ការរកឃើញនេះកើតមានឡើងបន្ទាប់ពីក្រុមអាជ្ញាធរចម្រុះខេត្តកាលពីថ្ងៃទី២០ ធ្នូ ឆ្នាំ២០០៨ បានចុះត្រួតពិនិត្យការដ្ឋាននោះតាមព័ត៌មានថា មានការកាប់ឈើមូលហើយអារច្រៀកឈើនៅការដ្ឋាននោះ។
ប្រភពមន្ត្រីសុំមិនឲ្យបញ្ចេញឈ្មោះដែលបានដឹងពីហេតុការណ៍បញ្ជាក់ថា ឈើមូលប្រភេទលេខ២រាប់រយដើមត្រូវបានគេកាប់នៅតំបន់ព្រៃឈើជាប់ការដ្ឋាននោះដើម្បីយកឈើនិងឈានទៅឈូសឆាយពង្រីកដីដើម្បីដាំកៅស៊ូ។
មន្ត្រីមូលដ្ឋាននិងមន្ត្រីជំនាញព្រៃឈើព្យាយាមមិនធ្វើអត្ថាធិប្បាយពិស្តារជុំវិញការរកឃើញបរិមាណឈើនោះទេ ប៉ុន្តែទទួលស្គាល់ថាទីតាំងនោះគឺជាការដ្ឋានដីរបស់ឧត្តមសេនីយឯក ហ៊ុយ ពិសិដ្ឋ។
អធិការប៉ូលិសស្រុកលំផាត់ លោក សូយ ថាវ មានប្រសាសន៍ទទួលស្គាល់ថា ៖ «ក្រុមហ៊ុនរបស់ឯកឧត្ដម ហ៊ុយ ពិសិដ្ឋ គាត់ធ្វើចម្ការនៅហ្នឹង អ៊ីចឹងក៏យើងអត់បានទៅមើលទៅអីទេ។ ហើយដល់ចុងក្រោយមកឮគេថាដាក់រ៉ៃដាក់អី»។
វិទ្យុអាស៊ីសេរីមិនអាចទាក់ទងឧត្តមសេនីយ៍ ហ៊ុយ ពិសិដ្ឋ សុំការអធិប្បាយជុំវិញសេចក្តីរាយការណ៍ខាងលើនោះទេ ក៏ប៉ុន្តែមេការទទួលខុសត្រូវប្រចាំការដ្ឋាន លោក សួ ទិតនី អះអាងផ្ទុយគ្នាថា ឈើដែលកាប់នោះមានតិចតួចគឺជាឈើសេសសល់ក្នុងការដ្ឋានហើយអារច្រៀកដើម្បីធ្វើរោងស្នាក់នៅសម្រាប់កម្មករនិងស្ពានក្នុងតំបន់នោះតែប៉ុណ្ណោះ។
លោក សួ ទិតនី បានឲ្យដឹងថា ៖ «វាអត់ពិតប្រាកដទេ ឋានៈគាត់ប៉ុនណាណី គាត់ទៅធ្វើពាសវាលពាសកាលដូចមាត់អ្នកថា អ្នកនិយាយហ្នឹង»។
ប្រជាពលរដ្ឋនៅឃុំសេដានិយាយឲ្យដឹងថា ការដ្ឋានដែលកាប់អារច្រៀកឈើមានទំហំប្រមាណជាង៥០ហិកតារជាអតីតដីចម្ការវិលជុំនៃអ្នកភូមិជនជាតិដើមនៅទីនោះហើយត្រូវបានអតីតមេឃុំនិងអ្នកភូមិមួយចំនួនលក់ទៅឲ្យលោកឧត្តមសេនីយ ហើយក៏មានការឈូសឆាយដីនោះដើម្បីដាំកៅស៊ូ។
មេឃុំសេដា លោក ភុំ ផាន់ និយាយឲ្យដឹងយ៉ាងដូច្នេះ ៖ «ដីហ្នឹង ភូមិភាគគេលក់ដីហ្នឹង»។
នាយផ្នែកនៃខណ្ឌរដ្ឋបាលព្រៃឈើខេត្តរតនគិរីទទួលបន្ទុកស្រុកលំផាត់ លោក ឡេង យុក មានប្រសាសន៍ថា លោកបានធ្វើរបាយការណ៍បន្ទាន់មួយទៅថ្នាក់លើរួចហើយ។
លោក ឡេង យុក បានមានប្រសាសន៍ថា ៖ «ក្រុមខ្ញុំហ្នឹងកាលហ្នុងចុះទៅបង្រ្កាបបាន ៣៨មួយក្រុមទៀត នៅខាងក្រុមលោកនាយខណ្ឌគាត់ចុះទៅហ្នឹង ខ្ញុំអត់ទាន់បានសួរនាំ។ កាប់ឈើហ្នឹងវាជារឿងមួយខុសហើយ ប៉ុន្តែចង់និយាយថាចាំមើលឯកសារពាក់ព័ន្ធទាំងអាជ្ញាធរស្រុក ឃុំអី គាត់ស៊ីញ៉េតាំងពី២០០៤ឯណោះ»។
មន្ត្រីស៊ើបអង្កេតសមាគមអាដហុកខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ពីករណីនេះ ៖ «ពីរថ្ងៃនេះយើងបានទទួលពាក្យបណ្ដឹងពីពលរដ្ឋ ឃើញថាមានការកាប់រំលំដើមឈើធំៗ ហើយរហូតដល់កាប់ឈើសម្រាប់ធ្វើអាជីវកម្មថែមទៀត ដែលមានរាប់រយម៉ែត្រគូប។ អ្នកដែលពាក់ព័ន្ធហ្នឹងសុទ្ធតែជាអ្នកមានអំណាច ដែលពេលខ្លះធ្វើឲ្យអាជ្ញាធរសមត្ថកិច្ចមានការខ្លាចរអារ»។
ក្នុងឆ្នាំ២០០៨នេះសមាគមអាដហុកខេត្តរតនគិរីរាយការណ៍ថា ប្រជាសហគមន៍បានរកឃើញទីតាំងឈូសឆាយព្រៃឈើយកដីដាំកៅស៊ូនិងទីតាំងកាប់ឈើធ្វើអាជីវកម្មជាច្រើនកន្លែងទាក់ទិនមន្ត្រីមានអំណាច ក៏ប៉ុន្តែពុំមានចំណាត់ការអ្វីតាមផ្លូវច្បាប់នោះឡើយ៕