មន្ត្រីនាំពាក្យអង្គភាពប្រតិកម្មរហ័សនៃទីស្ដីការគណៈរដ្ឋមន្ត្រី លោក ទិត សុធា មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី៣ ខែមេសា ថា រដ្ឋាភិបាលកម្ពុជាគ្រោងនឹងលើកយកថ្ងៃទី៦ ខែមេសា ដើម្បីធ្វើជំរឿនមន្ត្រីរាជការស៊ីវិលនៅទូទាំងប្រទេស។
ការធ្វើជំរឿនមន្ត្រីរាជការជាលើកទី៣ គឺធ្វើទៅតាមសារាចររបស់លោកនាយករដ្ឋមន្ត្រី ហ៊ុន សែន ចុះថ្ងៃទី១២ ខែមីនា ឆ្នាំ២០១០។
លោក ទិត សុធា បានអះអាងថា ការធ្វើជំរឿនមន្ត្រីរាជការទូទាំងប្រទេសពីរលើកកន្លងមកនេះ រដ្ឋាភិបាលបានលុបឈ្មោះមន្ត្រីរាជការខ្មោចបានចំនួនជិតបីម៉ឺននាក់ចេញពីបញ្ជីមន្ត្រីរាជការ។ លោកបញ្ជាក់ថា ការធ្វើជំរឿនគឺបានធ្វើឲ្យរដ្ឋាភិបាលចំណេញថវិកាជាតិ។
លោក ទិត សុធា មានប្រសាសន៍ដូច្នេះ ៖ «ការធ្វើជំរឿនហ្នឹងវាបានផលប្រយោជន៍ច្រើនណាស់។ ពេលណាដែលយើងឃើញមន្ត្រីខ្មោច មន្ត្រីដែលមិនធ្វើការ វាកាត់បន្ថយនូវខ្ទង់ចំណាយដែលមិនមានប្រយោជន៍។ ជាការរៀបចំឲ្យមានរបៀបរៀបរយមួយនៅក្នុងជួរមន្ត្រីរាជការស៊ីវិលនៅទូទាំងប្រទេស។ បំបាត់ចោលនូវមន្ត្រីរាជការខ្មោច មន្ត្រីដែលមិនធ្វើការ ដូច្នេះយើងនឹងមានតួលេខមួយ ហើយជំរុញលើកទឹកចិត្តដល់មន្ត្រីរាជការដែលធ្វើការ ជាការកាត់បន្ថយនូវចំណាយឥតប្រយោជន៍ផងដែរ»។
នៅក្នុងសិក្ខាសាលាស្ដីពីការធ្វើជំរឿនមន្ត្រីរាជការកាលពីថ្ងៃទី២ ខែមេសា នាទីស្ដីការគណៈរដ្ឋមន្ត្រី លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានឲ្យដឹងថា ចាប់តាំងពីឆ្នាំ១៩៩៣ មក កម្ពុជាបានធ្វើជំរឿនមន្ត្រីរាជការស៊ីវិលបានចំនួនពីរលើក។ លើកទី១ នៅឆ្នាំ១៩៩៥ និងលើកទី២ នៅចន្លោះឆ្នាំ១៩៩៩-២០០១។ លទ្ធផលជំរឿនលើកទី១ រដ្ឋាភិបាលបានសម្រេចលុបឈ្មោះមន្ត្រីរាជការខ្មោចចេញពីក្របខ័ណ្ឌ និងពីតារាងបើកបៀវត្សរ៍បានចំនួន ១៧.៦៨៥នាក់ និងលើកទី២ លុបឈ្មោះបានចំនួន ៩.៨១៤នាក់។
ការធ្វើជំរឿនមន្ត្រីរាជការលើកទី៣ លោក សុខ អាន បានរំពឹងទុកថា រដ្ឋាភិបាលនឹងអាចរកឃើញពីភាពមិនប្រក្រតីនៃឈ្មោះមន្ត្រីរាជការខ្មោចច្រើនទៀតពីលទ្ធផលនៃការធ្វើជំរឿននេះ។
ការប្រកាសធ្វើជំរឿនលើកទី៣របស់រដ្ឋាភិបាល ទទួលបានការសាទរពីមន្ត្រីសង្គមស៊ីវិលនៅកម្ពុជា ដោយចាត់ទុកថា លទ្ធផលនៃការធ្វើជំរឿនគឺមានសារសំខាន់បំផុតសម្រាប់រដ្ឋាភិបាលកម្ពុជា។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ឲ្យវិទ្យុអាស៊ីសេរី ដឹងតាមទូរស័ព្ទនៅថ្ងៃដដែលនេះ ដោយស្វាគមន៍ចំពោះការប្រកាសធ្វើជំរឿនរបស់រដ្ឋាភិបាលទៅលើមន្ត្រីខ្មោចដែលមានតែបញ្ជីឈ្មោះ ដែលបានធ្វើឲ្យរដ្ឋាភិបាលខាតបង់ប្រាក់បៀវត្សរ៍អស់ជាច្រើន ដោយសារមន្ត្រីរាជការខ្មោចទាំងនេះ។
លោក រ៉ុង ឈុន បញ្ជាក់ឲ្យដឹងដូច្នេះ ៖ «កន្លងមកយើងឃើញថា មន្ត្រីដែលមានឋានៈ តួនាទីហ្នឹងឃើញថា កាន់មន្ត្រីខ្មោចហ្នឹងច្រើនណាស់ ដែលធ្វើឲ្យការចំណាយថវិកាជាតិទៅលើមន្ត្រីខ្មោចហ្នឹងច្រើន។ បើជំរឿនជម្រុះចោលមន្ត្រីខ្មោចហ្នឹងឲ្យអស់ យើងគិតថា វានឹងសល់នូវការចំណាយថវិកាជាតិយកមកដំឡើងឲ្យមន្ត្រីរាជការ គ្រូបង្រៀនយើងឲ្យបានពេញលេញ»។
របាយការណ៍បស់ក្រុមប្រឹក្សាកំណែទម្រង់រដ្ឋបាលបានឲ្យដឹងថា មកដល់ត្រឹមខែកុម្ភៈ ឆ្នាំ២០១០ ចំនួនមន្ត្រីរាជការស៊ីវិលមានចំនួន ១៧៦.៨២៩នាក់ ក្នុងនោះមានមន្ត្រីជាស្ត្រីចំនួន ៦០.១៨២នាក់។
ប្រាក់បៀវត្សរ៍មន្ត្រីរាជការខ្មែរជាទូទៅមានចំនួនចន្លោះពី ២៥ដុល្លារអាមេរិក ទៅដល់ ៨០ដុល្លារអាមេរិក៕