អាជ្ញាធរហាមមិនឲ្យបញ្ចាំងខ្សែភាពយន្តនិយាយអំពីការស្លាប់របស់ ជា វិជ្ជា
2010.04.29
២២-មករា-២០១០: ការប្រារព្ធខួប៦ឆ្នាំនៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករ នៅក្នុងរាជធានីភ្នំពេញ
ការមិនអនុញ្ញាតរបស់សាលារាជធានីភ្នំពេញ មិនឱ្យដាក់បញ្ចាំងខ្សែវីដេអូ រឿង "តើនរណាជាអ្នកសម្លាប់ ជា វិជ្ជា" ត្រូវបានធ្វើឡើងក្រោយការបញ្ចប់កិច្ចប្រជុំមួយ រវាងមន្ត្រីអាជ្ញាធររាជធានីភ្នំពេញ និងមន្ត្រីសហភាពសហជីពកម្ពុជា កាលពីព្រឹកថ្ងៃព្រហស្បតិ៍ ទី២៩ ខែមេសា ឆ្នាំ២០១០។
វិទ្យុអាស៊ីសេរីបានទាក់ទងតាមទូរស័ព្ទទៅនាយរងខុទ្ទកាល័យសាលារាជធានីភ្នំពេញ គឺលោក កើត ឆែ ដែលជាប្រធានកិច្ចប្រជុំ នៅព្រឹកថ្ងៃ ទី២៩ ខែមេសា ដើម្បីសុំសេចក្ដីអត្ថាធិប្បាយជុំវិញការមិនអនុញ្ញាតឱ្យបញ្ចាំងខ្សែវីដេអូ រឿង "តើនរណាជាអ្នកសម្លាប់ ជា វិជ្ជា" នេះ ក៏ប៉ុន្តែ ដោយសារលោករវល់ប្រជុំ និងមិនមានកំណត់ហេតុក្នុងដៃ លោកថ្លែងថា ៖ «បងមើលកំណត់ហេតុហ្នឹងទៅ ព្រោះប្រជុំយើងចែកកំណត់ហេតុផ្លូវការ។ កំណត់ហេតុហ្នឹងលោក រ៉ុង ឈុន ប្រជុំក្នុងហ្នឹង គាត់មានសិទ្ធិនិយាយគ្រប់គ្រាន់ទាំងអស់»។
ដូចគ្នានឹងកំណត់ហេតុនៃកិច្ចប្រជុំដែរ នៅក្នុងលិខិតឆ្លើយតបមួយ ទៅសហភាពសហជីពកម្ពុជា ដែលចុះហត្ថលេខាដោយអភិបាលរាជធានីភ្នំពេញ លោក កែប ជុតិមា បានសរសេរបញ្ចប់សេចក្ដីថា ចំពោះការបញ្ចាំងខ្សែវីដេអូ តើនរណាសម្លាប់ ជា វិជ្ជា សាលារាជធានីមិនអនុញ្ញាតជូនឡើយ ដោយលោកលើកហេតុផលថា ពីព្រោះខ្សែវីដេអូនេះ ពុំទាន់ទទួលបានទិដ្ឋាការអនុញ្ញាតពីក្រសួងជំនាញពាក់ព័ន្ធ។
វិទ្យុអាស៊ីសេរីមិនអាចទាក់ទងសុំសេចក្ដីអត្ថាធិប្បាយ ពីមន្ត្រីក្រសួងមហាផ្ទៃបានទេ នៅល្ងាចថ្ងៃទី២៩ ខែមេសា ឆ្នាំ២០១០។
ក្រោយការហាមឃាត់គម្រោងខ្សែវីដេអូនេះ ប្រធានសហភាពសហជីពកម្ពុជា លោក រ៉ុង ឈុន បានឱ្យដឹងថា លោកនឹងរក្សាគម្រោងនេះ ដោយលោកមានប្រសាសន៍បន្ថែមដូច្នេះ ៖ «ក្នុងនាមសហភាពសហជីពកម្ពុជា យើងធ្វើការតស៊ូមតិធ្វើយ៉ាងណា ដើម្បីឱ្យបានបញ្ចាំងវីដេអូ ឱ្យប្រជាពលរដ្ឋ គ្រូបង្រៀន កម្មករ បានទស្សនា ហើយវាជាការជំរុញឱ្យអាជ្ញាធរ ត្រូវតែបើកការស៊ើបអង្កេតជាបន្ទាន់ ទាក់ទងទៅនឹងឃាតកម្មលើមេដឹកនាំសហជីព លោក ជា វិជ្ជា»។
លោក រ៉ុង ឈុន បានឱ្យដឹងថា ខ្សែវីដេអូ រឿង "តើនរណាជាអ្នកសម្លាប់ ជា វិជ្ជា?” មានរយៈពេលមួយម៉ោង ដែលរំឭកពីព្រឹត្តិការណ៍ បាញ់សម្លាប់អតីតប្រធានសហជីពកម្មករ នៃព្រះរាជាណាចក្រកម្ពុជា លោក ជា វិជ្ជា កាលពីខែមករា ឆ្នាំ២០០៤៕
អត្ថបទពេញនិយម
RFA
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- សិស្សជាប់បាក់ឌុបមួយចំនួន មិនទទួលស្គាល់លទ្ធផលប្រឡង
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- សមត្ថកិច្ចចាប់ខ្លួនពលរដ្ឋម្នាក់ដែលរិះគន់រឿងគ្រឿងញៀននិងលំហូរជនបរទេសខុសច្បាប់
- សហព័ន្ធខ្មែរក្រោមទាមទារឱ្យវៀតណាមឈប់ប្រើហិង្សាលើព្រះសង្ឃនិងពលរដ្ឋខ្មែរក្រោម