លោកនាយករដ្ឋមន្រ្តី ហ៊ុន សែន មានប្រសាសន៍យ៉ាងដូច្នេះក្នុងវេទិការាជរដ្ឋាភិបាលនិងផ្នែកឯកជនលើកទី១៤ក្នុងកិច្ចប្រជុំគណៈរដ្ឋមន្រ្តីនៅថ្ងៃសុក្រ ទី២១ ខែវិច្ឆិកា ឆ្នាំ២០០៨។
លោក ហ៊ុន សែន មានប្រសាសន៍ថា តម្លៃប្រេងទីផ្សារអន្តរជាតិ ពេលវិបត្តិអតិផរណាបានឡើងថ្លៃជាង១៤០ដុល្លារក្នុង១បារ៉ែល ដល់មកបច្ចុប្បន្នតម្លៃប្រេងនោះបានចុះថ្លៃក្រោម៥០ដុល្លារក្នុង១បារ៉ែល គួរតែតម្លៃអគ្គិសនីឯកជននៅជនបទបញ្ចុះថ្លៃតាមតម្លៃប្រេងទីផ្សារអន្តរជាតិនោះដែរ។
លោកនាយករដ្ឋមន្ត្រីបានមានប្រសាសន៍ថា ៖ «ព្រោះកាលដែលគាត់ឡើងថ្លៃ គាត់ថាមកពីប្រេង អ៊ីចឹងគាត់ដំឡើងថ្លៃភ្លើង តែឥឡូវប្រេងវាចុះមកវិញ អាភ្លើងគាត់មិនព្រមចុះ»។
មន្រ្តីអគ្គិសនីកម្ពុជា លោក ទី ថានី មានប្រសាសន៍ថា តម្លៃអគ្គិសនីដែលឈ្មួ្មញមិនទាន់បញ្ចុះថ្លៃបានគឺគេប្រើម៉ាស៊ីនភ្លើងចាក់ប្រេងដែលគេមិនបានជាវអគ្គិសនីពីរដ្ឋទេ ប៉ុន្តែស្ថិតក្រោមការត្រួតពិនិត្យតម្លៃពីអាជ្ញាធរអគ្គិសនីនិងក្រសួងឧស្សាហកម្ម រ៉ែ និងថាមពល។
លោក ទី ថានី បានឲ្យដឹងថា ៖ «សំណូមពរឲ្យគេចុះ ហើយយើងនឹងចុះទៅជាបន្តបន្ទាប់ដល់កន្លែងនោះដើម្បីបង្ខំឲ្យគេចុះទៅតាមតម្លៃប្រេងហ្នឹង មិនឲ្យគេធ្វើព្រងើយកន្តើយ។ ឥឡូវយើងអនុវត្តបានប្រហែលជា៣០%ភ្លាមៗហើយ យើងនៅចុះបន្តបន្ទាប់ទៀត»។
ប្រជាជនសង្កាត់ព្រែកលាបត្អូញថា ឈ្មួញលក់អគ្គិសនីនៅទីនោះមិនព្រមចុះថ្លៃឡើយ ៖ «ខ្ញុំនៅក្រុងដែររួចម៉េចក៏ថ្លៃ ថ្លៃទាល់តែមែនទែន ២៥០០ បើប្រៀបធៀបក្រុងវា ៣៥០ ៥០០ ៧៥០..»។
ចំណែកប្រជាជនក្នុងឃុំព្រែកកំពឹស ស្រុកកណ្តាលស្ទឹង ខេត្តកណ្តាល ឲ្យដឹងថា អគ្គិសនីឯកជននៅឃុំនោះបានឡើងថ្លៃតាមប្រេងឥន្ទនៈ ៖ «មុននោះយកតែ១គីឡូវ៉ាត់ ១៥០០ទេ។ ១៥០០ ឡើង ២០០០ ២០០០ហើយ ឡើង២៥០០មកដល់ឥឡូវ»។
រីឯប្រជាជននៅភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម បានអះអាងថា អគ្គិសនីនៅបន្តឡើងថ្លៃបើទោះបីអាជ្ញាធរអគ្គិសនីកំណត់តម្លៃសម្រាប់ខែវិច្ឆិកា ១គីឡូវ៉ាត់ម៉ោងតែ២៣០០រៀលក៏ដោយ ៖ «គេលក់ ២៧០០ ហើយខាងអគ្គិសនីប្រកាសឲ្យលក់ ២៣០០ សម្រាប់ខែវិច្ឆិកា តែខាងសេវាករគាត់អត់ព្រម»។
ប្រជាជននៅផ្សារត្រាំខ្នារ ស្រុកបាទី ខេត្តតាកែវ មានប្រសាសន៍ថា ភ្លើងអគ្គិសនីឯកជននៅតម្លៃថេរ៣៥០០រៀលក្នុង១គីឡូវ៉ា់ត់ម៉ោងបើទោះបីប្រេងសាំងចុះថ្លៃក៏ដោយ។
ចំណែកជំទប់ទី២ ឃុំព្រែកអំបិល ស្រុកស្អាង ខេត្តកណ្តាល លោក រស់ ស៊ុយ អះអាងថា ក្រុមហ៊ុនអានកូលក់ភ្លើង១គីឡូវ៉ាត់ម៉ោងតែ៦៥០រៀលទេ។
សូមជម្រាបថា វិស័យអគ្គិសនីក្នុងប្រទេសកម្ពុជាត្រូវបានវិនិយោគនាំឲ្យតម្លៃលក់ខុសៗគ្នា។ នៅក្នុងទីក្រុងភ្នំពេញតែមួយ តាមសង្កាត់ខ្លះ១គីឡូវ៉ាត់ម៉ោងគេលក់ថ្លៃជាង៣០០រៀលទៅជាង៥០០រៀល។ សង្កាត់ខ្លះជាង៧០០និងជាង៩០០រៀលតាមប្រើតិចច្រើន និងតាមផ្ទះដែលមានមុខរបរលក់ដូរជាដើម។
លោកនាយករដ្ឋមន្រ្តី ហ៊ុនសែន បានបញ្ជាឲ្យមន្រ្តីក្រសួងឧស្សាហកម្ម រ៉ែ និងថាមពល អាជ្ញាធរអគ្គិសនីជាតិនិងអាជ្ញាធរខេត្តបញ្ជាឲ្យឈ្មួញបញ្ចុះថ្លៃអគ្គិសនីនៅជនបទតាមតម្លៃប្រេងដែលចុះថ្លៃនេះឆាប់ៗ៕