លោក ហ៊ុន សែន នាយករដ្ឋមន្ត្រីនៃប្រទេសកម្ពុជាមានប្រសាសន៍ដោយដាក់បទបញ្ជាទៅមន្ត្រីគ្រប់ស្ថាប័នពាក់ព័ន្ធរដ្ឋាភិបាលគ្រប់ជាន់ថ្នាក់ថា ចាប់ពីឆ្នាំ២០១០ តទៅត្រូវធ្វើផែនការកំណត់ផែនទី ទីតាំងដីសម្បទានសង្គមកិច្ច នៅតាមខេត្ត ក្រុងមួយចំនួនឲ្យបានច្បាស់លាស់ទុកសម្រាប់ផ្តល់ជូន កងកម្លាំងប្រដាប់អាវុធ និងគ្រួសារចូលនិវត្តន៍ អតីតយុទ្ធជនបាត់បង់សមត្ថភាពការងារ និងគ្រួសារពលីជីវិតក្នុងបុព្វហេតុជាតិ ការពារសន្តិភាព បូរណភាពទឹកដី។
លោកនាយករដ្ឋមន្រ្តី ហ៊ុន សែន លើកឡើងដូច្នេះក្នុងពិធីជួបប្រជុំផ្សព្វផ្សាយគោលនយោបាយផ្តល់សម្បទានដីសង្គមកិច្ចដល់អតីតកងកម្លាំងប្រដាប់អាវុធ និងគ្រួសាររបស់រដ្ឋាភិបាលព្រឹកថ្ងៃទី២៣ ខែធ្នូ នាទីក្រុងភ្នំពេញ។ លោកបញ្ជាក់ថា ដីទុកសម្រាប់ធ្វើសម្បទានសង្គមកិច្ចដល់អតីតកងកម្លាំងប្រដាប់អាវុធត្រូវតែជាប្រភេទដីដែលអាចប្រកបរបរកសិកម្ម និងជាទីតាំងដែលមានប្រភពទឹកត្រឹមត្រូវ។
លោក ហ៊ុន សែន ថ្លែងថា ៖ «រៀបចំឲ្យមានផែនការច្បាស់លាស់ឆ្នាំ២០១០ខាងមុខនេះសម្រាប់ជាមូលដ្ឋានបន្តរៀបចំសម្បទានដីសង្គមកិច្ចនេះ។ សម្រាប់បម្រុងទុកតែម្តង។ ដីកន្លែងហ្នឹងទោះបីសុំវិនិយោគក៏អត់ឲ្យដែរ ទុកតែម្តង»។
ជាមួយគ្នានេះដែរលោក ហ៊ុន សែន បានប្រកាសដាក់បទបញ្ជាទៅក្រសួងស្ថាប័នពាក់ព័ន្ធត្រូវមានវិធានការក្តៅចំពោះក្រុមហ៊ុនទាំងឡាយណាដែលទទួលបានដីសម្បទានសេដ្ឋកិច្ចពីរដ្ឋាភិបាលដើម្បីធ្វើការអភិវឌ្ឍ ប៉ុន្តែបែរជាមិនមានសកម្មភាពអភិវឌ្ឍន៍តាមគោលការណ៍ណែនាំត្រូវដកទុកជាសម្បត្តិរបស់រដ្ឋ ឬទុកសម្រាប់ផ្តល់សម្បទានដីសង្គមកិច្ចដល់ប្រជាពលរដ្ឋដែលខ្វះដីបង្កបង្កើនផល។
បទបញ្ជានេះទទួលបានការសាទរពីក្រុមមន្ត្រីសង្គមស៊ីវិលមួយចំនួននៅកម្ពុជា ប៉ុន្តែមន្ត្រីសង្គមស៊ីវិលខ្លះទៀតហាក់មិនមានជំនឿចិត្តចំពោះបទបញ្ជាលោកនាយករដ្ឋមន្ត្រី ហ៊ុន សែន ដែលនឹងមានប្រសិទ្ធភាពប៉ុន្មានឡើយ។
ក្រុមមន្រ្តីសង្គមស៊ីវិលបានលើកជាឧទារហណ៍ ករណីគ្រួសារយោធិនពិការជិតមួយពាន់គ្រួសាររស់នៅភូមិបន្ទាយរងៀង ឃុំក្រយា ស្រុកសន្ទុក ខេត្តកំពង់ធំ ដែលកាលពីពេលថ្មីៗនេះត្រូវបានសមត្ថកិច្ចគំរាមកំហែងវាយធ្វើបាបលើរាងកាយ និងចាប់ដាក់គុកអស់ជាច្រើននាក់ក្រោមបទចោទប្រកាន់ប្រើអំពើហិង្សាបំផ្លិចបំផ្លាញទ្រព្យសម្បត្តិអ្នកដទៃ និងរស់នៅលើដីមានម្ចាស់កម្មសិទ្ធិ ឬលើដីសម្បទានសេដ្ឋកិច្ចរបស់ក្រុមហ៊ុនយ៉ាងអយុត្តិធម៌ទៅវិញ។
ទោះបីជាយ៉ាងណាក៏ដោយលោក ហ៊ុន សែន បានសង្កត់ធ្ងន់ដល់មន្ត្រីគណៈកម្មាធិការសម្បទានសង្គមកិច្ចថ្នាក់ជាតិត្រូវតែសហការសម្របសម្រួលជាមួយគណៈកម្មាធិការ និងក្រសួងស្ថាប័នពាក់ព័ន្ធ ដើម្បីធានាប្រសិទ្ធភាពនៅក្នុងការអនុវត្តគោលការណ៍ផ្តល់សម្បទានដីសង្គមកិច្ចជូនអតីតកងកម្លាំងប្រដាប់អាវុធឲ្យមានប្រសិទ្ធភាពខ្ពស់។
មន្ត្រីអង្គការសង្គមស៊ីវិលបានអះអាងទៀតថា គិតត្រឹមឆ្នាំ២០០៩នេះ យ៉ាងហោចណាស់មានក្រុមហ៊ុនចំនួន ៧១ត្រូវបានរដ្ឋាភិបាលផ្តល់ដីសម្បទានសេដ្ឋកិច្ចដើម្បីធ្វើការអភិវឌ្ឍក្នុងទំហំផ្ទៃដីប្រមាណជាង ១លានហិកតា។
លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ថា កន្លងមករដ្ឋាភិបាលបានយកចិត្តទុកដាក់ហើយបានត្រៀមដីសម្បទានសង្គមកិច្ចជាង ៧ម៉ឺន ៤ពាន់ហិកតា ទុកសម្រាប់ផ្តល់ជូនដល់អតីតកងកម្លាំងប្រដាប់អាវុធគ្រប់អាយុចូលនិវត្តន៍ គ្រួសារយោធិនពិការគ្រួសារពលីក្នុងបុព្វហេតុការពារជាតិមាតុភូមិ៕