លោក ចាន់ ធី អ្នកយកព័ត៌មានឲ្យមជ្ឈមណ្ឌលព័ត៌មានដើមអំពិល បានថ្លែងឲ្យដឹងនៅរសៀលថ្ងៃទី៣០ ឧសភា ថា ខ្លួនលោកពុំបានប្រព្រឹត្តអំពើដូចជាការចោទប្រកាន់ក្នុងដីកាកោះហៅនោះទេ។លោកថា ការកោះហៅនេះគឺក្នុងគោលបំណងដើម្បីបំបាក់ស្មារតីអ្នកកាសែតកុំឲ្យទៅយកព័ត៌មានពីសកម្មភាពដឹកឈើខុសច្បាប់របស់ក្រុមឈ្មួញ ដែលមានការឃុបឃិតពីមន្ត្រីមានសមត្ថកិច្ចពុករលួយមួយចំនួនប៉ុណ្ណោះ។
លោក ចាន់ ធី មានប្រសាសន៍បន្តថា ៖ «និយាយរួមខ្ញុំអត់បានដឹងពីរឿងថា អ្នកណាទៅយកលុយពីប្រជាពលរដ្ឋហ្នឹងផង។ អ្នករទេះក៏គេបានអះអាងដែរថា ខ្ញុំមិនបានយកលុយពីគេនោះដែរ ហើយដល់តែអ៊ីចឹងខ្ញុំវាឆ្ងល់ដែរ តើខ្ញុំបានទៅជំរិតទារប្រាក់ពីពេលណា?»។
ចំណែកលោក លី ហួ អ្នកយកព័ត៌មានកាសែតសំឡេងអមតៈ ក៏បានបដិសេធការចោទប្រកាន់ក្នុងដីកាកោះហៅនេះដែរ។
លោកសំណូមពរឲ្យអាជ្ញាធរធ្វើការស្រាវជ្រាវករណីបទល្មើសព្រៃឈើជាជាងចំណាយពេលដើម្បីគាបសង្កត់អ្នកកាសែត ៖ «ខ្ញុំគ្រាន់តែបានថតរូបភាព ហើយនិងបានសួរពួកគាត់ថា តើហេតុអីបានជាគាត់ដឹកឈើចូលមកដល់ទីនេះបាន? ពួកគាត់បានឆ្លើយថា ពួកគាត់បានគិតគូរឲ្យសមត្ថកិច្ចគ្រប់កន្លែងអស់ហើយ ហើយខ្ញុំក៏បានសរសេរជារបាយការណ៍ទុកតែប៉ុណ្ណឹង។ ស្រាប់តែក្រោយមក ខ្ញុំបែរជាឮថា ខ្ញុំបានជំរិតទារប្រាក់ពីប្រជាពលរដ្ឋទៅវិញ»។
ព្រះរាជអាជ្ញាអមសាលាដំបូងខេត្តកំពង់ឆ្នាំង គឺលោក ពេញ វិបុល មានប្រសាសន៍ថា ការកោះហៅអ្នកកាសែតទាំង ៤រូបនៅថ្ងៃនេះ គឺដើម្បីឲ្យពួកគេមកបំភ្លឺចំពោះការចោទប្រកាន់របស់ភាគីដើមបណ្ដឹងតាមនីតិវិធីធម្មតាប៉ុណ្ណោះ។ លោកបន្តថា អ្នកកាសែតទាំង ៤រូបនេះមានពាក់ព័ន្ធនឹងពាក្យបណ្ដឹងរបស់ភាគីដើមបណ្ដឹងឈ្មោះ សុខ ជ្រា និងឈ្មោះ ទិត ស្រឿ ដែលប្ដឹងចោទពីបទជំរិតទារប្រាក់ពីការដឹកឈើដែលគាត់បានដឹកយកទៅប្រើប្រាស់ធ្វើរបងផ្ទះ។
មេធាវីការពារក្ដីឲ្យអ្នកកាសែតទាំង ៤រូប គឺលោក អ៊ិន វណ្ណឈាន មានប្រសាសន៍បន្ទាប់ចេញពីតុលាការថា លោកសង្ឃឹមថា កូនក្ដីលោកនឹងរួចផុតពីការចោទប្រកាន់ ៖ «ឥឡូវគេកំពុងតែសាកសួរបាទ! ព្រោះវាកំពុងស្ថិតក្នុងដំណាក់កាលព្រះរាជអាជ្ញានៅឡើយ វាមិនទាន់ចប់នីតិវិធីនៅឡើយ»។
យ៉ាងណាក៏ដោយ មន្ត្រីសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តកំពង់ឆ្នាំង លោក សំ ច័ន្ទគា មានប្រសាសន៍ថា តាមអង្គហេតុ ការចោទប្រកាន់អ្នកកាសែតពីបទជំរិតទារប្រាក់មិនមានសុពលភាពទេ។ លោកថា ប្រសិនបើគេរកឃើញថា អ្នកកាសែតពិតជាបានទទួលប្រាក់ពីអ្នកដឹកឈើមែននោះ គេគួរតែចោទប្រកាន់ពីបទសមគំនិតក្នុងការប្រព្រឹត្តបទល្មើសព្រៃឈើប៉ុណ្ណោះ។
គួរបញ្ជាក់ថា អ្នកសារព័ត៌មានទាំង ៤រូប ដែលត្រូវបានតុលាការកោះហៅនោះ រួមមាន ១រូបជាអ្នកយកព័ត៌មានកាសែត "សំឡេងអមតៈ" ១រូបជាអ្នកយកព័ត៌មានកាសែត "ដំណឹងថ្ងៃនេះ" ១រូបជាអ្នកយកព័ត៌មានឲ្យមជ្ឈមណ្ឌលព័ត៌មាន "ដើមអំពិល" និង១រូបទៀតជាសមាជិកនៃសមាគមសារព័ត៌មានអ្នកប្រជាធិបតេយ្យ៕