ដើម​ដំឡូង​បី​បួន​ប្រាំ​គុម្ព​ទៅ»

ប្រជាពលរដ្ឋ​ខ្មែរ​នៅ​ភូមិ​ជប់គគីរ​ខាង​លិច​បាន​មាន​ប្រសាសន៍​ថា បើ​ទោះបី​ជា​ពេល​នេះ​គេ​ឃើញ​កង​ទាហាន​ឈុត​ខ្មៅ​ថៃ​បាន​ចូល​មក​ដើរ​ល្បាត​នៅ​ក្បែរៗ​ភូមិ​ជប់គគីរ​ខាង​កើត​និង​ខាង​លិច​ស្ទើរតែ​ជា​រៀងរាល់​ថ្ងៃ​ក៏​ដោយ ក៏​ពួក​គេ​មិន​ខ្លាច​និង​មិន​ចាក​ចោល​ទី​លំនៅ​ទេ។

ចំណែក​ឯ​ស្ថានការណ៍​នៅ​ប្រាសាទ​តាមាន់ នៅ​ស្រុក​បន្ទាយ​អំពិល​នោះ​ដែរ រហូត​មក​ដល់​ថ្ងៃ​សៅរ៍​នេះ មេ​បញ្ជាការ​កង​យោធពល​ខេមរភូមិន្ទ​នៃ​កង​វរសេនា​តូច​៤២២ ដែល​ប្រចាំការ​នៅ​តំបន់​នោះ គឺ​លោក ប៉ុល ថេន បាន​មាន​ប្រសាសន៍​ថា ៤​ថ្ងៃ​មក​ហើយ​កង​ទាហាន​ឈុត​ខ្មៅ​ថៃ​បាន​ព្យាយាម​គេច​ចេញ​ពី​ការមិន​ចូល​ប្រជុំ​ជាមួយ​កង​ទាហាន​ខ្មែរ ហើយ​ច្រក​ចេញ​ចូល​ទៅ​កាន់​ប្រាសាទ​តាមាន់​នោះ​ត្រូវ​ថៃ​បិទ​ជា​ស្ថាពរ​មិន​ឲ្យ​ខ្មែរ​ចេញ​ចូល​ទៀត​ឡើយ។

លោក ប៉ុល ថេន បាន​មាន​ប្រសាសន៍​ថា ៖ «យើង​ហៅ​វា​មក​ជួប វា​អត់​ជួប វា​រវល់​រហូត។ ឥឡូវ​ហ្នឹង​ប្រាសាទ​ហ្នឹង​វា​បិទ​អត់​ឲ្យ​ចេញ​ចូ​លទេ បើ​នៅ​ម្នាក់​មួយ​ចំហៀង​របង។ ព្រឹក​មិញ​ឲ្យ​ជួប​ទៀត វា​អត់​បាន​ជួប​ទៀត។ ៤​ថ្ងៃ​ហើយ​ដែល​ត្រូវ​ជួប​វា​ហ្នឹង វា​អត់​ឲ្យ​ជួប»

វត្តមាន​កងទ័ព​ថៃ​បាន​ជ្រៀត​ចូល​មក​ក្នុង​អធិបតេយ្យភាព​នៃ​ព្រំដែន​ខ្មែរ​ជា​ច្រើន​កន្លែង ចាប់តាំងពី​មាន​កងទ័ព​ឈុត​ខ្មៅ​និង​ប៉ារ៉ា​ថៃ​ជា​ច្រើន​រយ​នាក់ បាន​ចូល​លុកលុយ​ជិត​ប្រាសាទ​ព្រះវិហារ​ដោយ​មិន​ទាន់​មាន​ដំណោះស្រាយ​ប្រសើរ​នៅ​ឡើយ​ទេ។

រដ្ឋលេខាធិការ​ក្រសួង​ការពារ​ជាតិ​នៃ​ប្រទេស​កម្ពុជា លោក នាង ផាត បាន​មាន​ប្រសាសន៍​កាលពី​ល្ងាច​ថ្ងៃ​សៅរ៍​ថា ការបន្ធូរបន្ថយ​នៃ​ការប្រឈម​មុខ​ដាក់​គ្នា​កងទ័ព​ខ្មែរ​ថៃ​នៅ​ជិត​តំបន់​ប្រាសាទ​ព្រះវិហារ​និង​តំបន់​ផ្សេង​ទៀត មិន​ទាន់​ឈាន​ទៅ​ដល់​ការជជែក​គ្នា​បាន​នៅ​ឡើយ​ទេ​ដោយសារតែ​នៅ​រង់ចាំ​មន្ត្រី​ការបរទេស​នៃ​ប្រទេស​ទាំង​ពីរ​ធ្វើការ​ទំនាក់​ទំនង​ដើម្បី​បន្ត​ការចរចា​ឡើងវិញ។

លោក នាង ផាត បាន​បញ្ជាក់​ថា ៖ «អត់​ទាន់​និយាយ​អា​ហ្នឹង​ទេ។ ឥឡូវ​ហ្នឹង​សម្ដេច​មាន​គោលការណ៍​ឲ្យ​ក្រសួង​ការ​បរទេស​ធ្វើការ​ទំនាក់​ទំនង​គ្នា​ឡើង​វិញ​ថា​ពេល​ណា»

អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន បាន​មាន​ប្រសាសន៍​ថា​កាលពី​ថ្ងៃ​សុក្រ នាយក​រដ្ឋមន្ត្រី​នៃ​ប្រទេស​កម្ពុជា លោក ហ៊ុន សែន បាន​ក្រើន​រំឮក​ឲ្យ​មន្ត្រី​ក្រសួង​ការបរទេស លោក ហោ ណាំហុង ចាប់ផ្ដើម​ទំនាក់​ទំនង​មន្ត្រី​ថៃ​ដើម្បី​ផ្ដើម​ជួប​ចរចា​ឡើង​វិញ​ស្ដីពី​បញ្ហា​តំបន់​ប្រាសាទ​ព្រះវិហារ បន្ទាប់ពី​គម្រោង​ជួប​ចរចា​លើក​ទី​៤ ដែល​គ្រោង​នឹង​ធ្វើ​ឡើង​កាលពី​ថ្ងៃ​ទី​២៩ ខែ​សីហា នៅ​ខែត្រ​សៀមរាប ត្រូវ​បាន​លុប​ចោល​ដោយសារ​ប្រទេស​ថៃ​កំពុង​មាន​វិបត្តិ​បាតុកម្ម​នោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។