មន្ត្រីអង្គការឃ្លាំមើលការពារសម្បត្តិធនធានធម្មជាតិនៅកម្ពុជា លោក កែវ យ៉ា ដែលបានដឹកនាំមន្ត្រី៦នាក់ចុះល្បាតឃ្លាំមើលពីការកាប់រានព្រៃឈើខុសច្បាប់បានចោទថា មន្ត្រីនគរបាលឃុំភ្ញីមាសចំនួនបីរូបបានស្ទាក់បាញ់ចំនួនបីគ្រាប់មកលើក្រុមល្បាតរបស់លោកនៅចំណុចព្រែកអារឹត ភូមិតានី ឃុំភ្ញីមាស ស្រុកគិរីសាគរ នៅវេលាម៉ោង៩ព្រឹកថ្ងៃអាទិត្យ ទី២១ ធ្នូ ដោយធ្វើឲ្យមន្ត្រីល្បាតរបស់លោកម្នាក់ឈ្មោះ កែវ កយ អាយុ២៧ឆ្នាំ របួសត្រង់ពោះជាទម្ងន់។
លោក កែវ យ៉ា បានឲ្យដឹងថា ៖ «ខ្ញុំកំពុងតែបើកទូកស្រាប់តែឮសូរផូងៗបីគ្រាប់។ បីគ្រាប់ហើយក៏ខ្ញុំថា គេបាញ់ហើយពួកយើងនាំគ្នាថត។ ដល់ថតហើយវារត់ចូលព្រៃកោងកាងព្រូអស់រលីង តែខ្ញុំឃើញស្លៀកពាក់ឯកសណ្ឋានប៉ូលិស ឃើញពីក្រោយខ្នង»។
ប្រធានប៉ុស្តិ៍នគរបាលឃុំភ្ញីមាស លោក ទូច ភី បានបដិសេធថាមន្ត្រីនគរបាលរបស់លោកមិនបានបាញ់ប្រហារទៅលើក្រុមឃ្លាំមើលធនធានធម្មជាតិនោះទេដោយអះអាងថា កម្លាំងនគរបាលទាំងប្រាំនាក់របស់លោកនៅប្រចាំការនៅការិយាល័យទាំងអស់។
លោក ទូច ភី បានមានប្រសាសន៍ថា ៖ «កម្លាំងនៅផ្ដុំមូលគ្នាទាំងអស់ កម្លាំងអត់ចេញទៅណាផង និយាយការពិតតែម្ដង ព្រោះកម្លាំងនៅមូលគ្នាទាំងអស់»។
អភិបាលស្រុកគិរីសាគរ ខេត្តកោះកុង លោក ឆេង ឆិ បានឲ្យដឹងថា លោកបានសាកសួរទៅប្រធានប៉ុស្តិ៍នគរបាលឃុំភ្ញីមាស លោក ទូច ភី ដែលបានប្រាប់លោកថា កម្លាំងប៉ូលិសស្ថិតនៅប្រចាំការនៅប៉ុស្តិ៍ទាំងអស់ ហើយថាលោកក៏ទើបតែទទួលបានរបាយការណ៍ពីការបាញ់ប្រហារនោះដែរ។
លោក ទូច ភី បានបញ្ជាក់ថា ៖ «ប៉ូលិសគេថាកម្លាំងគេតែ៥នាក់គេនៅកន្លែងគ្រប់ចំនួន ហើយខ្ញុំតេទៅរាយការណ៍ទៅស្នងការដែរឲ្យគេចុះមកស្រាវជ្រាវមិនដឹងយ៉ាងម៉េច»។
ស្នងការនគរបាលខេត្តកោះកុង លោក សំ ភិតវៀន បានឲ្យដឹងថា លោកមិនទាន់ទទួលបានរបាយការណ៍ណាមួយទាក់ទងនឹងការបាញ់ប្រហារនោះឡើយ។
លោក សំ ភិតវៀន បានមានប្រសាសន៍ថា ៖ «អត់ទេ បើសិនជាប៉ូលិសខ្ញុំ គឺប៉ូលិសគឺត្រូវទទួលខុសត្រូវហើយចំពោះជនណាដែលបានប្រព្រឹត្តអំពើថោកទាបអ៊ីចឹង ក៏ប៉ុន្តែបើសិនជារបាយការណ៍ហ្នឹងវាច្រើនតែជាពាក្យចចាមអារ៉ាមថោកទាប អាហ្នឹងក៏ថោកទាបដូចគ្នាដែរ»។
ប្រធានអង្គការឃ្លាំមើលការពារសម្បត្តិធនធានធម្មជាតិនៅកម្ពុជា លោក ជា ហៀន បានឲ្យដឹងថា លោកនឹងដាក់ពាក្យបណ្ដឹងទៅព្រះរាជអាជ្ញាខេត្តកោះកុងពីករណីបាញ់ប្រហារមកលើក្រុមមន្ត្រីរបស់លោកនោះ។
លោក ជា ហៀន បានឲ្យដឹងថា កន្លងមកលោកធ្លាប់បានដាក់ពាក្យបណ្ដឹងទៅតុលាការខេត្តចោទប្រកាន់នគរបាលឃុំភ្ញីមាសពីបទកាប់បំផ្លាញព្រៃឈើក្នុងព្រៃទំហំជាង២០០ហិកតានៅឃុំភ្ញីមាស ស្រុកគិរីសាគរ ខេត្តកោះកុងនោះ ហើយថាការកាប់បំផ្លាញព្រៃឈើនោះកំពុងតែកើតមានឡើងយ៉ាងគគ្រឹកគគ្រេង។
មន្ត្រីអង្គការសិទ្ធិមនុស្សអាដហុក លោក ប៊ី សុភាព បានឲ្យដឹងថា លោកនឹងធ្វើការសាកសួរទៅលើជនរងគ្រោះដើម្បីតាមដានថាតើពិតជាមានការបាញ់ប្រហារនោះកើតឡើងមែនដែរឬទេ។
អ្នករងរបួសឈ្មោះ កែវ កយ នៅល្ងាចថ្ងៃអាទិត្យនេះត្រូវបានបញ្ជូនមកមន្ទីរពេទ្យបង្អែកខេត្តកោះកុងដើម្បីទទួលការព្យាបាល៕