មន្ត្រីសមាគមគ្រូបង្រៀនកម្ពុជាឯករាជ្យ បានឲ្យដឹងថា សម័យប្រឡងសញ្ញាបត្រប្រឡងបាក់ឌុប ដែលចាប់ផ្ដើមពីថ្ងៃទី២៥ និងបញ្ចប់នៅព្រឹកថ្ងៃទី២៧ ខែកក្កដា ឆ្នាំ២០១១ បានកើតមានអំពើពុករលួយបង្កដោយថ្នាក់ដឹកនាំតាមមណ្ឌល មេប្រយោគ ឬអនុរក្សតាមបន្ទប់ប្រឡងនីមួយៗស្ទើរទូទាំងប្រទេស។
លោក ម៉ៃ ភ័ក្រ្តា សមាជិកសមាគមគ្រូបង្រៀនកម្ពុជាឯករាជ្យ មានប្រសាសន៍នៅរសៀលថ្ងៃពុធ ទី២៧ ខែកក្កដា ថា សម័យប្រឡងសញ្ញាបត្របាក់ឌុប ឆ្នាំនេះ បានកើតមានអំពើពុករលួយ និងភាពអនាធិបតេយ្យនៅក្នុងមណ្ឌល ឬបន្ទប់ប្រឡងជាបណ្ដាឆ្នាំកន្លងទៅ ព្រោះប្រធានមណ្ឌល មេប្រយោគ ឬអនុរក្ស បានតម្រូវឲ្យសិស្សរៃលុយបង់ឲ្យគ្រូក្នុងម្នាក់ចាប់ពី ១ម៉ឺនរៀល ទៅ ៥ម៉ឺនរៀលក្នុងវិញ្ញាសាមួយមុខ ជាថ្នូរឲ្យសិស្សបើកចម្លងចម្លើយវិញ្ញាសា។
លោក ម៉ៃ ភ័ក្រ្តា ឲ្យដឹងដូច្នេះ ៖ «ប្រឡងបាក់ឌុបឆ្នាំនេះអនុរក្សដែលនៅក្នុងបន្ទប់ប្រឡងគាត់ប្រមូលថវិកាពីបេក្ខជនដែលទៅប្រឡងមានកម្រិតខ្ពស់ជាងបណ្ដាឆ្នាំកន្លងៗទៅ គឺម៉ោងគណិតវិទ្យា គីមីវិទ្យា រូបវិទ្យា ជីវវិទ្យា និងផែនដីវិទ្យាជាដើម គឺមានចន្លោះពី ១ម៉ឺន ទៅ ៣ម៉ឺនរៀលក្នុងសិស្សម្នាក់»។
ចំណែកសិស្សានុសិស្សជាបេក្ខជនប្រឡង ក៏បានទទួលស្គាល់ថា គ្រូទទួលបន្ទុកប្រចាំបន្ទប់ប្រឡងពិតជាបានតម្រូវឲ្យពួកគេបង់លុយចាប់ពី ១ម៉ឺនរៀល ទៅ ៥ម៉ឺនរៀល ទៅតាមវិញ្ញាសានីមួយៗ ប៉ុន្តែក៏មានពេលខ្លះសិស្សបានស្ម័គ្រចិត្តរៃលុយឲ្យគ្រូដោយខ្លួនឯងជាថ្នូរបានបើកមើលចម្លើយលើវិញ្ញាសាខ្លះ។
ស្រដៀងគ្នាដែរ លោក ធូ ហៀង រស់នៅខេត្តកំពង់ស្ពឺ បានថ្លែងថា ប្រឡងបាក់ឌុបឆ្នាំនេះពិតជាមានអំពើពុករលួយ និងភាពអនាធិបតេយ្យចេញមុខពេញទីតែម្ដងនៅមូលដ្ឋានរបស់លោក។ លោកបន្តថា នៅវិទ្យាល័យឌីប៉ុក ក្តីល្វា មានទីតាំងក្នុងស្រុកសំរោងទង ខេត្តកំពង់ស្ពឺ គ្រូបង្រៀនមួយចំនួនបានតម្រូវឲ្យសិស្សបង់លុយជូនពួកគេចាប់ពី ១ម៉ឺនឡើងទៅទើបមានសិស្សចូលប្រឡង។
ពលរដ្ឋរូបនេះបានអំពាវនាវទៅថ្នាក់ដឹកនាំក្រសួងអប់រំ ត្រូវតែចាត់វិធានការលុយបំបាត់អំពើពុករលួយកំពុងកើតមានក្នុងវិស័យអប់រំឲ្យបានទាន់ពេល បើពុំដូច្នេះទេ វិស័យអប់រំនៅកម្ពុជា នឹងមិនមានគុណភាពនោះទេ។
លោក ធូ ហៀង រស់នៅខេត្តកំពង់ស្ពឺ បន្ថែម ៖ «គ្រូខ្លះគាត់គំរាមសិស្សថា បើសិនជាគ្មានលុយពី ១ម៉ឺន៥ពាន់រៀល ទៅ ៥ម៉ឺនរៀលទេ គេមិនអនុញ្ញាតឲ្យចូលប្រឡងទេ។ កូនខ្ញុំបានឲ្យលុយគេអស់ ២ម៉ឺនទៅបានចូលប្រឡង»។
ដោយឡែកមណ្ឌលប្រឡងនៅវិទ្យាល័យពងទឹក ក្នុងខណ្ឌដង្កោ រាជធានីភ្នំពេញ ក៏មានសេចក្ដីរាយការណ៍ពីប្រជាពលរដ្ឋមកថា អំពើពុករលួយផ្ដើមដោយថ្នាក់ដឹកនាំមណ្ឌលប្រឡងដើរប្រមូលលុយពីសិស្សក៏បានកើតមានយ៉ាងអនាធិបតេយ្យផងដែរ។
ពលរដ្ឋមិនបញ្ចេញឈ្មោះម្នាក់បានអះអាងដូច្នេះ ៖ «វិទ្យាល័យពងទឹកហ្នឹង គឺអនុប្រធានមណ្ឌល បានដើរយកលុយបេក្ខជនប្រឡងក្នុង ១បន្ទប់ ធ្វើម៉េចឲ្យបានពី ១ពាន់ដុល្លារ ទៅ ១.៥០០ដុល្លារអាមេរិក»។
ទោះយ៉ាងណា វិទ្យុអាស៊ីសេរីមិនអាចទាក់ទងថ្នាក់ដឹកនាំក្រសួងអប់រំ និងប្រធានមន្ទីរអប់រំរាជធានីភ្នំពេញ ដើម្បីបំភ្លឺជុំវិញការចោទប្រកាន់លើអំពើពុករលួយក្នុងសម័យប្រឡងបាក់ឌុបឆ្នាំនេះបានទេតាមទូរស័ព្ទ ព្រោះមន្ត្រីទាំងនោះខ្លះមិនលើកទូរស័ព្ទ និងមានមន្ត្រីខ្លះទៀតបានបដិសេធមិនធ្វើអត្ថាធិប្បាយ។
កន្លងមកមន្ត្រីក្រសួងអប់រំ បានឲ្យដឹងថា សម័យប្រឡងបាក់ឌុប ឆ្នាំ២០១១នេះ ក្រសួងបានបែងចែកជាពីរ គឺថ្នាក់វិទ្យាសាស្ត្រពិត និងថ្នាក់វិទ្យាសាស្ត្រសង្គមពិត។ ការបែងចែកជាពីរផ្នែកនេះ បានធ្វើឡើងសម្រាប់សិស្សថ្នាក់ទី១២ ចាប់តាំងពីផ្ដើមការសិក្សា តាំងពីដើមឆ្នាំមកម្ល៉េះ។
យ៉ាងណាក៏ដោយ សម័យប្រឡងបាក់ឌុប ឆ្នាំ២០១១ ដែលបានចាប់ពីថ្ងៃទី២៥ បញ្ចប់នៅព្រឹកថ្ងៃពុធ ទី២៧ ខែកក្កដា ត្រូវបានសមាគមគ្រូបង្រៀន និងអាណាព្យាបាលសិស្ស បានចោទប្រកាន់ថា កើតមានអំពើពុករលួយ និងភាពមិនប្រក្រតីជាច្រើន ពិសេសនៅតាមមណ្ឌលប្រឡងក្នុងរាជធានីភ្នំពេញ។
ភាពមិនប្រក្រតីទាំងនោះរួមមាន ការលក់វិញ្ញាសា សកម្មភាពសិស្សប្រមូលលុយឲ្យគ្រូ មេប្រយោគ អនុរក្ស ឬប្រធានមណ្ឌលតម្រូវឲ្យគ្រូតាមបន្ទប់ប្រមូលលុយពីសិស្ស ជាថ្នូរឲ្យសិស្សជាបេក្ខជនប្រឡង ការបើកចម្លងប្រ៊ឺយ៉ុងដោយសេរី និងមានបេក្ខជនប្រឡងខ្លះអាចប្រើទូរស័ព្ទដើម្បីចម្លងចម្លើយពីក្រៅមណ្ឌលប្រឡងជាដើម៕