មេឃុំ​នៅ​ខេត្ត​ក្រចេះ​រង​ការ​ចោទ​ថា បង្ក​ការ​លំបាក​ដល់​ពលរដ្ឋ

តំណាង​ប្រជាពលរដ្ឋ​នៅ​ឃុំ​ចង្រ្កង ស្រុក​ក្រចេះ ខេត្ត​ក្រចេះ បាន​រិះគន់​និង​ចោទ​ប្រកាន់​មេឃុំ​របស់​ខ្លួន​ថា បាន​បង្ក​បញ្ហា​លំបាក​ដល់​ប្រជាពលរដ្ឋ​ក្នុង​ការ​ចុះ​ហត្ថលេខា​ប្រគល់​ដី​ទៅ​ឲ្យ​ក្រុមហ៊ុន។

0:00 / 0:00

ការ​ចោទ​ប្រកាន់​នេះ​បាន​កើត​មាន​ឡើង​បន្ទាប់​ពី​មាន​ក្រុមហ៊ុន​មួយ​បាន​ចូល​ទៅ​ឈូស​ឆាយ​ដី​នៅ​ក្នុង​ឃុំ ហើយ​ត្រូវ​ប្រជាពលរដ្ឋ​នាំ​គ្នា​រារាំង​ដោយ​ចោទ​ប្រកាន់​ថា ក្រុមហ៊ុន​មក​ឈូស​ឆាយ​នោះ​គឺ​មេឃុំ ចុះ​ហត្ថលេខា​ផ្ដល់​ដី​ឲ្យ​ក្រុមហ៊ុន​ដោយ​ខ្វះ​ការ​ពិភាក្សា។

លោក យង់ សំអាន តំណាង​ប្រជាពលរដ្ឋ​បាន​ចោទ​ប្រកាន់​ថា មេឃុំ​ជា​អ្នក​បង្ក​នូវ​បញ្ហា​នេះ​ជាមួយ​ប្រជាពលរដ្ឋ ៖ «មេឃុំ​អ្នក​បង្ក​រឿង​នេះ​ឡើង​អត់​មាន​សួរ​មតិ​ប្រជាពលរដ្ឋ​នៅ​ក្នុង​មូលដ្ឋាន​ឃុំ​របស់​ខ្លួន។ ក្រុមប្រឹក្សា​ឃុំ​ទាំង​អស់ គេ​មិន​បាន​ដឹង មិន​បាន​ប្រាប់​ទេ»

ហើយ​ការ​ចោទ​ប្រកាន់​នេះ​ដែរ បាន​កើត​ឡើង​បន្ទាប់​ពី​មាន​ដីកា​របស់​អាជ្ញាធរ​ខេត្ត​កោះ​អញ្ជើញ​តំណាង​ប្រជាពលរដ្ឋ ៥​នាក់ ឲ្យ​ចូល​សាលា​ខេត្ត​នៅ​ថ្ងៃ​ទី​២២ ធ្នូ ដើម្បី​ឲ្យ​បំភ្លឺ​ពី​បណ្ដឹង​ចោទ​ប្រកាន់​ថា បាន​រំលោភ​បំពាន​ទៅ​លើ​ដី​ធ្លី​របស់​ក្រុមហ៊ុន​ទៅ​វិញ ដែល​ការ​កោះ​អញ្ជើញ​នោះ លោក កុយ ឃ្លោក តំណាង​ប្រជាពលរដ្ឋ​អះអាង​ថា ពួក​គាត់​នឹង​ទៅ​ជម្រាប​អាជ្ញាធរ​ខេត្ត​ពី​ភាព​មិន​ស្មោះត្រង់​របស់​មេឃុំ ដែល​ធ្វើ​ឲ្យ​ក្រុមហ៊ុន​មើល​ងាយ​ប្រជាពលរដ្ឋ​ទូទាំង​ឃុំ។

លោក កុយ ឃ្លោក មាន​ប្រសាសន៍​ដូច្នេះ​ថា ៖ «បើ​សិន​ជា​មិន​មាន​ការ​ចុះ​ហត្ថលេខា​អស់​លោក​ខាង​ស្រុក និង​ខេត្ត​មិន​ហ៊ាន មក​យក​ដី​នេះ ដើម្បី​ប្រគល់​ឲ្យ​ក្រុមហ៊ុន។ ក្រុមហ៊ុន​ថា ក្រុម​វា​ដៀល​ថា មេឃុំ​សម្រែ ថា ប្រជាពលរដ្ឋ​ទាំង​អស់​ហ្នឹង បោះឆ្នោត​មិន​ជ្រើស​រើស បោះឆ្នោត​ហ្នឹង​មិន​មើល បោះឆ្នោត​ខុស បាន​ជា​គេ​យក​ដី​អស់»

មេឃុំ​ចង្រ្កង លោក សុខ រ៉ត បាន​មាន​ប្រតិកម្ម​តប​វិញ​ថា លោក​បាន​ចុះ​ហត្ថលេខា​លើ​លិខិត​ស្នើសុំ​អភិវឌ្ឍន៍​របស់​ក្រុមហ៊ុន​នោះ​មែន ដោយ​លោក​យល់​ថា នោះ​ជា​គោលការណ៍​អភិវឌ្ឍន៍​របស់​រដ្ឋាភិបាល ហើយ​អ្វីៗ​វា​ត្រូវ​បាន​គេ​សម្រេច​ពី​ថ្នាក់​លើ​រួច​អស់​មក​ហើយ​ដែរ ប៉ុន្តែ​លោក​ថា បើ​សិន​ជា​ប្រជាពលរដ្ឋ​តវ៉ា​ដល់​ទី​ណា​លោក​នឹង​ដើរ​ទៅ​ដល់​ទៅ​នោះ​ដែរ។ ក្នុង​នោះ លោក​ក៏​បាន​បន្ទោស​ប្រជាពលរដ្ឋ​ថា បាន​ធ្វើ​ខុស​ទៅ​នឹង​ច្បាប់។

លោក សុខ រ៉េត មាន​ប្រសាសន៍​ថា ៖ «បើ​និយាយ​ពី​ច្បាប់​គាត់​ខុស​ហើយ ដោយសារ​ដី​ហ្នឹង​ជា​ដី​របស់​រដ្ឋ គាត់​ទន្រ្ទាន​យក​ដី​នោះ បើ​ច្បាប់​ភូមិបាល​វា​ខុស»

សូម​ជម្រាប​ថា កាល​ពី​ថ្ងៃ​ទី​១៩ ធ្នូ ក៏​មាន​ដីកា​របស់​អាជ្ញាធរ​ខេត្ត​បាន​កោះ​អញ្ជើញ​តំណាង​ប្រជាពលរដ្ឋ​ទាំង ៥​នាក់​នោះ ឲ្យ​ចូល​បំភ្លឺ​ម្ដង​រួច​មក​ហើយ​ដែរ ប៉ុន្តែ​មិន​មាន​អ្នក​តំណាង​ណា​មួយ​បាន​ចូល​ទៅ​បំភ្លឺ​ឡើយ ដោយ​អះអាង​ថា ប្រជាពលរដ្ឋ​ខ្លាច​មាន​ការ​ចាប់​ខ្លួន។

ក្រុមហ៊ុន ហាក់មុន្នី plantation បាន​ទទួល​ការ​សិក្សា​អភិវឌ្ឍន៍​លើ​ផ្ទៃ​ដី​ចំនួន ៦២៣​ហិកតារ​ដើម្បី​ដាំ​ដុះ​កៅស៊ូ​នៅ​ឃុំ​ចង្រ្កង តែ​ត្រូវ​បាន​ប្រជាពលរដ្ឋ​និង​ក្រុមប្រឹក្សា​ឃុំ​មួយ​ចំនួន​ចោទ​ប្រកាន់​ថា ការ​អភិវឌ្ឍ​នោះ​មេឃុំ​មិន​បាន​សិក្សា​ពី​ផល​ប៉ះពាល់​ជាមួយ​នឹង​ប្រជាពលរដ្ឋ​និង​ក្រុមប្រឹក្សា​ឃុំ​ឡើយ៕