ព្រៃ​លិច​ទឹក​ប្រមាណ​៤​ហិកតារ​រង​ការ​កាប់​បំផ្លាញ​នៅ​ខែត្រ​សៀមរាប

នៅ​តំបន់​វាល​លិច​ទឹក ស្ថិត​នៅ​ភាគ​ខាង​លិច​ភ្នំ​ក្រោម​នៃ​ក្រុង​សៀមរាប ខេត្ត​សៀមរាប មាន​ការ​កាប់​បំផ្លាញ​ព្រៃ​លិច​ទឹក​ប្រមាណ ៤​ហិកតារ​កាល​ពី​ពេល​ថ្មី​ៗ​នេះ។
ដោយ ហង្ស សាវយុត
2010-06-29
អ៊ីម៉ែល
មតិ
Share
បោះពុម្ព
ព្រៃ​លិច​ទឹក​នៅ​ក្នុង​បឹង​ទន្លេ​សាប
ព្រៃ​លិច​ទឹក​នៅ​ក្នុង​បឹង​ទន្លេ​សាប
RFA/Hang Savyouth

ក្រុម​អ្នក​ភូមិ​ខ្លះ​ដែល​ចូល​ទៅ​ធ្វើ​ស្រែ​ជាប់​ទន្លេ​ នា​តំបន់​ភាគ​ខាង​លិច​ភ្នំ​ក្រោម ក្នុង​ក្រុង​សៀមរាប ខេត្ត​សៀមរាប បាន​អះអាង​ថា គេ​បាន​ប្រទះ​ឃើញ​ព្រៃ​លិច​ទឹក​ប្រហែល ៤​ហិកតារ​ត្រូវ​បាន​គេ​កាប់​បំផ្លាញ ដើម្បី​ពង្រីក​យក​ដី​ធ្វើ​ជា​កម្មសិទ្ធិ​ឯកជន​កាល​ពី​ពេល​ថ្មី​ៗ​នេះ។

បុរស​ម្នាក់​សុំ​មិន​បញ្ចេញ​ឈ្មោះ ដែល​មាន​ដី​ស្រែ​នៅ​ជាប់​តំបន់​ព្រៃ​លិច​ទឹក បាន​អះអាង​កាល​ពី​ល្ងាច​ថ្ងៃ​ច័ន្ទ ទី​២៨ ខែ​មិថុនា ថា គាត់​បាន​ធ្វើ​ដំណើរ​ទៅ​ស្រែ និង​បាន​ប្រទះ​ឃើញ​ព្រៃ​លិច​ទឹក​ប្រមាណ ៤​ហិកតារ​នៅ​តំបន់​ថ្នល់​រលំ​អន្លង់​ត្រែង និង​វាល​ចាំង​ក្ដារ នៅ​ភាគ​ខាង​លិច​ភ្នំ​ក្រោម ត្រូវ​បាន​ជន​មិន​ស្គាល់​មុខ​ប្រើ​គ្រឿង​ចក្រ​ទៅ​ឈូស​បំផ្លាញ ដើម្បី​រុក​រាន​យក​ដី។

បុរស​ដដែល​បាន​មាន​ប្រសាសន៍​ថា ក្រុម​អ្នក​ភូមិ​នៅ​ទី​នោះ​មិន​សប្បាយ​ចិត្ត​ទេ នៅ​ពេល​ដែល​ឃើញ​ព្រៃ​លិច​ទឹក​ត្រូវ​បាន​គេ​ឈូស​បំផ្លាញ ពីព្រោះ​វា​អាច​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​ជម្រក​ត្រី​ពង​កូន​នៅ​រដូវ​ទឹក​ឡើង​ឆ្នាំ​នេះ។

បុរស​ដដែល​បាន​បញ្ជាក់​ថា ៖ «ខ្ញុំ​ទៅ​មើល​ទៅ​ឃើញ​ព្រៃ​ឈូស​ឆាយ​ប្រហែល ៤​ហិកតារ​នៅ​ខាង​លិច​ភ្នំ​ក្រោម​វាល​អន្លង់​ត្រែង ប៉ុន្តែ​មិន​ដឹង​ពួក​ណា​ធ្វើ ឃើញ​តែ​គន្លង​ត្រាក់ទ័រ។ កាល​ខ្ញុំ​ឃើញ ថ្ងៃ​ទី​២០ ព្រៃ​ប្រហែល​ជា​ងាប់​បី​ថ្ងៃ​មុន។ ខ្ញុំ​សួរ​គេ​ក៏​គេ​ថា គ្រាន់​តែ​ឃើញ​ដូច​តែ​គ្នា​អ៊ីចុះ​ឯង ប៉ុន្តែ​អត់​ដឹង​អ្នក​ណា​ជា​អ្នក​ឈូស»

ទោះ​យ៉ាង​ណា​មន្ត្រី​ជលផល​បាន​បដិសេធ​ថា ពុំ​មាន​ការ​ប្រើ​គ្រឿង​ចក្រ​ឈូស​បំផ្លាញ​ព្រៃ​លិច​ទឹក​នៅ​តំបន់​ដូច​ការ​អះអាង​ពី​ប្រជា​ពលរដ្ឋ​នោះ​ទេ។

លោក ទឹម សាវុធ នាយ​ខណ្ឌ​រដ្ឋបាល​ជលផល​នៃ​អធិការដ្ឋាន​ជលផល​ខាង​ជើង​បឹង​ទន្លេ​សាប ប្រចាំ​ខេត្ត​សៀមរាប បាន​មាន​ប្រសាសន៍​ថា លោក​ទើប​បាន​ចុះ​ទៅ​ពិនិត្យ​នៅ​កន្លែង​ដែល​មាន​ការ​កាប់​បំផ្លាញ​ព្រៃ​លិច​ទឹក​នោះ ដោយ​មិន​ឃើញ​មាន​ការ​ប្រើ​គ្រឿង​ចក្រ​ឈូស​ឆាយ​​បំផ្លាញ​ទេ ប៉ុន្តែ​វា​ពិត​ជា​មាន​ការ​កាប់​បំផ្លាញ​ព្រៃ​លិច​ទឹក​នៅ​តំបន់​នោះ​ប្រហែល​ជា ២០​ថ្ងៃ​មុន។

លោក ទឹម សាវុធ បាន​មាន​ប្រសាសន៍​ថា វា​គ្រាន់តែ​ជា​ការ​កាប់​ទន្ទ្រាន​ពី​ម្ចាស់​ស្រែ​ដែល​នៅ​ជាប់​នឹង​ព្រៃ​លិច​ទឹក​ប៉ុណ្ណោះ។ ទោះ​យ៉ាង​ណា​លោក​កំពុង​ចាត់​មន្ត្រី​របស់​លោក​ឲ្យ​ស្រាវជ្រាវ​រក​មុខ​ជន​ពាក់ព័ន្ធ ដើម្បី​ធ្វើ​កំណត់​ហេតុ​បញ្ជូន​ទៅ​តុលាការ។

លោក ទឹម សាវុធ បាន​ឲ្យ​ដឹង​ថា ៖ «ខ្ញុំ​បាន​ចុះ​ទៅ​ផ្ទាល់​ជួប​ជាមួយ​មេ​ឃុំ ទៅ​ដល់​ទីតាំង​ហ្នឹង​ទៀត ដើរ​អត់​ចង់​ដល់​ផង ព្រោះ​វា​រអិល​ណាស់ មិន​អាច​មាន​នរណា​ទៅ​ភ្ជួរ​ដី ឬ​ក៏​ទន្ទ្រាន​ដោយ​ប្រើ​ត្រាក់ទ័រ​បាន​ទេ ព្រោះ​ចុះ​អត់​រួច​ទេ។ កន្លង​មក​ធ្លាប់​មាន​ប្រហែល​ជា ២០​ថ្ងៃ​មុន​គ្រាន់​តែ​ជា​ការ​កាប់​ទន្ទ្រាន​របស់​ម្ចាស់​ដី​ដែល​​​ជាប់​នឹង​ព្រៃ​លិច​ទឹក។ យើង​បាន​ទប់ស្កាត់ ហើយ​គ្រាន់​តែ​កាប់​ត្រួស​ៗ​ទេ ប៉ុន្តែ​ឥឡូវ​ដី​ហ្នឹង​វា​បាន​ដុះ​ព្រៃ​ប្រហែល ១​ចង្អុល​ដៃ​ឡើង​វិញ​ហើយ»

មន្ត្រី​ខណ្ឌ​រដ្ឋបាល​ជលផល​បាន​ឲ្យ​ដឹង​ថា នៅ​ខេត្ត​សៀមរាប​មាន​ព្រៃ​លិច​ទឹក​លាត​សន្ធឹង​លើ​ដី​នៅ​តាម​មាត់​បឹង​ទន្លេសាប​ប្រមាណ ១៧.៨៩០​ហិកតារ ដែល​មន្ត្រី​ជលផល​កំពុង​ប្រឹង​ប្រែង​ការពារ​យ៉ាង​ខ្លាំង ដោយ​គ្រាន់តែ​រយៈពេល ៦​ខែ ឆ្នាំ​២០១០​នេះ គេ​បាន​ចាប់​ខ្លួន​មនុស្ស​ចំនួន ២៩​នាក់​បញ្ជូន​ទៅ​តុលាការ ពី​បទ​ចោទ​ប្រកាន់​ថា បាន​កាប់ និង​ដុត​បំផ្លាញ​ព្រៃ​លិច​ទឹក។

លោក ម៉ក់ សិទ្ធិរិទ្ធ នាយក​ប្រតិបត្តិ​អង្គការ​សម្ព័ន្ធ​ភាព ដើម្បី​អភិរក្ស​ធនធាន​ជលផល បាន​មាន​ប្រសាសន៍​ថា ព្រៃ​លិច​ទឹក​គឺ​ជា​ជម្រក​សម្រាប់​ត្រី​ពង​កូន​យ៉ាង​សំខាន់។ លោក​បាន​មាន​ប្រសាសន៍​ទៀត​ថា តាម​ការ​ស្រាវជ្រាវ​ព្រៃ​លិច​ទឹក​នៅ​ជុំវិញ​បឹង​ទន្លេ​សាប​ប្រទេស​កម្ពុជា​មាន​​​ប្រហែល​ជាង ១៩០​គីឡូ​ម៉ែត្រ​ការ៉េ ហើយ​វា​គួរ​ឲ្យ​មាន​ការ​ព្រួយ​បារម្ភ ដោយសារ​ព្រៃ​លិច​ទឹក​ទាំង​នោះ​ធ្លាប់​បាន​ទទួល​រង​ការ​កាប់​បំផ្លាញ​ជា​រៀងរាល់​ឆ្នាំ៕

ព័ត៌មាន (0)
Share
គេហទំព័រ​ទាំងមូល