សិស្សស្រីដែលទទួលបាននិទ្ទេស អា (A) តែម្នាក់គត់ក្នុងចំណោមបេក្ខជនជាង ៨ម៉ឺននាក់នៅទូទាំងប្រទេសនៃសម័យប្រឡងសញ្ញាបត្រទុតិយភូមិឆ្នាំ២០១០ គឺកញ្ញា តោ គឹមស៊ី រួមដំណើរដោយឪពុក និងម្ដាយរបស់កញ្ញា បានចាកចេញពីកម្ពុជា កាលពីថ្ងៃទី១៣ ខែសីហា ឆ្នាំ២០១១ តាមជើងយន្តហោះមួយនៅម៉ោង ១០ព្រឹក ដើម្បីទៅបន្តការសិក្សាមហាវិទ្យាល័យមួយឈ្មោះ មែនហ៊ែតថឹន (Manhattan College) នារដ្ឋញូវយ៉ក សហរដ្ឋអាមេរិក។
ក្នុងវ័យ ១៩ ឆ្នាំ កញ្ញា តោ គឹមស៊ី បានប្ដេជ្ញាយកជ័យជម្នះក្នុងការសិក្សា ហើយនឹងនាំយកនូវធនធានចំណេះដឹង មកចូលរួមអភិវឌ្ឍន៍មាតុប្រទេសរបស់នាងឲ្យខាងតែបាន ៖ «សេចក្ដីសង្ឃឹមទី ១ គឺខ្ញុំសង្ឃឹមថានឹងបានបណ្ឌិតផ្នែកគណិតវិទ្យា ហើយយកមកវិញដើម្បីជួយបណ្ដុះធនធានមនុស្សផ្នែកគណិតវិទ្យានេះតទៅទៀត»។
កញ្ញា តោ គឹមស៊ី អះអាងថា លទ្ធផលដែលនាងទទួលបានរហូតមកដល់ពេលនេះ គឺដោយសារការព្យាយាម ហើយថា ការលើកទឹកចិត្តនិងបរិយាកាសគ្រួសារជាកត្តាសំខាន់សម្រាប់អ្នកសិក្សា ៖ «ជារៀងរាល់ឆ្នាំអ៊ីចឹង នៅសាលាគេតែងតែចែកអំណោយដល់សិស្សពូកែពីលេខ ១ ដល់លេខ ៣ ហើយនិងសិស្សពូកែតាមមុខវិជ្ជា ហើយខ្ញុំគិតថា វាគឺជាកត្តាមួយដែលជំរុញឲ្យយើងបានជោគជ័យ ហើយនៅពេលដែលយើងឡើងទៅទទួលរង្វាន់ហ្នឹង គឺជាមុខមាត់មួយដែរ ធ្វើឲ្យគេសរសើរ ឲ្យសិស្សផ្សេងៗ ទៀតយកគំរូតាម»។
សកលវិទ្យាធិការនៃសាកលវិទ្យាល័យខេមរៈ និងជាអ្នកជួយជ្រោមជ្រែងស្វះស្វែងរកអាហារូបករណ៍ឲ្យកញ្ញា តោ គឹមស៊ី លោកបណ្ឌិត សុខ ទូច ថ្លែងសរសើរកញ្ញា តោ គឹមស៊ី ទាំងផ្នែកការសិក្សា ទាំងផ្នែកចរិយាសម្បត្តិ ៖ «នាងរៀនថ្នាក់ទី១២ ហើយទៅរៀនម៉ាស្ទ័រ (ថ្នាក់អនុបណ្ឌិត) ហើយបានពិន្ទុល្អជាងអ្នករៀនម៉ាស្ទ័រ ហើយគ្រូគេមកប្រាប់ខ្ញុំ ទាំងគ្រូបារាំង ទាំងគ្រូអាល្លឺម៉ង់ ទាំងគ្រូអាមេរិក គេមកប្រាប់ខ្ញុំ»។
លោកបណ្ឌិត សុខ ទូច មានប្រសាសន៍បន្ថែមថា ការដែលកញ្ញា តោ គឺមស៊ី ទទួលបានអាហារូបករណ៍នេះ គឺដោយសារតែលទ្ធផលលេចធ្លោរបស់នាងក្នុងការសិក្សាគណិតវិទ្យាជាមួយនិស្សិតថ្នាក់អនុបណ្ឌិតនៅសាកលវិទ្យាល័យភូមិន្ទភ្នំពេញ ដែលធ្វើឲ្យសាស្ត្រាចារ្យមួយរូបនៃមហាវិទ្យាល័យ មែនហ៊ែតថឹន ចាប់ចិត្ត។ទន្ទឹមនឹងនេះដែរ លោកបណ្ឌិត សុខ ទូច សម្ដែងសេចក្ដីសោកស្ដាយ ដោយលោកខកខានមិនបានជួយសិស្សពូកែផ្នែកគណិតវិទ្យា ៦ នាក់ឲ្យបានទៅចូលរួមប្រឡងសិស្សពូកែកម្រិតពិភពលោកប្រចាំឆ្នាំ២០១១ កាលពីខែកក្កដា។
បងស្រីរបស់កញ្ញា តោ គឹមស៊ី និងជាឱសថការីនៃវិជ្ជាស្ថានប៉ាស្ទ័រកម្ពុជា កញ្ញា តោ ពើទី បានឲ្យដឹងថា កញ្ញា តោ គឹមស៊ី មានចំណេះដឹងផ្នែកភាសាគ្រប់គ្រាន់ សម្រាប់ការសិក្សានៅបរទេស ព្រោះនាងបានបញ្ចប់ការសិក្សាផ្នែកភាសាអង់គ្លេសនៅមជ្ឈមណ្ឌលអូស្ត្រាលីសម្រាប់ការអប់រំ (ACE) ៖ «នៅពេលដែលវាជាប់បាក់ឌុបហ្នឹង វាចប់ Level 12 (កម្រិតទី១២) ហ្នឹង ហើយទៅដល់វាប្រឡង អាយអេលស៍ [IELTS] (កម្មវិធីវាស់ស្ទង់ចំណេះដឹងភាសាអង់គ្លេស) ប្រឡង អាយអេលស៍ចំពោះភាសាអង់គ្លេស វាបានប្រឡង អាយអេលស៍ បាន ៦,៥»។
បងប្រុសរបស់ កញ្ញា តោ គឹមស៊ី ដែលជាអាជីវករម្នាក់ លោក តោ សីហា ថ្លែងថា ប្អូនស្រីរបស់លោករៀនពូកែតាំងតែពីតូច ហើយលោកធ្លាប់ផ្ដល់រង្វាន់លើកទឹកចិត្តខ្លះៗ មានលុយកាក់និងដំណើរកម្សាន្តជាដើម នៅពេលដែលនាងទទួលបានលទ្ធផលល្អ ៖ «តាំងពី (ថ្នាក់) ទី១ មកហើយ គឺលេខ ១ លេខ ២ លេខ ១ លេខ ២ រហូត អត់ដែលក្រោមលេខហ្នឹងទេ!»។
បេក្ខនារីដែលទទួលបាននិទ្ទេសអា តែម្នាក់លើលទ្ធផលរួមក្នុងការប្រឡងសញ្ញាបត្រទុតិយភូមិឆ្នាំ២០១០ ហើយដោយឡែកទទួលបាននិទ្ទេសអា លើមុខវិជ្ជា ៣ គឺគណិតវិទ្យា គីមីវិទ្យា និងជីវវិទ្យា។ កញ្ញា តោ គឹមស៊ី បានឲ្យដឹងពីមហិច្ឆតារបស់កញ្ញាថា កញ្ញាចង់ក្លាយជាបណ្ឌិតផ្នែកគណិតវិទ្យា៕