អាជ្ញាធរជាតិប្រឆាំងគ្រឿងញៀនកម្ពុជា ក៏បានប្រើប្រាស់បដាខិត្តប័ណ្ណ និងការប្រគំតន្ត្រីឃោសនាអប់រំ ប្រជាពលរដ្ឋឲ្យបដិសេធគ្រឿងញៀន ឬមិនឲ្យភ្លក់ ឬសាកល្បងសេពគ្រឿងញៀនជាដើម។
លោកឧត្ដមសេនីយ៍ឯក ម៉ឹក ដារ៉ា ជាអគ្គលេខាធិការនៃអាជ្ញាធរជាតិប្រឆាំងគ្រឿងញៀនកម្ពុជា និងជាប្រធានមន្ទីរប្រឆាំងគ្រឿងញៀនរបស់ក្រសួងមហាផ្ទៃ បានមានប្រសាសន៍ថា បើសិនណាប្រជាពលរដ្ឋណាសង្ស័យថា មានការជួញដូរគ្រឿងញៀន សូមរាយការណ៍រឿងនេះទៅសមត្ថកិច្ចដែលនៅជិតបំផុត ឬរាយការណ៍មកលេខពិសេស ៦០១ តាមប្រព័ន្ធ ០១២ ដោយមិនអស់កម្រៃទេ។
លោកបន្តថា ៖ «ពិសេសបុណ្យអុំទូកនេះ គឺជាការប្រមូលផ្ដុំមួយដ៏ធំ ដែលមានមនុស្សរាប់លាននាក់ ដែលមកពីបណ្ដាខេត្តនៅទូទាំងប្រទេស មកចូលរួមនៅក្នុងពិធីបុណ្យនៅក្នុងរាជធានីភ្នំពេញ។ ជាការបង្កលក្ខណៈងាយស្រួលដល់ការងារផ្សព្វផ្សាយ គឺបញ្ជ្រាបការយល់ដឹងពីការគ្រោះថ្នាក់ដោយសារគ្រឿងញៀននេះជូនដល់ប្រជាពលរដ្ឋលោកជ្រាប»។
ខិត្តប័ណ្ណតូចៗអប់រំប្រជាពលរដ្ឋឲ្យជៀសវាងគ្រឿងញៀនច្រើនពាន់សន្លឹក ត្រូវបានគេបោះពុម្ពដើម្បីចែកចាយដល់ប្រជាពលរដ្ឋនានា ដែលធ្វើដំណើរតាមរថយន្តក្រុងចំនួនជាង ៣០០គ្រឿងនៅក្នុងប្រទេសកម្ពុជា។
កីឡាករប្រណាំងទូកង មកពីស្រុកកៀនស្វាយ ខេត្តកណ្ដាល ឈ្មោះ អូន សុគា អាយុ ២០ឆ្នាំ កំពុងតែអុំសាកល្បងទូកនៅមុខព្រះបរមរាជវាំង នៅមុនការប្រណាំងទូកឈានមកដល់ បានថ្លែងថា លោកបានយល់ដឹងអំពីគ្រោះថ្នាក់គ្រឿងញៀននេះតាមរយៈខិត្តប័ណ្ណ និងទូរទស្សន៍។
លោក អូន សុគា បន្តថា ៖ «បើតាមខ្ញុំវិភាគមើល តាមរូបភាពគេដាក់ផ្សាយតាមទូរទស្សន៍ហ្នឹង គឺជក់ទៅធ្វើទុក្ខខ្លួន ប៉ះពាល់ដល់សុខភាព ប៉ះពាល់ដល់សរសៃប្រាសាទខួរក្បាល និងណាមួយជក់យូរៗគឺបែកទៅជាលួចទ្រព្យសម្បត្តិគេ គេចាប់បានជាប់គុក»។
ប្រជាពលរដ្ឋម្នាក់មកពីខេត្តកណ្ដាល ឈ្មោះ កែវ គឹមសៅ បានថ្លែងថា គ្រឿងញៀនមិនមែនជាឱសថទេ ៖ «យើងមិនត្រូវប្រព្រឹត្តគ្រឿងញៀនទេ។ វានាំឲ្យប៉ះពាល់ដល់សុខភាព ប៉ះពាល់ដល់សរសៃប្រសាទ ព្រោះគ្រឿងញៀននាំឲ្យខូចសុខភាព បាត់បង់សតិ និងបណ្ដាលឲ្យប៉ះពាល់ដល់សង្គមទៀត»។
ប្រភពពីមន្ត្រីប្រឆាំងគ្រឿងញៀននៅក្នុងប្រទេសកម្ពុជា បានឲ្យដឹងថា មានអ្នកញៀនគ្រឿងចំនួនរវាង ១ពាក់នាក់ ទៅ ២ពាន់នាក់ នៅក្នុងមណ្ឌលចំនួនជាង ១០កន្លែង ដែលកំពុងតែទទួលការព្យាបាល និងបន្សាបគ្រឿងញៀន។
មានអ្នកស្ថិតនៅក្រោមឥទ្ធិពលគ្រឿងញៀនចំនួនរវាង ៥ពាន់នាក់ ទៅ ៦ពាន់នាក់ និងមានអ្នកប៉ះពាល់ដោយគ្រឿងញៀន ឬអ្នកបានសាកល្បងគ្រឿងញៀនចំនួនជាង ២ពាន់នាក់៕