ចំនួន​ជន​ភៀស​សឹក​កើន ប្រឈម​បញ្ហា​សុខភាព

មន្ត្រី​មន្ទីរ​សុខាភិបាល​​ខេត្ត​ឧត្តរ​មាន​ជ័យ បាន​ឱ្យ​ដឹង​ថា ជន​ភៀស​សឹក​មួយ​ចំនួន​ចាប់​ផ្តើម​ប្រឈម​មុខ​នឹង​បញ្ហា​សុខភាព។
ដោយ ហង្ស សាវយុត
2011-04-25
អ៊ីម៉ែល
មតិ
Share
បោះពុម្ព

ក្នុង​រយៈ​ពេល ៥ ថ្ងៃ​មក​នេះ ចំនួន​ជន​ភៀស​សឹក​ចេះ​តែ​កើន​ឡើង​នៅ​ស្រប​ពេល ដែល​ស្ថានការណ៍​ប្រយុទ្ធ​គ្នា​រវាង​ទាហាន​ខ្មែរ និង​ថៃ​រឿង​ទំនាស់​ព្រំដែន​នៅ​មិន​ទាន់​ចប់។

មន្ត្រី​មន្ទីរ​សុខាភិបាល​ថ្លែង​ថា ជំងឺ​រលាក​សួត ផ្ដាសាយ និង​ជំងឺ​រាក កំពុង​យាយី​ជន​ភៀស​សឹក ដែល​ស្នាក់​នៅ​ក្នុង​ជំរំ ប្រមូល​ផ្ដុំ​គ្នា​ច្រើន ហើយ​រង​កម្ដៅ​ថ្ងៃ និង​បរិយាកាស​ផ្លាស់​ប្ដូរ​ពួក​គេ​ពុំ​ធ្លាប់​ជួប​ប្រទះ​ពី​មុន​មក។

មន្ត្រី​សាខា​កាកបាទ​ក្រហម​កម្ពុជា​ប្រចាំ​ខេត្ត​ឧត្តរ​មានជ័យ បាន​ឱ្យ​ដឹង​ថា ចំនួន​ជន​ភៀស​សឹក ដែល​គេច​ចេញ​ពី​ការ​ប្រយុទ្ធ​គ្នា​ដ៏​ខ្លាំង​ក្លា​រវាង​ទា​ហាន​ខ្មែរ​-ថៃ​នៅ​តាម​បន្ទាត់​ព្រំដែន រហូត​មកដល់​ពេល​នេះ មាន​ចំនួន​កើន​ឡើង​ជា​ច្រើន​ដង បើ​ប្រៀប​ធៀប​ទៅ​នឹង​ចំនួន​ជន​ភៀស​សឹក​​កាល​ពី​ថ្ងៃ​សុក្រ​ទី ២២ ខែ​មេសា ជា​ថ្ងៃ​ទី​មួយ​ដែល​ការ​ប្រយុទ្ធ​គ្នា​ចាប់​ផ្ដើម។

នៅ​រសៀល​ថ្ងៃ​ច័ន្ទ​ទី ២៥ ខែ​មេសា គណៈកម្មការ​ប្រតិបត្តិ​កាកបាទ​ក្រហម​កម្ពុជា​​ខេត្ត​ឧត្តរ​មានជ័យ លោក ស សេងហ៊ាង មាន​ប្រសាសន៍​​ថា រហូត​មក​ដល់​ថ្ងៃ​នេះ​ ជន​ភៀស​សឹក​មាន​ចំនួន​កើន​ឡើង​ដល់​ជាង ៤៤០០ គ្រួសារ​ស្មើ​នឹង​មនុស្ស​ចំនួន​ជាង ១៧៨០០ នាក់​ហើយ។

ដោយ​សារ​តែ​ចំនួន​ជន​ភៀស​សឹក​កើន​ឡើង​ច្រើន​យ៉ាង​នេះ អាជ្ញាធរ​បាន​រៀបចំ​ជំរំ​ស្នាក់​នៅ​​បណ្ដោះ​អាសន្ន​ចំនួន ៧ កន្លែង សម្រាប់​ទទួល​ប្រជា​ពលរដ្ឋ​ស៊ីវិល​ទាំង​នោះ។
លោក ស សេងហ៊ាង ៖ «នៅ​ស្រុក​បន្ទាយ​អំពិល​មាន​ជំរំ​សាលា​បឋម​សិក្សា​ពោធិ​ថ្មី ៣៧៣ គ្រួសារ។ នៅ​បេង​ពី​ម្សិលមិញ ៦៧៦ គ្រួសារ។ នៅ​វត្ត​គោក​ឪឡោក​ចំនួន ៨១៧ គ្រួសារ។ នៅ​កញ្ជ្រៀច​ខ្ញុំ​ក្ដាប់​អត់​ជាប់​ទេ​កន្លែង​នោះ​អត់​ហ៊ាន​រាយការណ៍​ទេ។ នៅ​វត្ត​គោក​គ ៧៣៣ គ្រួសារ។ នៅ​វត្ត​សំរោង​របាយ​ការណ៍​ចុង​ក្រោយ​យ​ម៉ោង ៥ ជាង​ហើយ ១២៩៥ គ្រួសារ ហើយ​នៅ​សាលា​បឋម​សិក្សា​អូរ​ឫស្សី​ចំនួន​គ្រួសារ ៤០៧»។

មន្ត្រី​ដដែល​បាន​ឱ្យ​ដឹង​ថា ជន​ភៀស​សឹក​ខ្លះ​ទៀត​មិន​ទាន់​បាន​ចូល​ស្នាក់​នៅ​ក្នុង​ជំរំ​នៅ​ឡើយ​ទេ ដោយ​ស្នាក់​នៅ​តាម​ផ្ទះ​បង​ប្អូន និង​មួយ​ចំនួន​ទៀត​បាន​ភៀស​ខ្លួន​ទៅ​ដល់​ឃុំ​បន្ទាយ​ឆ្មារ​ស្រុក​ថ្ម​ពួក​ខេត្ត​បន្ទាយ​មានជ័យ​ឯណោះ។

កាល​ពី​ថ្ងៃ​សុក្រ​ទី ២២ ខែ​មេសា ដែល​ជា​ថ្ងៃ​ទាហាន​ខ្មែរ និង​ថៃ បាន​ប្រយុទ្ធ​គ្នា​ជា​លើក​ដំបូង​នៅ​តំបន់​ព្រំដែន​ប្រាសាទ​តា​មាន់​ធំ និង​ប្រាសាទ​តា​ក្របី ចំនួន​អ្នក​ភៀស​សឹក​ចេញ​ពី​ផ្ទះ​សម្បែង​មាន​ប្រមាណ​ជាង ១១០០ គ្រួសារ​ប៉ុណ្ណោះ​ចូល​ទៅ​ទី​ក្រុង​សំរោង។

មន្ត្រី​កាកបាទ​ក្រហម​កម្ពុជា​បាន​ឱ្យ​ដឹង​ថា គេ​បាន​ផ្តល់​អង្ករ​ប្រមាណ​ជាង ៥០ តោន​ចែក​ជូន​ដល់​ជន​ភៀស​សឹក​ទាំង​នោះ។ ប៉ុន្តែ​ចំនួន​អង្គរ​នោះ​នឹង​មិន​អាច​ឱ្យ​ជន​ភៀស​សឹក​ដ៏​​​ច្រើន​​យក​ទៅ​ដាំបាយ​ទទួល​ទាន​បាន​យូរ​ថ្ងៃ​ឡើយ។

មន្ត្រី​សុខាភិបាល​បាន​ឱ្យ​ដឹង​ថា ជន​ភៀស​សឹក​មួយ​ចំនួន ដែល​កំពុង​ស្នាក់​នៅ​បណ្ដោះ​​អាសន្ន​ក្នុង​ជំរំ​ កំពុង​ប្រឈម​មុខ​នឹង​ជំងឺ។
អនុប្រធាន​មន្ទីរ​សុខាភិបាល​ខេត្ត​ឧត្តរ​មានជ័យ លោក ប្លុង ឆំ បាន​ថ្លែង​ថា គេ​កំពុង​រាយ​បណ្ដាក់​មន្ត្រី​សុខភាព​ជា​ច្រើន​ឱ្យ​ប្រចាំការ​នៅ​តាម​ជំរំ​ជន​ភៀស​សឹក ដើម្បី​ពិនិត្យ និង​ព្យាបាល​ប្រជា​ពលរដ្ឋ​ដែល​មាន​ជំងឺ។

លោក ប្លុង ឆំ ៖ «ជំងឺ​មក​ដល់​ថ្ងៃ​នេះ​មាន​ត្រឹម​ផ្ដាសាយ រលាក​សួត ហើយនិង​ជំងឺ​រាក ដែល​មិន​ជា​ធំ​ដុំ​ទេ គឺ​យើង​ឱ្យ​ថ្នាំ​រាល់​តែ​ថ្ងៃ មាន​ដូច​ជា​ខ្វះ​ជាតិ​ស្ករ ឬ​ក៏​ខ្យល់​គ​អី។ វា​ជា​ទូទៅ​ព្រោះ​កាល​ណា​គាត់​ផ្លាស់​ទី​កន្លែង​មក ដោយ​សារ​យើង​នៅ​ក្នុង​តង់​នៅ​ក្នុង​ជំរំ​ណា​​មនុស្ស​វា​ច្រើន​ទៅ វា​អាច​ផ្លាស់​ប្តូរ​អាកាសធាតុ​វា​ធ្វើ​ឱ្យ​គាត់​មាន​ជំងឺ​គ្រុន​ក្ដៅ​អី​បន្តិច​បន្តួច»។

ប្រធាន​មន្ទីរ​អប់រំ​យុវជន និង​កីឡា​ខេត្ត​ឧត្តរ​មានជ័យ គឺ​លោក អ៊ឹង បូរ៉ាត់ ថ្លែង​ថា ស្រប​ពេល​ដែល​ជន​ភៀស​សឹក​ជា​ច្រើន​បាន​ចាក​ចោល​ផ្ទះ​សម្បែង ដោយ​សារ​តែ​ភ័យ​ខ្លាច​ការ​ប្រយុទ្ធ​គ្នា​រវាង​ទាហាន​ខ្មែរ និង​ថៃ​នោះ បណ្ដាល​ឱ្យ​សាលា​បឋម​សិក្សា​ចំនួន ៦៧ និង​សាលា​មធ្យម​សិក្សា​ចំនួន ១២ ទៀត នៅ​ក្នុង​ស្រុក​ចំនួន ៤ បាន​បិទ​ទ្វា​ផ្អាក​ការ​សិក្សា​បណ្ដោះ​អាសន្ន៕

ព័ត៌មាន (0)
Share
គេហទំព័រ​ទាំងមូល