ចាងហ្វាងការផ្សាយរបស់កាសែតសង្គមខ្មែរ លោក ហួង សាវឿន បានអះអាងកាលពីព្រឹកថ្ងៃសៅរ៍ ទី២៧ ខែធ្នូ ថា និពន្ធនាយកកាសែតរបស់លោកឈ្មោះ ស៊ីង សំឡី ត្រូវបានប៉ូលិសចាប់ខ្លួនកាលពីថ្ងៃទី២៦ ខែធ្នូ ជាមួយអ្នកភូមិ២នាក់ទៀត។
ចាងហ្វាងកាសែតដដែលនោះបានចោទប្រកាន់ថា ការចាប់ខ្លួននិពន្ធនាយកឈ្មោះ ស៊ីង សំឡី ដោយសារបានការពារផលប្រយោជន៍ប្រជាពលរដ្ឋនៅក្នុងរឿងទំនាស់ដីស្រែប្រាំងដែលពាក់ព័ន្ធនឹងអភិបាលស្រុកជីក្រែង ហើយកើតមានជម្លោះជាមួយនឹងអភិបាលស្រុកនោះផង។
លោក ហួង សាវឿន បានមានប្រសាសន៍ថា ៖ «លោក ស៊ីង សំឡី គាត់និយាយថា រឿងនេះរឿងទំនាស់ជាមួយអភិបាលស្រុកហ្នឹងបញ្ហាដីស្រែ។ អភិបាលស្រុកជីក្រែងហ្នឹងកោះហៅគាត់ដើម្បីបំភ្លឺនៅស្រុក គាត់អត់បានចូលខ្លួនទៅបំភ្លឺទេ»។
ក៏ប៉ុន្តែអភិបាលស្រុកជីក្រែង លោក កៅ សោភ័ណ បានបដិសេធចោលចំពោះបញ្ហាដែលថាការចាប់ខ្លួនដោយសារតែមានទំនាស់ជាមួយលោកនោះគឺមិនពិតទេ។
លោកអភិបាលស្រុកបានចោទប្រកាន់ថា ការចាប់ខ្លួនដោយសារអ្នកទាំងនោះបានដឹកនាំប្រជាពលរដ្ឋចំនួនបីភូមិនៅក្នុងឃុំជីក្រែងទៅដណ្ដើមយកដីស្រែប្រាំងជាង៩០ហិកតារពីអ្នកភូមិឃុំផ្សេងគ្នា ហើយអាជ្ញាធរស្រុកធ្លាប់បានកោះអញ្ជើញឲ្យចូលខ្លួនមកសាកសួរនៅសាលាស្រុកចំនួនបីលើក ក៏ប៉ុន្តែពុំមានការចូលខ្លួនទេ។
លោក កៅ សោភ័ណ បានបញ្ជាក់ថា ៖ «ដោយសារអស់លោកទាំងអស់បានដឹកនាំប្រជាជនបីភូមិនៅក្នុងឃុំជីក្រែងទៅដណ្ដើមយកដីស្រែប្រាំងជាង៩០ហិកតាររបស់ប្រជាពលរដ្ឋនៅភូមិត្រពាំងត្រោះ ឃុំអន្លង់សំណ»។
ចៅក្រមស៊ើបអង្កេតរបស់តុលាការខែត្រសៀមរាប លោក ងួន ណារ៉ា បានមានប្រសាសន៍ថា សំណុំរឿងអ្នកទាំងបីគឺលោកជាអ្នកទទួលបន្ទុកចាត់ការដែលការចាប់ខ្លួននោះត្រូវបានតំណាងអយ្យការចោទប្រកាន់តាមច្បាប់ព្រហ្មទណ្ឌអន្តរកាលមាត្រា៥៩និង៦០រហូតដល់ទៅពីរបីបទល្មើស។
លោក ងួន ណារ៉ា បានមានប្រសាសន៍ថា ៖ «តំណាងអយ្យការចោទពីរបីបទល្មើសឯណោះ មានបទប្រើអំពើហិង្សាលើអ្នកកាន់កាប់អចលនវត្ថុដោយសុចរិតផង ហើយនិងបទរំលោភកម្មសិទ្ធិឯកជន»។
តាមការបង្ហើបឲ្យដឹងថា នៅថ្ងៃសៅរ៍នេះប៉ូលិសបានតាមរកចាប់ខ្លួនអ្នកភូមិ២នាក់ផ្សេងទៀតដែលជាប់ពាក់ព័ន្ធនឹងបញ្ហាទំនាស់ដីធ្លីដដែលនោះ។
អង្គការសិទ្ធិមនុស្សក្រៅរដ្ឋាភិបាលបានសម្ដែងកង្វល់ថា បញ្ហាទំនាស់ដីធ្លីដែលកន្លងមកបានហាមឃាត់មិនឲ្យមានការចាប់ខ្លួនត្រូវបានគេបង្វែរឲ្យទៅជារឿងព្រហ្មទណ្ឌវិញនៅមុនពេលដែលត្រូវដោះស្រាយទំនាស់ស៊ីវិល។
អ្នកស៊ើបអង្កេតសមាគមការពារសិទ្ធិមនុស្សអាដហុកខែត្រសៀមរាប លោក សួស ណារិន បានមានប្រសាសន៍ថា សង្គមស៊ីវិលតែងតែឲ្យអនុសាសន៍ទៅក្រុមអ្នកច្បាប់ថា ទំនាស់ដីធ្លីសុំកុំឲ្យបង្វែរទៅជារឿងព្រហ្មទណ្ឌដែលនាំទៅដល់ការចាប់ខ្លួន ក៏ប៉ុន្តែអនុសាសន៍នោះពុំមានប្រសិទ្ធភាពទេ។
តាមអង្គការសិទ្ធិមនុស្សក្រៅរដ្ឋាភិបាលឲ្យដឹងថា រយៈពេលបីបួនខែមកនេះទំនាស់ដីធ្លីនៅខែត្រសៀមរាបសមត្ថកិច្ចបានចាប់ខ្លួនប្រជាពលរដ្ឋ៧នាក់ដាក់ពន្ធនាគារ ហើយអ្នកដែលកំពុងតែប្រឈមមុខនឹងការចាប់ខ្លួនដាក់ពន្ធនាគារនាពេលខាងមុខមានប្រហែលជា១០នាក់ទៀត៕