មន្ត្រីអង្គការសមាគមខ្មែរដើម្បីអភិវឌ្ឍន៍ជនបទកម្ពុជា ហៅកាត់ថា KAFDOC ដែលបានបើកវគ្គបណ្តុះបណ្តាលដល់កសិករនៅឃុំកន្ទួត ស្រុកក្រចេះ កាលពីថ្ងៃសុក្រសប្តាហ៍មុននេះ បានឲ្យដឹងអំពីគោលដៅសំខាន់របស់អង្គការ KAFDOC គឺធ្វើឲ្យប្រជាពលរដ្ឋមានការយល់ដឹងអំពីគ្រោះថ្នាក់នៃការបរិភោគបន្លែដែលប្រើជីគីមី ហើយងាកមកដាំបន្លែតាមបែបធម្មជាតិជាលក្ខណៈគ្រួសារវិញ។
មន្ត្រីអង្គការសមាគមខ្មែរដើម្បីអភិវឌ្ឍន៍ជនបទកម្ពុជាបានឲ្យដឹងថា ៖ «គោលដៅរបស់ KAFDOC គឺយើងអត់ឲ្យមានគ្រួសារណាមួយដែលប្រើប្រាស់ជីគីមី ថ្នាំគីមីទេ ហើយបង្វែរទិសដៅហ្នឹងមកប្រើថ្នាំធម្មជាតិសម្លាប់សត្វល្អិត ទំនោរទៅជីកំប៉ុសវិញ។ ១១ឃុំ គោលដៅរបស់ KAFDOCហ្នឹង គឺយើងផ្ដោតសំខាន់ទៅលើការលុបបំបាត់ថ្នាំនិងជីគីមី»។
បុរសកសិករម្នាក់ដែលចូលរួមក្នុងវគ្គសិក្សានោះបានប្រាប់វិទ្យុអាស៊ីសេរីអំពីផលប្រយោជន៍នៃការទទួលទានបន្លែដាំដោយគ្មានប្រើជីគីមីយ៉ាងដូច្នេះ ៖ «យល់ថា ទៅវិញអាចរៀបចំតាមការសិក្សាថ្ងៃហ្នឹងដែរ។ យើងស៊ីបន្លែដាក់ជីធម្មជាតិយើងឥឡូវនេះក៏វាបានធូរ វាមិនសូវមានឈឺគ្រុនអីនៅក្នុងពោះវៀនអីអ៊ីចឹងដែរ។ អ៊ីចឹងហើយបានខំមករៀននេះ ឲ្យបានចេះបានដឹង ហើយឲ្យយល់អំពីការដាំបន្លែហ្នឹង កុំឲ្យសូវបាញ់ជាតិថ្នាំពុលហ្នឹងច្រើនពេក»។
រីឯស្រ្តីអ្នកភូមិមួយរូបដែលបានទៅចូលរួមរៀនយកបច្ចេកទេសដាំដំណាំពីអង្គការ KAFDOC នោះដែរ បានឲ្យដឹងអំពីថា អ្នកស្រីបានព្យាយាមដាំបន្លែតាមបែបធម្មជាតិនៅក្នុងសួនបន្លែជុំវិញផ្ទះអស់រយៈពេលជាង២ឆ្នាំមកហើយនេះ ដោយបញ្ជាក់ថា អ្នកភូមិចូលចិត្តមកទិញបន្លែរបស់គាត់ព្រោះដឹងថាគ្មានប្រើជាតិគីមី។
ស្ត្រីដដែលបានបញ្ជាក់ថា ៖ «ខ្ញុំដាំដោយនឹកឃើញខ្លួនឯង។ ខ្ញុំនៅលក់តែនឹងផ្ទះ ខ្ញុំនៅកៀនកោះទេ តែគេដឹងថាខ្ញុំដាំបន្លែ គេចូលចិត្តហូប គេថាអាហ្នឹងអត់មានជាតិគីមី ព្រោះគេឃើញខ្ញុំពិតៗពេលដែលខ្ញុំដាក់ជីហ្នឹង គេបានឃើញប្លែក ខ្ញុំមិនបានប្រើជីផ្សារឬក៏ជាតិពុលអីផង។ ដោះស្រាយក្នុងគ្រួសារបានត្រឹមតែកូនរៀនអីបាន ដោះស្រាយធូរធារបន្តិចបន្តួច ក្នុងគ្រួសារខ្ញុំមានគ្នា៦នាក់»៕