ចាប់​ពី​ថ្ងៃ​ទី​១៦ ខែ​ធ្នូ ពល​រដ្ឋ​កម្ពុជា-ថៃ ឆ្លង​ដែន​មិន​បាច់​សុំ​ទិដ្ឋាការ

ក្រសួង​ការ​បរទេស​កម្ពុជា បាន​ឲ្យ​ដឹង​ថា ចាប់​ពី​ថ្ងៃ​ទី​១៦ ខែ​ធ្នូ ឆ្នាំ​២០១០ ត​ទៅ ចំពោះ​អ្នក​កាន់​លិខិត​ឆ្លង​ដែន​ធម្មតា អាច​ធ្វើ​ដំណើរ​ឆ្លង​ដែន​ចេញ​ចូល​ប្រទេស​ទាំង​ពីរ កម្ពុជា-ថៃ ដោយ​ពុំ​ចាំ​បាច់​សុំ​ទិដ្ឋាការ​ចេញ​ចូល​​​ទៀត​ទេ។
ដោយ ដែន អយុធ្យា
2010-11-27
អ៊ីម៉ែល
មតិ
Share
បោះពុម្ព
ដោយ សួន សុផល មុន្នី
ច្រក​ព្រំដែន​កម្ពុជា-ថៃ នៅ​ក្រុង​ប៉ោយប៉ែត

សេចក្ដី​ប្រកាស​ព័ត៌មាន​ចុះ​ថ្ងៃ​ទី​២៦ ខែ​វិច្ឆិកា របស់​ក្រសួង​ការ​បរទេស​កម្ពុជា បាន​ឲ្យ​ដឹង​ថា ចំពោះ​ពល​រដ្ឋ​កម្ពុជា ដែល​មាន​បំណង​ស្នាក់​​នៅ​ប្រទេស​ថៃ​ក្រោម ១៤​ថ្ងៃ គឺ​មិន​ចាំ​បាច់​ចំណាយ​លុយ​ទៅ​លើ​ថ្លៃ​សុំ​ទិដ្ឋាការ​ទៀត​ទេ ចាប់​ពី​ថ្ងៃ​ទី​១៦ ខែ​ធ្នូ ឆ្នាំ​២០១០។ ប៉ុន្តែ​សម្រាប់​អ្នក​ស្នាក់​នៅ​រយៈ​ពេល​យូរ មាន​ន័យ​ថា​លើស​ពី​រយៈ​ពេល ១៤​ថ្ងៃ គឺ​ត្រូវ​សុំ​ទិដ្ឋាការ​ចេញ​ចូល​ជា​មុន។

នៅ​ក្រោយ​កិច្ច​ប្រជុំ​កំពូល ACMECS កាល​ពី​ថ្ងៃ​ទី​១៧ ខែ​វិច្ឆិកា រវាង​លោក​នាយក​រដ្ឋ​មន្ត្រី ហ៊ុន សែន និង​លោក​នាយក​រដ្ឋ​មន្ត្រី​ថៃ អាប់​ភិ​ស៊ីត នៅ​វិមាន​សន្តិភាព រដ្ឋ​មន្ត្រី​ការ​បរទេស​កម្ពុជា-ថៃ បាន​ចុះ​ហត្ថលេខា​លើ​កិច្ច​ព្រម​ព្រៀង​លើក​លែង​ទិដ្ឋាការ​រវាង​ប្រទេស​ទាំង​ពីរ។

កិច្ច​ព្រមព្រៀង​នេះ​សំដៅ​លើ​ការ​លើក​លែង​ទិដ្ឋាការ សម្រាប់​អ្នក​កាន់​លិខិត​ឆ្លង​ដែន​ធម្មតា​របស់​ប្រជា​ពល​រដ្ឋ​ទូទៅ​កម្ពុជា និង​ថៃ​ដោយ​កិច្ច​ព្រមព្រៀង​នេះ នឹង​ចូល​ជា​ធរមាន​រយៈ​ពេល ៣០​ថ្ងៃ បន្ទាប់​ពី​បាន​ចុះ​ហត្ថ​លេខា។

លោក កុយ គួង មន្ត្រី​នាំ​ពាក្យ​ក្រសួង​ការ​បរទេស​កម្ពុជា មាន​ប្រសាសន៍​ឲ្យ​ដឹង​ពី​គោល​នយោបាយ​លើក​លែង​ទិដ្ឋាការ​សម្រាប់​អ្នក​កាន់​លិខិត​ឆ្លង​ដែន​ធម្មតា​ដូច្នេះ ៖ «យ៉ាង​ច្រើន​១៤​ថ្ងៃ យើង​មិន​បាច់​សុំ​ទិដ្ឋាការ​ទេ គឺ​យើង​មាន​តែ​លិខិត​ឆ្លង​ដែន​ចូល​តាម​ច្រក​ព្រំដែន​​​​​​តាម​ប្រលាន​យន្ត​ក៏បាន តាម​ច្រក​ផ្លូវ​គោក​ក៏​បាន ផ្លូវ​អាកាស​ក៏​បាន។ យើង​មិន​បាច់​មាន​ទិដ្ឋាការ​អី​ទេ នេះ​សម្រាប់​រយៈ​​ពេល ១៤​ថ្ងៃ​ចុះ​ក្រោម។ តែ​បើ​យើង​មាន​ផែន​ការ​ណា​មួយ​ចង់​ស្នាក់​នៅ​ប្រទេស​ថៃ​លើស​ពី ១៤​ថ្ងៃ ត្រូវ​តែ​សុំ​ទិដ្ឋាការ​ជា​មុន​ដូច​ធម្មតា»

លោក ថូ ភីលីប អ្នក​ចាត់​ការ​ទូទៅ​សណ្ឋាគារ​ឯករាជ្យ នៅ​ខេត្ត​ព្រះសីហនុ មាន​ប្រសាសន៍​ដោយ​បាន​សាទរ​ចំពោះ​គោល​នយោបាយ​របស់​រដ្ឋាភិបាល​ប្រទេស​ទាំង​ពីរ ពី​ការ​លើក​លែង​ទិដ្ឋាការ សម្រាប់​អ្នក​កាន់​លិខិត​ឆ្លង​ដែន​ធម្មតា​ពេល​នេះ។ លោក​ថា គោល​នយោបាយ​នេះ​អាច​នាំ​ឲ្យ​ចំនួន​ភ្ញៀវ​ទេសចរ​កើន​ច្រើន​នៅ​កម្ពុជា ជា​ពិសេស​អាច​ជួយ​សម្រួល​ដល់​ការ​ធ្វើ​ដំណើរ​ឆ្លង​ដែន​ទៅ​វិញ​ទៅ​មក របស់​ពល​រដ្ឋ​កម្ពុជា និង​ថៃ ៖ «ល្អ​សម្រាប់​ខ្មែរ​យើង។ ណា​មួយ​ក្នុង​ពេល​ដែល​យើង​មាន​ទំនាស់​ប្រទេស​ទាំង​ពីរ ធ្វើ​ឲ្យ​ទំនាក់​ទំនង​ល្អ​ឡើង​វិញ​ចំពោះ​ប្រជា​ជាតិ។ ខ្ញុំ​គិត​ថា​ល្អ​មែនទែន ហើយ​ចំនួន​ទេសចរណ៍​អាច​កើន​ឡើង គឺ​កើន​ឡើង​ច្រើន​ថែម​ទៀត»

ដូច​គ្នា​ការ​អះអាង​ខាង​លើ លោក ប្រុស ពៅ ជា​អាជីវករ​លក់​ដូរ​សំលៀក​បំពាក់​ស្ត្រី នៅ​ផ្សារ​រ៉ុងគ្លឿ ប្រទេស​ថៃ មាន​ប្រសាសន៍​ឲ្យ​វិទ្យុ​អាស៊ី​សេរី​ដឹង​តាម​ទូរស័ព្ទ​នៅ​ថ្ងៃ​ទី​២៧ ខែ​វិច្ឆិកា​ថា កិច្ច​ព្រមព្រៀង​មិន​យក​ថ្លៃ​ទិដ្ឋាការ រវាង​កម្ពុជា-ថៃ ក្រៅ​ពី​បង្ក​លក្ខណៈ​ងាយ​ស្រួល​ឲ្យ​ពល​រដ្ឋ​ទាំង​ពីរ​ប្រទេស​ធ្វើ​ដំណើរ​ឆ្លង​កាត់​ព្រំដែន។ កិច្ច​ព្រមព្រៀង​នេះ ក៏​អាច​នាំ​ឲ្យ​ចំនួន​ភ្ញៀវ​ទេសចរ​ចូល​មក​ទស្សនា​កម្ពុជា​កាន់​តែ​ច្រើន​ថែម​ទៀត ៖ «បើ​ធ្វើ​បាន​អ៊ីចឹង​ក៏​ល្អ​ដែរ ជា​ការ​ងាយ​ស្រួល​ដែរ។ ព្រោះ​ខ្មែរ​យើង​ចូល​ទៅ​ស្រុក​គេ​គឺ​រាប់​រយ​រាប់​ពាន់ សូម្បី​ក៏​មាន​ជម្លោះ​ក៏​ដោយ​ក៏​ក្នុង​១​ថ្ងៃ យើង​ធ្វើ​វីសា យើង​ធ្វើ​ប៉ាសស្ព័រ​រាល់​ថ្ងៃ យើង​ចូល​ទៅ​ស្រុក​គេ​រហូត»

មន្ត្រី​ក្រសួង​ការ​បរទេស​ឲ្យ​ដឹង​ថា កន្លង​មក​ប្រទេស​កម្ពុជា​បាន​ចុះហត្ថលេខា​លើក​លែង​ទិដ្ឋាការ​សម្រាប់​លិខិត​ឆ្លង​ដែន​ធម្មតា ជា​មួយ​ប្រទេស​សមាជិក​អាស៊ាន​ទាំង​១០ បាន​ចំនួន ៧​ប្រទេស​ហើយ រួម​មាន ប្រទេស​ម៉ាឡេស៊ី សិង្ហបុរី ហ្វីលីពីន លាវ វៀតណាម ឥណ្ឌូណេស៊ី និង​ថៃ។ រីឯ​ប្រទេស​មីយ៉ាន់ម៉ា និង​ប្រទេស​ប្រ៊ុយណេ​នៅ​មិន​ទាន់​ចុះ​កិច្ច​ព្រមព្រៀង​លើក​លែង​ទិដ្ឋាការ​នោះ​ទេ។

លោក កុយ គួង បន្ត​ថា ចំពោះ​លិខិត​ឆ្លង​ដែន​ការ​ទូត និង​ផ្លូវ​ការ ក្នុង​ចំណោម​ប្រទេស​សមាជិក​អាស៊ាន​ទាំង​១០ កម្ពុជា បាន​ចុះ​កិច្ច​ព្រមព្រៀង​លើក​លែង​ទិដ្ឋាការ​លើ​ប្រភេទ​លិខិត​ឆ្លង​ដែន​ទាំង​ពីរ​នេះ​រួច​ហើយ៕

ព័ត៌មាន (0)
Share
គេហទំព័រ​ទាំងមូល