ថ្លែងនៅក្នុងសន្និសីទកាសែតមួយនៅក្រសួងព័ត៌មានក្រុងភ្នំពេញ លោក ខៀវ កាញារីទ្ធ រដ្ឋមន្រ្តីក្រសួងព័ត៌មានកម្ពុជា បានមានប្រសាសន៍ប្រាប់អ្នកកាសែតឲ្យដឹងថា លិខិតរបស់លោកនាយករដ្ឋមន្រ្តី ហ៊ុន សែន គឺផ្ញើតាមរយៈស្ថានទូតថៃនៅកម្ពុជា ក្រោយពេលមានការជួបសន្ទនាតាមទូរស័ព្ទរវាងលោកនាយករដ្ឋមន្រ្តីខ្មែរនិងថៃកន្លងទៅ ។
នៅក្នុងខ្លឹមសារលិខិតនោះក្រៅពីសុំឲ្យមានការដកកងទ័ពថៃ នៅមានការយល់ព្រមឲ្យមានការជួបគ្នារវាងមន្រ្តីជាន់ខ្ពស់កម្ពុជា ដែលមានលោក ទៀ បាញ់ ឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិ ជាមួយលោកនាយករដ្ឋមន្រ្តីថៃ សាម៉ាក់ ស៊ុនថរ៉ាវេទ ដែលនឹងធ្វើឡើងនាថ្ងៃទី២១ កក្កដា នៅខែត្រស្រះកែវប្រទេសថៃទៀតផង ។
លោក ខៀវ កាញារីទ្ធ បានមានប្រសាសន៍ថា ៖ «សម្ដេចនាយករដ្ឋមន្ត្រីបានមានប្រសាសន៍មកខ្ញុំដើម្បីប្រាប់ថា លោកទាំងពីរគឺបានជួបគ្នាហើយ ។ ក្នុងការជួបគ្នាហ្នឹងគឺបានឈានដល់ចំណុចពីរ ។ ទី១ ការប្រជុំនឹងសម្រេចធ្វើឡើងនៅថ្ងៃច័ន្ទ ទី២១ ហើយទី២ នាយករដ្ឋមន្ត្រីទាំងពីរបានឯកភាពគ្នាប្រឹងប្រែងអស់ពីសមត្ថភាពដើម្បីធ្វើយ៉ាងណាឲ្យសភាពការណ៍នៅស្ងប់ស្ងៀម» ។
លោករដ្ឋមន្រ្តីក្រសួងព័ត៌មានបានហៅការបង្កើនចំនួនទ័ពរបស់ថៃនៅតំបន់ប្រាសាទព្រះវិហារ ថាជាការខុសច្បាប់ ហើយប្រទេសកម្ពុជាមានសិទ្ធិគ្រប់បែបយ៉ាងទាំងវិធានការច្បាប់និងការទូតដើម្បីការពារប្រទេស ដែលមកទល់ពេលនេះកម្ពុជាចង់ឲ្យមានការដោះស្រាយបញ្ហានោះដោយសន្តិវិធី ។
តាមលោករដ្ឋមន្ត្រីក្រសួងព័ត៌មានបានឲ្យដឹងថា មកទល់ពេលនេះភាគីថៃបានបិទចរាចរណ៍នៅក្នុងទឹកដីថៃចម្ងាយ៨គីឡូម៉ែត្រពីប្រាសាទព្រះវិហារខ្មែរ ហើយការដាក់ទ័ពរបស់ប្រទេសថៃមកកាន់តំបន់ប្រាសាទព្រះវិហារនេះជាការគំរាមកំហែងមកលើបេតិកភណ្ឌពិភពលោកតែម្តង និងជាការអាម៉ាស់មួយរបស់ប្រទេសថៃដែលជាប្រទេសស៊ីវិល័យ មានកិត្តិយសលើឆាកអន្តរជាតិមួយដែរនោះ ។
លោក ខៀវ កាញារីទ្ធ បានបញ្ជាក់ថា ៖ «ដែលយើងបន្ថែមមនុស្សហ្នឹងមិនមែនបន្ថែមអីទេ ពីព្រោះកន្លងមករុញគ្នាចុះឡើងហ្នឹង យើងរុញមិនឲ្យចូល គេរុញចូលមក ប៉ុន្តែអត់មានប្រើកាំភ្លើងទេ រុញតែដៃចុះឡើងទេ ។ ក្រោយមកក៏មិនដឹងដែរ គេដេកទាំងអស់គ្នានៅហ្នឹងទៅ ក្នុងវត្តហ្នឹង ប៉ុន្តែយើងចៀសបានគឺចៀសមិនឲ្យឆ្លងទៀត ។ បើឈានចូលដល់ទី២ បានន័យថាដល់ជណ្ដើរឬដល់កំផែងនេះ គឺខ្ញុំមិនអាចហ៊ានថាបានតើផលវិបាកវាយ៉ាងម៉េចទេ ? ប៉ុន្តែទី២ ថៃនឹងបាត់បង់អស់ភាពស្របច្បាប់របស់ខ្លួន ហើយនិងទី៣ ថៃនឹងដល់ជំហរមួយទៀតដែលថៃគឺអ្នកបំផ្លាញសមាគមប្រជាជាតិអាស៊ីអាគ្នេយ៍ ពីព្រោះលក្ខន្តិកៈបានហាមមិនឲ្យសមាជិកនៃសមាគមនេះប្រើប្រាស់កម្លាំងបាយដើម្បីដោះស្រាយទំនាស់ទេ» ។
លោក ខៀវ កាញារីទ្ធ បានឲ្យដឹងថាបច្ចុប្បន្ននេះកម្ពុជាមានទាហានប្រមាណ៤០០នាក់នៅការពារតំបន់ប្រាសាទព្រះវិហារនោះ ៕