ហោ ណាំងហុង៖ សភាពការណ៍​នៅ​ថៃ​អាច​ប៉ះពាល់​ដល់​ការចរចា​បញ្ហា​ព្រំដែន

លោក ហោ ណាំហុង ជា​ឧបនាយក​រដ្ឋមន្ត្រី​និង​ជា​រដ្ឋមន្រ្តី​ការបរទេស​នៃ​ប្រទេស​កម្ពុជា បាន​មាន​ប្រសាសន៍​នៅ​ថ្ងៃ​ទី​២៨ វិច្ឆិកា ថា សភាពការណ៍​ស្មុគស្មាញ​នៅ​ប្រទេស​ថៃ​បច្ចុប្បន្ន​នេះ​មាន​ផល​ប៉ះពាល់​ដល់​ការចរចា​និង​បោះបង្គោល​ព្រំដែន​រវាង​ប្រទេស​កម្ពុជា​និង​ថៃ​ដែល​គ្រោង​ធ្វើ​នៅ​ខែ​ធ្នូ​ខាង​មុខ​នេះ។
ដោយ កែវ និមល
2008-11-28
អ៊ីម៉ែល
មតិ
Share
បោះពុម្ព
ឧបនាយក​រដ្ឋមន្ត្រី​និង​ជា​រដ្ឋមន្ត្រី​ការបរទេស​ខ្មែរ លោក ហោ ណាំហុង ថ្លែង​ទៅ​កាន់​អ្នក​កាសែត​នៅ​ក្រោយ​ជំនួប​ជាមួយ​សមភាគី​ថៃ​នៅ​ឯ​ក្រសួង​ការបរទេស​កម្ពុជា ក្នុង​ក្រុង​ភ្នំពេញ នា​ថ្ងៃ​ទី​១៣ តុលា ២០០៨។
ឧបនាយក​រដ្ឋមន្ត្រី​និង​ជា​រដ្ឋមន្ត្រី​ការបរទេស​ខ្មែរ លោក ហោ ណាំហុង ថ្លែង​ទៅ​កាន់​អ្នក​កាសែត​នៅ​ក្រោយ​ជំនួប​ជាមួយ​សមភាគី​ថៃ​នៅ​ឯ​ក្រសួង​ការបរទេស​កម្ពុជា ក្នុង​ក្រុង​ភ្នំពេញ នា​ថ្ងៃ​ទី​១៣ តុលា ២០០៨។
AFP Photo

ថ្លែង​នៅ​ព្រលាន​យន្តហោះ​អន្តរជាតិ​ភ្នំពេញ​ក្នុង​ពេល​វិល​ត្រឡប់​មក​ពី​ចូលរួម​កិច្ចប្រជុំ​កំពូល​របស់​ប្រទេស​ទាំង​បី កម្ពុជា វៀតណាម លាវ លើក​ទី​៥ នៅ​ប្រទេស​លាវ ដែល​ចូលរួម​ដោយ​នាយក​រដ្ឋមន្រ្តី​នៃ​ប្រទេស​ទាំង​បី លោក ហោ ណាំហុង បាន​មាន​ប្រសាសន៍​ថា ៖ «ខ្ញុំ​អាច​និយាយ​ថា ជា​ការ​ពិត​ណាស់​សភាពការណ៍​ស្មុគស្មាញ​នៅ​ថៃ​នេះ​នឹង​មាន​ឥទ្ធិពល​អវិជ្ជមាន​ដល់​ការចរចា​រវាង​កម្ពុជា​និង​ថៃ​ដោះស្រាយ​បញ្ហា​បោះ​បង្គោល​ព្រំដែន​នេះ។ លោក​បាន​ចាំ​ហើយ​កាល​ប្រជុំ​នៅ​សៀមរាប​ថ្មីៗ​នេះ យើង​បាន​ឈាន​ដល់​គម្លាត​មួយ​ជាក់ស្ដែង​ហើយ​ទៅ​មុខ។ ខែ​១២​នេះ​ក្រុម​បច្ចេកទេស​ទាំង​ពីរ​នឹង​ទៅ​វាស់វែង​នៅ​ម្ដុំ​ប្រាសាទ​ព្រះវិហារ ដើម្បី​រៀបចំ​បោះ​បង្គោល​ផង ដើម្បី​ដោះ​មីន​ផង ហើយ​ខែ​មករា​នេះ​នឹង​មាន​ការប្រជុំ​គណៈកម្មការ​ចម្រុះ​ព្រំដែន​និង​រដ្ឋមន្ត្រី​ការបរទេស​ទាំង​ពីរ ក៏ប៉ុន្តែ​សភាពការណ៍​នៅ​ថៃ​សព្វ​ថ្ងៃ​នេះ​មិន​ដឹង​សភា​ប្រជុំ​បាន​ឬ​មិន​បាន»

លោក​រដ្ឋមន្រ្តី​ការបរទេស​កម្ពុជា ហោ ណាំហុង បាន​ថ្លែង​ឲ្យ​ដឹង​ទៀត​ថា តាម​ច្បាប់​របស់​ប្រទេស​ថៃ​រាល់​ការប្រជុំ​ទាក់ទង​ជាមួយ​ទឹក​ដី រដ្ឋាភិបាល​ថៃ​ត្រូវ​សុំ​អនុញ្ញាត​ពី​រដ្ឋសភា​ថៃ​ជា​មុន​សិន។

លោក  ហោ ណាំហុង បាន​មាន​ប្រសាសន៍​ថា ៖ «ដូច្នេះ​សភា​ក៏​ប្រជុំ​មិន​បាន ដូច្នេះ​តាម​មាត្រា​១៩០​របស់​ថៃ រាល់​ការ​ទៅ​ប្រជុំ រាល់​ការសម្រេច​អ្វី​ទាំងអស់​ដែល​ទាក់ទង​នឹង​បញ្ហា​ទឹក​ដី​ត្រូវតែ​សុំ​ការអនុញ្ញាត​ជា​មុន​ពី​រដ្ឋសភា​ថៃ ហើយ​ក្រោយ​មក​ត្រូវការ​មាន​ការសម្រេច​អ្វី​ហើយ ត្រូវ​សុំ​ការសម្រេច​របស់​រដ្ឋសភា​ថៃ​ទៀត។ ដូច្នេះ​វា​ច្បាស់​ជា​មាន​បច្ច័យ​អវិជ្ជមាន​នូវ​ការចរចា​លើ​បញ្ហា​ព្រំដែន​នេះ​ជា​មិន​ខាន»

លោក ហោ ណាំហុង បាន​ថ្លែង​ថា គេ​នៅ​មិន​ទាន់​អាច​ប៉ាន់ស្មាន​ថា តើ​សភាពការណ៍​នៅ​ប្រទេស​ថៃ​នេះ​អាច​មាន​សភាព​ធូរ​ស្រាល​នៅ​ពេល​ណា​នៅ​ឡើយ​ទេ។

សូម​ជម្រាប​ជូន​ថា កិច្ច​ចរចា​រវាង​តំណាង​ប្រទេស​កម្ពុជា​ជាមួយ​តំណាង​ប្រទេស​ថៃ​ទាក់ទង​ជាមួយ​ទំនាស់​ខ្សែ​ព្រំដែន​រវាង​ប្រទេស​កម្ពុជា​និង​ថៃ​បាន​កើត​មាន​ឡើង​ក្រោយ​ពី​មាន​កងទ័ព​ថៃ​បាន​លើក​មក​លុកលុយ​ប្រទេស​កម្ពុជា​នៅ​តំបន់​ក្បែរ​ប្រាសាទ​ព្រះវិហារ​និង​តំបន់​មួយចំនួន​ទៀត កាលពី​ថ្ងៃ​ទី​១៥ ខែ​កក្កដា​កន្លង​ទៅ ហើយ​បង្កើត​ឲ្យ​មាន​ការប្រឈម​មុខ​ដាក់​គ្នា និង​កន្លែង​ខ្លះ​មាន​ការប្រយុទ្ធ​គ្នា​រវាង​កងទ័ព​នៃ​ប្រទេស​ទាំង​ពីរ​នៅ​តាម​ព្រំដែន។ ជា​មួយ​នោះ​មាន​ការចរចា​មួយចំនួន​ដែរ តែ​រាល់​ការចរចា​ទាំង​នោះ​មិន​បាន​សម្រេច​ព្រមព្រៀង​គ្នា​ដល់​ការដក​ទ័ព​ទាំង​ស្រុង​ចេញ​ពី​តំបន់​ព្រំដែន​ប្រទេស​ទាំង​ពីរ និង​ធ្វើ​ឲ្យ​សភាពការណ៍​វិល​ត្រឡប់​រក​ភាព​ធូរ​ស្រាល​ប្រក្រតី​ដូច​កាល​មុន​ថ្ងៃ​ទី​១៥ កក្កដា​នៅ​ឡើយ​ទេ។

កិច្ច​ចរចា​ទាំង​នោះ​មាន​ភាព​រអាក់​រអួល​ដោយ​មាន​ពេល​ខ្លះ​តំណាង​ប្រទេស​ថៃ​បាន​លុប​ចោល​ការចូលរួម​ដោយសារ​សភាពការណ៍​នយោបាយ​នៅ​ប្រទេស​ថៃ​មាន​ភាព​ចលាចល៕

ព័ត៌មាន (0)
Share
គេហទំព័រ​ទាំងមូល