ការស្នើសុំឲ្យកងទ័ពថៃដកចេញពីបរិវេណវត្តកែវសិក្ខាគិរីស្វារៈដោយព្រះមហាក្សត្រថៃនេះ ត្រូវបានលោក មឿង សុន ប្រធានអង្គការមូលនិធិទ្រទ្រង់អរិយធម៌ខ្មែរពន្យល់ថា ៖ «លិខិតរបស់យើងហ្នឹង គឺយើងស្នើហ្នឹងគឺអត់មានពាក់ព័ន្ធនឹងរឿងនយោបាយទេ គឺយើងសុំឲ្យកម្លាំងប្រដាប់អាវុធទាំងសងខាង ទាំងភាគីកម្ពុជាក៏ដូចជាភាគីថៃ ទាំងពីរភាគីហ្នឹងគឺរកការជួបគ្នាដកកងទ័ពជាមួយគ្នា» ។
លោក មឿង សុន បានជួបពិភាក្សានិងសំណេះសំណាលជាមួយលេខាទីមួយនៃស្ថានឯកអគ្គរាជទូតថៃ ប្រមាណជា១ម៉ោងដោយបានលើកយកនូវបញ្ហាអាក្រក់ជាច្រើនដែលបណ្តាលមកពីការដែលទាហានខ្មែរថៃមិនព្រមដកចេញពីបរិវេណវត្តកែវសិក្ខាគិរីស្វារៈហៅវត្តព្រះវិហារ ។
លោកបានមានប្រសាសន៍ទៅដល់ផលប៉ះពាល់នៃបរិស្ថានដែលបង្កឡើងដោយកងទ័ពខែ្មរថៃដែលកំពុងឈរជើងនៅទីសក្ការៈខ្មែរដែលរងការបំពានពីទ័ពថៃ ។
លោក មឿង សុន បានមានប្រសាសន៍ថា ៖ «ទាហានទាំងអស់រាប់រយនាក់នាំគ្នាបត់ជើងបត់ដៃ ចោលសំរាមនៅលើទួល ពីព្រោះវត្តហ្នឹងកសាងនៅលើទួល ហើយនៅក្រោមទួលជំរាលចុះទៅហ្នឹងមានស្រះទឹក អ៊ីចឹងធ្វើឲ្យការបត់ជើងបត់ដៃ និងចោលសំរាមទាំងអស់ហ្នឹង ពេលភ្លៀងមកធ្វើឲ្យរលាយហូរចូលទៅក្នុងទឹកហ្នឹងធ្វើឲ្យទឹកហ្នឹងខូច» ។
គួររំឭកថារដ្ឋមន្រី្តការបរទេសនៃប្រទេសកម្ពុជាបានជួបចរចាជាមួយនឹងរដ្ឋមន្រ្តីការបរទេសថៃនៅឯខេត្តសៀមរាប កាលពីថៃ្ងច័ន្ទ ទី២៨ ខែកក្កដាកន្លងទៅនេះ ដើម្បីដោះស្រាយលើដីជុំវិញតំបន់ប្រាសាទព្រះវិហារដែលភាគីថៃចោទថាជាដីមានជម្លោះ ។
បន្ទាប់ពីកិច្ចចរចានោះរដ្ឋមន្រ្តីក្រសួងការបរទេសកម្ពុជា លោក ហោ ណាំហុង បានឲ្យដឹងពីចំណុចជោគជ័យមួយថា ប្រទេសទាំងពីរយល់ព្រមដកកម្លាំងទ័ពចេញពីទឹកដីដែលកំពុងមានទំនាស់នោះ ។ ប៉ុន្តែរហូតមកដល់ពេលនេះភាគីថៃមិនព្រមដកកម្លាំងចេញពីតំបន់នោះឡើយដោយរង់ចាំការចេញបញ្ជាពីរដ្ឋាភិបាលរបស់ខ្លួន ។
លោក មឿង សុន បានឲ្យដឹងថាវត្តមាននៃព្រះមហាវីរក្សត្រ នរោត្តម សីហនុ គឺមានសារសំខាន់ខ្លាំងណាស់ក្នុងការដោះស្រាយជម្លោះព្រំដែនខ្មែរថៃនៅតំបន់ប្រាសាទព្រះវិហារ ។
លោក មឿង សុន បានបញ្ជាក់ថា ៖ «បើលោកសព្វព្រះទ័យលោកចូលរួមដោះស្រាយជាការល្អដែរ ពីព្រោះលោកបានដឹងរឿងប្រវត្តិសាស្ត្រតាំងពីឆ្នាំ១៩៦២ ដែលប្រាសាទព្រះវិហារឈ្នះក្ដីនៅតុលាការឡាអេនោះ» ។
ប្រធានអង្គការមូលនិធិទ្រទ្រង់អរិយធម៌ខ្មែររូបនេះបានមានប្រសាសន៍បញ្ជាក់ថា កម្ពុជាត្រូវស្វែងរកសហគមន៍អន្តរជាតិឲ្យចូលរួមក្នុងកិច្ចចរចារវាងកម្ពុជានិងថៃ ពីព្រោះថៃគេបានស្វែងរកការជួយពីអន្តរជាតិរួចទៅហើយ តួយ៉ាងគឺថៃបាននាំមន្រ្តីយោធាអមស្ថានទូត១១ ប្រទេសមកពិនិត្យតំបន់ដែលមានជម្លោះ កាលពីព្រឹកថ្ងៃច័ន្ទ ទី២៨ កក្កដា គឺនៅថ្ងៃដែលប្រទេសទាំងពីរបានបើកកិច្ចចរចាជាមួយគ្នា ៕