កន្លងមកអតីតអ្នកទោសទួលស្លែងបានរិះគន់ការកាត់ក្ដីរបស់សាលាក្ដីខ្មែរក្រហមចំពោះ ឌុច ថាមិនយុត្តិធម៌។
អតីតអ្នកទោសនៅគុកទួលស្លែង ៣រូប គឺលោក ជុំ ម៉ី, លោក វ៉ាន់ ណាត និងលោក ប៊ូ ម៉េង បានថ្លែងដូច្នេះក្នុងអំឡុងពេលទទួលយកសៀវភៅសាលក្រមកាត់ទោស ឌុច ពីមន្ត្រីសាលាក្ដីខ្មែរក្រហមនៅឯគុកទួលស្លែង កាលពីព្រឹកថ្ងៃព្រហស្បតិ៍ ទី១២ សីហា ឆ្នាំ២០១០ ៖ «នេះហើយជាយុត្តិធម៌ដែលយើងរង់ចាំ! ជាយុត្តិធម៌ចំពោះយើងទាំងអស់គ្នា»។
អតីតអ្នកទោសនៅគុកទួលស្លែងមួយរូប គឺវិចិត្រករ វ៉ាន់ ណាត ថ្លែងថា ការទន្ទឹងរង់ចាំរបស់លោកជាយូរមកហើយពិតជាមិនអត់ប្រយោជន៍ ពីព្រោះទីបំផុតលោកទទួលបានសាលក្រមកាត់ទោស ឌុច ៖ «ខ្ញុំសប្បាយចិត្តបំផុតដែល ឌុច ជាប់គុក ៣៥ឆ្នាំ។ នេះជាប្រវត្តិសាស្ត្រដែលមិនអាចកែប្រែបាន»។
អតីតអ្នកទោសទួលស្លែងមួយរូបទៀត ដែលបាត់បង់ភរិយានៅគុកទួលស្លែងដែរ គឺលោក ប៊ូ ម៉េង ដែលបានរួចជីវិតដោយសារតែលោកគូររូបមេខ្មែរក្រហម ប៉ុល ពត ដូច បានចាត់ទុកថា សៀវភៅសាលក្រម ឌុច គឺជាសៀវភៅប្រវត្តិសាស្ត្រដែលលោករង់ចាំជាង ៣០ឆ្នាំមកហើយ។
លោក ប៊ូ ម៉េង បញ្ជាក់បន្ថែមថា សាលក្រមកាត់ទោសអតីតប្រធានមន្ទីរ ស-២១ ឬគុកទួលស្លែង ឈ្មោះ កាំង ហ្កេកអ៊ាវ ហៅ ឌុច មិនបានផ្ដល់ឲ្យលោកទទួលបានយុត្តិធម៌ ១០០%ទេ ក៏ប៉ុន្តែលោកអាចទទួលយកបាន។
អតីតអ្នកទោសម្នាក់ទៀតគឺលោក ជុំ ម៉ី ក៏ដូចលោក ប៊ូ ម៉េង និងលោក វ៉ាន់ ណាត ដែរ ដែលធ្លាប់មិនសប្បាយចិត្តនឹងការកាត់ទោស ឌុច កន្លងមក បើទោះជាគាត់យល់ថា មិនបានទទួលយុត្តិធម៌ ១០០%ក៏ដោយ ៖ «ថ្ងៃនេះខ្ញុំសប្បាយចិត្តណាស់ ដែលសាលក្រមបោះចេញជាសៀវភៅមក»។
ក្រោយពីការបញ្ចេញទស្សនៈរបស់ខ្លួន អតីតអ្នកទោសខ្មែរក្រហមទាំង ៣រូប បានលើកសៀវភៅសាលក្រមកាត់ទោស ឌុច ឡើងលើ និងឧទ្ទិសដល់ព្រលឹងជនរងគ្រោះជាង ១ម៉ឺននាក់ ដែលបានស្លាប់នៅគុកទួលស្លែង។
ប្រកាសសាលក្រមដែលសាលាក្ដីខ្មែរក្រហម ប្រកាសកាលពីថ្ងៃទី២៦ ខែកក្កដាកន្លងទៅ ហើយសាលាក្ដីខ្មែរក្រហមបានចាប់ផ្ដើមបោះពុម្ពផ្សាយកាលពីថ្ងៃទី៥ សីហា ឆ្នាំ២០១០នេះ។
ប្រធានផ្នែកកិច្ចការសាធារណៈនៃសាលាក្ដីខ្មែរក្រហម លោក រាជ សម្បត្តិ មានប្រសាសន៍ថា សៀវភៅសាលក្រមដែលចែកផ្សាយជាលើកដំបូងនេះមានចំនួនជាង ៥០០ច្បាប់ ដែលបានចែកជូនជនរងគ្រោះនៅគុកទួលស្លែង និងអ្នកភូមិនៅសង្កាត់ព្រៃស ដែលជាអតីតមន្ទីរ ស-២៤ និងវាលពិឃាតជើងឯកសាខារបស់គុកទួលស្លែង។
លោកបន្តថា សៀវភៅនេះមានព័ត៌មានគ្រប់គ្រាន់ក្នុងការពន្យល់ដល់ពលរដ្ឋកម្ពុជាអំពីចម្ងល់ ទាក់ទងនឹងការកាត់ទោស ឌុច។ សៀវភៅនេះនឹងត្រូវចែកផ្សព្វផ្សាយដល់ពលរដ្ឋកម្ពុជានៅទូទាំងប្រទេសជាបន្តបន្ទាប់៕