ប្រតិកម្មនេះគឺជាការឆ្លើយតបទៅនឹងសេចក្តីរាយការណ៍ដែលអះអាងថា មានការកាប់ឈើមូលប្រមាណ៣០០ម៉ែត្រគូបនៅតំបន់ព្រៃឈើក្នុងឃុំសេដា ស្រុកលំផាត់ ដើម្បីពង្រីកយកដីការដ្ឋានដាំកៅស៊ូនាយឧត្តមសេនីយ៍ជាន់ខ្ពស់ខាងលើនោះ។
វរសេនីយ៍ទោ ហ៊ុន សុខា តំណាងលោក ហ៊ុយ ពិសិដ្ឋ បានមកដល់បន្ទប់ធ្វើការអ្នកយកព័ត៌មានវិទ្យុអាស៊ីសេរីប្រចាំខេត្តរតនគិរីនៅថ្ងៃពុធ ទី២៤ ធ្នូ ឆ្នាំ២០០៨ បញ្ជាក់ ៖ «ដែលថា ឯកឧត្ដម ហ៊ុយ ពិសិដ្ឋ ទៅរុករានទន្ទ្រានយកដីឬកាប់ព្រៃនោះគឺជាព័ត៌មានមួយនិយាយបំផ្លើស ឈើនោះគឺយើងប្រមូលឈើចាស់ៗតាំងពីជំនាន់ចម្ការបងប្អូនដែលគាត់កាប់មុននោះ យើងប្រមូលយកមកទុកដើម្បីធ្វើជាផ្ទះនិងស្ពានហ្នឹងតាមសំណើប្រជាពលរដ្ឋដែលគាត់ស្នើសុំទេ»។
តាមឯកសារដែលលោកនាំមកជាមួយបង្ហាញថា ដីចំនួន១២០ហិកតារនៅភូមិបរទាត់ គឺប្រជាសហគមន៍ជាអ្នកលក់ឲ្យលោកឧត្តមសេនីយ៍តាំងពីឆ្នាំ២០០៤ ហើយអាជ្ញាធរភូមិ ឃុំ និងស្រុក បានចុះហត្ថលេខាលើឯកសារលក់ដីក្នុងនោះ៥០ហិកតារជាដីចម្ការចាស់ដី៣០ហិកតារជាដីដែលអ្នកភូមិកាប់រានរួចជាស្រេច មានឈើមូលកាប់សេសសល់ប្រមាណ៣០ទៅ៤០ដើមនិងមួយចំណែកទៀតគឺជាដីព្រៃឈើមិនទាន់កាប់រាន។
តាមមន្ត្រីតំណាងបញ្ជាក់ថា អ្នកភូមិបានស្នើសុំធ្វើស្ពានចំនួន២ប្រវែង៥២ម៉ែត្រនៅតំបន់នោះជាមួយនឹងផ្លូវមួយខ្សែប្រវែង១៤គីឡូម៉ែត្រទើបលោកប្រមូលឈើចាស់នោះដើម្បីស្នើសុំទៅអាជ្ញាធរខេត្តអារច្រៀកធ្វើស្ពាននិងផ្ទះកម្មករតែប៉ុណ្ណោះ។
យ៉ាងនេះក្តីតាមប្រភពព័ត៌មានដែលវិទ្យុអាស៊ីសេរីទទួលបានសុំមិនឲ្យបញ្ចេញឈ្មោះនៅតែអះអាងថា ឈើដែលរកឃើញនៅការដ្ឋានដាំកៅស៊ូរបស់លោកឧត្តមសេនីយ៍ពិតជាឈើថ្មីហើយមានបរិមាណពី៣០០ទៅ៤០០ម៉ែត្រគូបឯណោះ។
កាលពីថ្ងៃអង្គារ ប្រធានផ្នែកនៃខណ្ឌរដ្ឋបាលព្រៃឈើទទួលបន្ទុកស្រុកលំផាត់ លោក ឡេង យុក មានប្រសាសន៍ថាក្រុមលោករកឃើញឈើមូល៣៨ដើម។
ចំណែកនាយខណ្ឌរដ្ឋបាលព្រៃឈើខេត្តរតនគិរី លោក យូកាស វិមាន នៅថ្ងៃពុធនេះអះអាងថា ៖ «ខាងផ្នែកគេកំពុងតែធ្វើកិច្ចការអស់ហ្នឹង ខេត្តអត់ទាន់បានរាយការណ៍មកខ្ញុំនៅឡើយ»។
មេឃុំសេដា លោក ភុំ ផាន់ មានប្រសាសន៍ថា អ្នកភូមិគឺជាអ្នកលក់ដីហើយដីមួយចំណែកគឺជាតំបន់ព្រៃឈើ ៖ «ដោយសារមានផ្តិតមេដៃប្រជាពលរដ្ឋច្រើននាក់ហើយព្រមព្រៀងតើ បានមេភូមិគេស៊ីញ៉េ មេឃុំស៊ីញ៉េ វ៉ៃត្រាទៅ។ គេលក់ហើយតែមិនស្រួលគេកាប់ឈើហ្នឹងហើយ»។
មន្ត្រីស៊ើបអង្កេតសមាគមអាដហុក លោក ប៉ែន ប៊ុណ្ណារ៍ មានប្រសាសន៍ថា ៖ «សម្ដេចនាយករដ្ឋមន្ត្រី ហ៊ុន សែន លោកថា កុំថាឡើយដីព្រៃសូម្បីតែដីចម្ការវិលជុំដែលប្រើប្រាស់បានតែសហគមន៍ជនជាតិដើមភាគតិចគឺមិនអាចលក់ដូរបានទេ។ បើយើងនិយាយដីព្រៃទៀតគឺជាដីទ្រព្យសម្បត្តិសាធារណៈរបស់រដ្ឋ»។
លោកនាយករដ្ឋមន្រ្តី ហ៊ុន សែន កាលពីពេលថ្មីៗនេះបានប្រកាសនៅក្នុងវេទិកាពិភាក្សាជាមួយប្រទេសផ្តល់ជំនួយថា នឹងដាក់វិធានការមុតមាំបំផុតដើម្បីទប់ស្កាត់ការកាប់បំផ្លាញព្រៃឈើឲ្យបានល្អប្រសើរ៕