មន្ត្រីសុខាភិបាលបានឲ្យដឹងថា នៅមុនដាច់ឆ្នាំ២០១១នេះ ក្រសួងកំពុងចាត់វិធានការតាមផ្លូវច្បាប់ ដើម្បីលុបបំបាត់កន្លែងលក់ឱសថខុសច្បាប់ចំនួន ៩៩កន្លែង និងសេវាសុខាភិបាលគ្មានច្បាប់អនុញ្ញាតចំនួន ៣០៥ ដែលកំពុងធ្វើសកម្មភាពនៅទូទាំងប្រទេសកម្ពុជា។
ឱសថបណ្ឌិត លោក ហេង ប៊ុនគៀត ប្រធាននាយកដ្ឋានឱសថចំណីអាហារបរិក្ខារពេទ្យ និងគ្រឿងសំអាង មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី៣០ ខែមករាថា ក្នុងចំណោមទីតាំងសុខាភិបាលល្មើសច្បាប់ទាំងអស់ជាង ៤០០កន្លែង ដែលក្រសួងបានរកឃើញ គឺកំពុងធ្វើចរាចរណ៍លក់ដូរឱសថក្លែងក្លាយយ៉ាងអនាធិបតេយ្យ។
មន្ត្រីសុខាភិបាលបានសង្កត់ធ្ងន់ទៅលើម្ចាស់ឱសថស្ថានលក់ថ្នាំ ឬទីតាំងបើកទទួលព្យាបាលជំងឺដែលគ្មានច្បាប់អនុញ្ញាត ប្រសិនបើសមត្ថកិច្ចជំនាញរកឃើញកំហុសធ្ងន់ធ្ងរ នឹងត្រូវបញ្ជូនទៅកាន់តុលាការផ្ដន្ទាទោសតាមច្បាប់។
លោកឱសថបណ្ឌិត ហេង ប៊ុនគៀត បញ្ជាក់បន្ថែមដូច្នេះ ៖ «លុបបំបាត់ឲ្យអស់ ព្រោះថា អាសេវាសុខាភិបាលអត់ច្បាប់ ហើយនិងកន្លែងលក់ឱសថខុសច្បាប់ហ្នឹង ជាកន្លែងចរាចរណ៍ឱសថក្លែងក្លាយ យើងទប់ស្កាត់អាហ្នឹង ហើយយើងទប់ស្កាត់ពង្រឹងនៅតាមច្រកទ្វារព្រំប្រទល់ទៀត ដែលជាសមត្ថកិច្ចរបស់ក្រសួងមហាផ្ទៃ ដែលលោកបានពង្រឹងការងារនេះនៅតាមព្រំប្រទល់ ព្រោះយើងមានច្រកព្រំប្រទល់មានគេរត់ពន្ធថ្នាំពេទ្យក្លែងក្លាយមកពីប្រទេសវៀតណាម និងប្រទេសថៃ»។
ទាក់ទងបញ្ហានេះ លោកវេជ្ជបណ្ឌិតម្នាក់មានប្រសាសន៍ឲ្យវិទ្យុអាស៊ីសេរីដឹង ដោយសុំមិនឲ្យបញ្ចេញឈ្មោះ និងថតសំឡេង បានថ្លែងដោយមានជំនឿថា សមត្ថកិច្ចអាចទប់ស្កាត់ទីតាំងលក់ឱសថ ឬទីកន្លែងបម្រើសេវាព្យាបាលជំងឺអត់ច្បាប់មានប្រសិទ្ធភាពទេ ព្រោះម្ចាស់ទីតាំងល្មើសទាំងនោះ ភាគច្រើនជាសាច់ញាតិមន្ត្រីក្រសួងសុខាភិបាល និងមន្ត្រីថ្នាក់ដឹកមន្ទីរពេទ្យធំៗ ដែលជារបររកស៊ីក្រៅរបស់ពួកគេនៅកម្ពុជា។
បុរសឈ្មោះ ទូច ឡុង រស់នៅខណ្ឌឫស្សីកែវ ក្រុងភ្នំពេញ បានថ្លែងថា គ្រួសារគាត់នៅពេលមានសមាជិកណាម្នាក់កើតមានជំងឺអ្វីមួយ គឺតែងទៅរកទិញថ្នាំ ឬទៅសម្រាកព្យាបាលនៅតាមឱសថស្ថានមួយចំនួននាទីក្រុងភ្នំពេញ ប៉ុន្តែលោកមិនបានដឹងថា ទីតាំងទទួលសេវាព្យាបាលទាំងនោះមានច្បាប់ ឬខុសច្បាប់ ហើយក៏មិនបានដឹងថា ថ្នាំដែលម្ចាស់ឱសថស្ថានលក់ឲ្យនោះជាថ្នាំក្លែងក្លាយ ឬយ៉ាងណានោះទេ។
ពលរដ្ឋរូបនេះចង់ឲ្យរដ្ឋាភិបាលលុបបំបាត់នូវរាល់គ្រប់ទីតាំងឱសថស្ថាន និងសេវាសុខាភិបាលខុសច្បាប់ឲ្យមានប្រសិទ្ធភាពខ្ពស់ ជាជាងមានតែវិធានការ ប៉ុន្តែការអនុវត្តមិនមានសកម្មភាព។
ពលរដ្ឋឈ្មោះ ទូច ឡុង បានសំណូមពរដូច្នេះ ៖ «មើលឃើញអ៊ីចឹងដូចថា ព្រួយបារម្ភដែរ ប៉ុន្តែមិនចេះជំនាញខាងថ្នាំពេទ្យ។ យើងគ្រាន់តែដឹងថា ពេលយើងមានជំងឺយើងត្រូវទៅកន្លែងលក់ឱសថ។ អាហ្នឹងបញ្ហាលើរដ្ឋាភិបាលទេ បើរដ្ឋគ្រប់គ្រងបាន ប្រជាជនក៏មានសុខភាពល្អដែរ»។
ទោះយ៉ាងនេះក្ដី លោកឱសថបណ្ឌិត ហេង ប៊ុនគៀត បានសង្កត់ធ្ងន់ថា វិធានការទប់ស្កាត់បទល្មើសឱសថស្ថាន និងទីតាំងពិនិត្យព្យាបាលជំងឺមិនមានច្បាប់នេះ សមត្ថកិច្ចជំនាញបានចាប់បញ្ជូនសំណុំរឿងបទល្មើសចំនួន ៦ករណីទៅកាន់តុលាការ ដើម្បីផ្ដន្ទាទោស និងកំពុងបន្តសកម្មភាពរាល់ថ្ងៃ។
លោកឱសថបណ្ឌិត ហេង ប៊ុនគៀត មានប្រសាសន៍បន្ថែម ៖ «ប៉ះពាល់ទាំងសេដ្ឋកិច្ច ប៉ះពាល់ទាំងការចំណាយថវិការបស់ពលរដ្ឋ។ ចំណាយហើយអត់ជាជំងឺទេ ជំងឺកាន់តែធ្ងន់ធ្ងរ។ គ្រឿងក្នុងយើងកាលណាឱសថក្លែងក្លាយវាបង្កទៅជាសារធាតុមួយផ្សេង ដែលបង្កគ្រោះថ្នាក់ដល់ថ្លើម និងក្រពះយើង។ ព្រោះមិនដឹងថា ឱសថក្លែងក្លាយហ្នឹងគេដាក់អីខ្លះ ព្រោះអត់កំណត់ច្បាប់ពីរូបមន្តរបស់វា ដូច្នេះយើងមិនអាចកំណត់បានទេ»។
មន្ត្រីក្រសួងសុខាភិបាលបានឲ្យដឹងថា សព្វថ្ងៃនេះក្រសួងបានដាក់ឧបករណ៍សម្រាប់ត្រួតពិនិត្យឱសថក្លែងក្លាយចំនួន ១២គ្រឿង នៅតាមបណ្ដាខេត្តចំនួន ១២ មានទីតាំងនៅព្រំដែន ដើម្បីស្វែងរកឱសថក្លែងក្លាយ។
របាយការណ៍ប្រចាំឆ្នាំ២០១០ របស់ក្រសួងសុខាភិបាលបានរកឃើញថា មានឱសថក្លែងក្លាយតែចំនួន ០,៣% បើប្រៀបធៀបឆ្នាំ២០០៩ គឺបានថយចុះ។ ឆ្នាំ២០០៩ ឱសថក្លែងក្លាយបានរកឃើញមានចំនួន ១,១% បានធ្វើសកម្មភាពនៅកម្ពុជា៕