លោក ហោ ណាំហុង៖ កម្ពុជាចង់បានអ្នកសង្កេតការណ៍ឥណ្ឌូណេស៊ីមកឆាប់ៗ

ភាគីកម្ពុជា និងថៃ បានសំដែងការគាំទ្ររៀងៗ ខ្លួន ចំពោះសេចក្ដីសម្រេចរបស់តុលាការយុត្តិធម៌អន្តរជាតិថ្មីៗ នេះ។ ប៉ុន្តែ បញ្ហាដែលកម្ពុជាចង់ឲ្យមានការដោះស្រាយជាបន្ទាន់ក្រោយពីការសម្រេចនោះ គឺអ្នកសង្កេតការណ៍ ពីប្រទេសឥណ្ឌូណេស៊ី មកត្រួតពិនិត្យលើបទឈប់បាញ់រវាងកម្ពុជា និងថៃ។

ដោយ សុខ សេរី
2011-07-20

២០-កក្កដា-២០១១ ៖ លោក ហោ ណាំហុង រដ្ឋមន្ត្រីក្រសួងការបរទេស និងជាឧបនាយករដ្ឋមន្ត្រីកម្ពុជា ថ្លែងទៅកាន់អ្នកកាសែត នៅអាកាសយានដ្ឋានអន្តរជាតិភ្នំពេញ ពេលវិលត្រឡប់ពីតុលាការយុត្តិធម៌អន្តរជាតិក្រុងឡាអេ។

RFA/Sok Serey

ប្រមុខការទូតកម្ពុជា លោក ហោ ណាំហុង នៅថ្ងៃទី២០ ខែកក្កដា ឆ្នាំ ២០១១ បានបញ្ជាក់ថា លោកកំពុងតែរង់ចាំចម្លើយពីរដ្ឋមន្ត្រីការបរទេសឥណ្ឌូណេស៊ី ជាប្រធានអាស៊ាន ក្នុងការបញ្ជូនអ្នកសង្កេតការណ៍លើបទឈប់បាញ់ មកឈរជើងនៅតំបន់ប្រាសាទព្រះវិហារ ក្រោយពីការសម្រេចរបស់តុលាការយុត្តិធម៌អន្តរជាតិក្រុងឡាអេ (Haque) ប្រទេសហុល្លង់ (Netherland) កាលពីថ្ងៃទី ១៨ ខែកក្កដា ឆ្នាំ ២០១១នេះ។

រដ្ឋមន្ត្រីក្រសួងការបរទេសកម្ពុជា និងជាឧបនាយករដ្ឋមន្ត្រី លោក ហោ ណាំហុង មានប្រសាសន៍ នៅឯអាកាសយានដ្ឋានអន្តរជាតិ ភ្នំពេញ នៅថ្ងៃទី ២០ ខែកក្កដាថា លោកបានសន្ទនាតាមទូរស័ព្ទ ជាមួយរដ្ឋមន្ត្រីក្រសួងការបរទេស ឥណ្ឌូណេស៊ី លោក ម៉ាទី ណាតាឡេហ្គាវ៉ា (Narty Natalegawa) កាលថ្ងៃទី ១៩ ខែកក្កដាថ្មីៗ នេះ។

លោកបន្តថា ៖ «អត់មានចាំបាច់ការកិកកុករបស់ថៃទៀតទេ។ ខ្ញុំបានស្នើឲ្យចេញសេចក្ដីថ្លែងការណ៍របស់ប្រធានអាស៊ាន គឺរដ្ឋមន្ត្រីការបរទេសអាស៊ាននេះមួយ។ ដោយឡែកនិយាយអំពីបញ្ហានេះ ឲ្យអ្នកសង្កេតការណ៍ឥណ្ឌូណេស៊ីមកឲ្យបានឆាប់ ស្របតាមការសម្រេចរបស់តុលាការយុត្តិធម៌អន្តរជាតិ»។

លោក ហោ ណាំហុង បានពណ៌នានៅក្នុងសន្និសីទកាសែតថា សេចក្ដីសម្រេចរបស់តុលាការយុត្តិធម៌អន្តរជាតិ ក្រុង ឡាអេ ប្រទេសហុល្លង់ថ្មីៗ នេះ គឺស្របតាមបំណងរបស់កម្ពុជាកន្លងមក ៖ «តុលាការ បានចេញសេចក្ដីសម្រេចនេះ ឃើញថាឆ្លើយតបនឹងសំណូមពរទាំងពីររបស់យើង គឺមានការឈប់បាញ់ជាអចិន្ត្រៃយ៍។ ខ្ញុំយល់ថា ជាអចិន្ត្រៃយ៍ហើយ»។

គេនៅមិនទាន់បានទទួលការឆ្លើយតបជាផ្លូវការនៅឡើយទេ ពីរដ្ឋមន្ត្រីក្រសួងការបរទេសឥណ្ឌូណេស៊ី ជុំវិញការស្នើសុំរបស់លោក ហោ ណាំហុង ថ្មីៗ នេះ។ ប៉ុន្តែ កាសែតថៃឈ្មោះ បាងកកប៉ុស្តិ៍ (Bangkok Post) បានដកស្រង់សំដីរបស់អគ្គលេខាធិការ អាស៊ាន លោក សូរិន ពិតស៊ូវណ្ណ (Surin Pitsuwan) ដែលមានប្រសាសន៍ថា លោក ម៉ាទី ណាតាឡេហ្គាវ៉ា កំពុងតែរង់ចាំសញ្ញាច្បាស់លាស់ពីភាគីកម្ពុជា និងថៃ ដែលគាត់អាចជួយសម្របសម្រួលបាន ដើម្បីធានាសន្តិភាព និងសន្តិសុខនៅតាមព្រំដែនកម្ពុជា និងថៃ។

លោកបណ្ឌិតសភាចារ្យ រស់ ចន្ត្រាបុត្រ និងជាសាស្ត្រាចារ្យវិទ្យាសាស្ត្រនយោបាយ និងប្រវត្តិសាស្ត្រនៅកម្ពុជា មានប្រសាសន៍ថា ប្រទេសឥណ្ឌូណេស៊ី ជាប្រធានអាស៊ាន គឺមានកាតព្វកិច្ចអនុវត្តន៍តាមការសម្រេចរបស់ស្ថាប័នអន្តរជាតិកំពូល ៖ «ដូច្នេះ ក្នុងគោលដៅទាំងអស់នេះ យើងឃើញថា ប្រទេសឥណ្ឌូណេស៊ី ដែលជាប្រធានបច្ចុប្បន្នរបស់សមាគមអាស៊ាននេះ គឺថាទទួលភារកិច្ច ២។ មួយពីក្រុមប្រឹក្សាសន្តិសុខអង្គការសហប្រជាជាតិ ហើយមួយថ្មីនេះទៀត តុលាការយុត្តិធម៌ទីក្រុងឡាអេ។ ដូច្នេះ នៅក្នុងបញ្ហានេះ គឺឥណ្ឌូណេស៊ី ដែលជាប្រធានអាស៊ានត្រូវតែចាត់វិធានការជាបន្ទាន់»។

កន្លងមកប្រទេសឥណ្ឌូណេស៊ី ជាប្រធានអាស៊ាន បានយល់ព្រមជញ្ជួនអ្នកសង្កេតការណ៍លើបទឈប់បាញ់ចំនួន ៣០ នាក់ គឺ ១៥ នៅកម្ពុជា និង ១៥ នាក់ទៀត នៅភាគីខាងថៃ។ ប៉ុន្តែ គម្រោងការនោះ បានផ្អាកទៅវិញ ដោយសារលក្ខខណ្ឌរបស់ថៃ។

ភាគីកម្ពុជាកន្លងមក បានស្នើសុំឲ្យប្រទេសឥណ្ឌូណេស៊ី បញ្ជូនអ្នកសង្កេតការណ៍លើបទឈប់បាញ់មកឈរជើងនៅកន្លែងចំនួន ៣ គឺទី១ តំបន់ចាក់ច្រែង ទី២ នៅតំបន់តាសឹម និងទី៣ នៅតំបន់ ៥ មករា ក្បែរតំបន់ប្រសាទព្រះវិហារ៕