ព្រៃឈើនៅស្រុកលំផាត់ខេត្តរតនគិរីត្រូវគេកាប់ទន្ទ្រានដើម្បីយកដី
2009.05.07
ប្រភពសុំមិនឲ្យបញ្ចេញឈ្មោះបញ្ជាក់ឲ្យដឹងនៅថ្ងៃព្រហស្បតិ៍ ទី៧ ឧសភា ឆ្នាំ២០០៩ ថា ព្រៃឈើប្រមាណជាងមួយហិកតារហើយត្រូវបានគេកាប់បំផ្លាញដើម្បីយកដីកាលពីដើមសប្តាហ៍នេះ នៅចំណុចតំបន់ព្រៃសហគមន៍ទល់មុខចម្ការឈ្មោះ ខឹម ខេងជូ ក្នុងភូមិសាយ៉ោះ ឃុំកាឡែង ៖ «ឃើញប៉េអឹម ៥ឡាន ជិះទៅកាប់ព្រៃទល់មុខចម្ការតាជូ។ ឈើធំៗតើ!។ ស្លៀកពាក់ឯកសណ្ឋានប៉េអឹម ហើយត្រង់ស៊ីន័រ ៧គ្រឿង ឈរអារពេញព្រៃតែម្ដង»។
អធិការប៉ូលិសស្រុកលំផាត់ លោក សូយ ថាវ បញ្ជាក់ឲ្យដឹងដែរថា ក្រុមអាវុធហត្ថដែលបានកាប់ទន្ទ្រានព្រៃឈើគឺជាអាវុធហត្ថស្រុកនិងខេត្ត ហើយការកាប់រាននេះគឺដើម្បីយកដី១០ហិកតារសម្រាប់ប្រើប្រាស់ក្នុងអង្គភាព ៖ «ខាងអាវុធហត្ថស្រុកប្រាប់ខ្ញុំថា ដីហ្នឹងគេសុំធ្វើចម្ការរួមរបស់អង្គភាព គេថា ១០ហិកតារ អ៊ីចឹងគេមកហ្នឹងមកមែន មកកាប់ចម្ការហ្នឹងមែន»។
មេបញ្ជាការកងរាជអាវុធហត្ថខេត្តរតនគិរី លោក ទុយ ស៊ីម ទទួលស្គាល់ថា លោកគឺជាអ្នកដឹកនាំការកាប់រានយកដីនោះ ពីព្រោះអាជ្ញាធរស្រុកបានប្រគល់ដីនៅតំបន់នោះមកអង្គភាពកងរាជអាវុធហត្ថតាំងពីឆ្នាំ២០០៥មក ក៏ប៉ុន្តែមិនទាន់បានកាប់រាន ៖ «ដីខ្ញុំសុំស្រុក ១០ហិកតារ ដាំបង្កបង្កើនផលតាំងពី២០០៥ ទើបយកកម្លាំងទៅធ្វើបីថ្ងៃហ្នឹង ទៅគ្រាន់តែកាប់ឆ្ការបានបន្តិចបន្តួច។ ខ្ញុំរាយការណ៍ទៅដល់ថ្នាក់លើអស់ហើយ»។
ជាមួយគ្នានេះ នាយផ្នែកនៃខណ្ឌព្រៃឈើទទួលបន្ទុកស្រុកលំផាត់ លោក ឡេង យុត មានប្រសាសន៍ថា លោកមិនបានដឹងពីការរានព្រៃឈើដើម្បីយកដីរបស់កងរាជអាវុធហត្ថនោះទេ។
លោកហៅការកាប់ទន្ទ្រាននេះជាអំពើខុសច្បាប់ពីព្រោះមិនមានការអនុញ្ញាតណាមួយឲ្យកាប់រានយកដីព្រៃ ដែលជាព្រៃការពារនោះឡើយ ៖ «ចាំមើលខ្ញុំឲ្យខាងសង្កាត់ចុះទៅមើល។ មិនមានគោលការណ៍ឯណាទៅសុំដីផ្ដេសផ្ដាសបានទេ អ៊ីចឹងបានស្រេចតែចិត្តហើយ»។
ប្រធានកម្មវិធីនៃអង្គការគាំទ្រសហគមន៍ជនជាតិដើមភាគតិចមានមូលដ្ឋាននៅខេត្តរតនគិរី លោក ទេព បូរិន មានប្រសាសន៍ថា ការទន្ទ្រានព្រៃឈើយកដីនៅខេត្តរតនគិរីដោយក្រុមអ្នកទិញដីមានសញ្ញាណកើនឡើងផ្ទុយពីការទន្រ្ទានព្រៃឈើដោយក្រុមហ៊ុនសម្បទានដែលមានសញ្ញាណថយចុះ។
លោកសម្ដែងការព្រួយបារម្ភចំពោះផលប៉ះពាល់ផ្នែកបរិស្ថាននិងជីវភាពរស់នៅសម្រាប់ជនជាតិដើមនៅតំបន់នោះ ៖ «វាអាចប៉ះពាល់ទៅដល់សង្គមនិងបរិស្ថាន ទាក់ទងនឹងជនជាតិដើមភាគតិច ទៅលើធនធានធម្មជាតិ ព្រោះគាត់ពឹងពាក់ទៅលើព្រៃឈើ គាត់ពឹងពាក់ទៅលើផលអនុផល»។
កាលពីឆ្នាំ២០០៨ អាជ្ញាធរខេត្តរតនគិរីឲ្យដឹងថា មានដីដែលបានពីការកាប់រានព្រៃឈើរាប់ពាន់ហិកតារត្រូវបានដកហូត ក៏ប៉ុន្តែសមាគមអាដហុករាយការណ៍ថា មានដីព្រៃរាប់ម៉ឺនហិកតារត្រូវបានគេកាប់រានដើម្បីយកដី ហើយករណីនេះ គេមិនទាន់ឃើញជនជាប់ទាក់ទិនណាម្នាក់ត្រូវបានគេផ្តន្ទាទោសឡើយ៕
រឿងដែលគេអានច្រើនបំផុត
RFA
- លោក កឹម សុខា ជួបពលរដ្ឋជាសាធារណៈលើកដំបូងក្រោយប្រកាសចែកផ្លូវពីលោក សម រង្ស៊ី
- សង្គមស៊ីវិលរិះគន់រឿងកូនប្រុសរដ្ឋមន្ត្រីក្រសួងការងារទទួលបានតំណែងស្មើឪពុក
- លោក កឹម សុខា បញ្ជាក់ជាថ្មីពីគ្មានទំនាក់ទំនងជាមួយលោក សម រង្ស៊ី ទៀតទេ
- បក្សភ្លើងទៀនថា ការចាប់មេឃុំចំណារលើ ជាការធ្វើទុក្ខបុកម្នេញផ្នែកនយោបាយ
- មេធាវីអន្តរជាតិរបស់កញ្ញា សេង ធារី ថា នឹងប្រើគ្រប់មធ្យោបាយទាមទារឱ្យដោះលែងកូនក្តី