ស្តីពីរឿងនេះ លោក អង្គរ រដ្ឋា ម្ចាស់ស្ថានីយវិទ្យុនេះ បានឲ្យដឹងថា លោកកំពុងស្វះស្វែងរកអន្តរាគមន៍ដើម្បីឲ្យស្ថានីយលោកអាចចេញផ្សាយវិញ ៖ «ខ្ញុំបានប្រាប់សមាគមអ្នកកាសែតដើម្បីឲ្យជួយអន្តរាគមន៍ និង NGOs ព្រមទាំងស្ថាប័នព័ត៌មានទាំងឡាយ ព្រមទាំងយើងសុំឲ្យស្ថានទូតនានា ជួយអន្តរាគមន៍ផង» ។
កញ្ញា គឹម សុមាលី នាយិការងស្ថានីយវិទ្យុមួយនេះ បានឲ្យដឹងថា មានអ្នកស្តាប់វិទ្យុដែលសុំមិនបញ្ចេញឈ្មោះ បានទូរស័ព្ទប្រាប់មុនថា ឲ្យប្រុងប្រយ័ត្នព្រោះគេបានត្រៀមប៉ូលិសមួយក្រុមដើម្បីទប់ទល់នឹងការមិនព្រមបិទការផ្សាយរបស់វិទ្យុនេះ ។
ដោយមានដំណឹងជាមុននេះ អ្នកទទួលខុសត្រូវក៏បានសម្រេចថា ត្រូវតែបិទការផ្សាយភ្លាមៗជាពិសេស បន្ទាប់ពីមន្ត្រីនៃមន្ទីរព័ត៌មានមួយក្រុម រួមទាំងអាជ្ញាធរស្រុកក្រចេះ បានចូលរួមអានសេចក្តីប្រកាសរបស់ក្រសួងព័ត៌មានចប់ ។
ប្រតិកម្មទៅនឹងការបិទស្ថានីយវិទ្យុអង្គររដ្ឋានេះ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា រដ្ឋាភិបាលនិងអាជ្ញាធរមូលដ្ឋានមានឆន្ទៈមិនចង់ឲ្យប្រជាពលរដ្ឋយល់ដឹងពីបញ្ហាដែលកំពុងតែមានក្នុងប្រទេសកម្ពុជា ហើយការបិទនេះជាការគំរាមកំហែងយ៉ាងធ្ងន់ធ្ងរចំពោះសេរីភាពសារព័ត៌មានដើម្បីទុកឲ្យប្រជាពលរដ្ឋនៅតែងងឹតល្ងង់និងភ័យខ្លាច ៖ «បើសិនជារាជរដ្ឋាភិបាល ដូចសម្ដេចនាយកតែងតែថា បើចិត្តសឿងយើងគួរតែផ្ដលឱកាសឲ្យប្រជាពលរដ្ឋជាអ្នកសម្រេចថា តើអ្វីដែលរដ្ឋាភិបាលកំពុងតែធ្វើ ជាដំណើរឈានទៅរកភាពរុងរឿងពិតប្រាកដ ឬមួយក៏គ្រាន់តែជាការបោកប្រាស់របស់អ្នកកាន់អំណាច ។ ដោយសារការបោកប្រាស់របស់អ្នកកាន់អំណាចធ្វើទៅកើត ដោយសាររារាំងមិនឲ្យបញ្ហាពិតត្រូវបានផ្សព្វផ្សាយ ត្រូវបានឲ្យប្រជាពលរដ្ឋជាអ្នកវិនិច្ឆ័យដោយខ្លួនឯង ។ ដូច្នេះ ខ្ញុំឃើញថា ការដែលយើងលើកឡើងនូវដៃឆ្វេង យើងនិយាយផ្សេង ដៃស្ដាំយើងអនុវត្តផ្សេងនោះ ខ្ញុំថាជាប្រភពនៃបញ្ហា ហើយជាគោលការណ៍ដែលសេសសល់ពីក្អែលកុម្មុយនីស្ត ដែលយើងនៅតែមាននៅឡើយនៅពេលបច្ចុប្បន្ននេះ» ។
ចំពោះលោកស្រីវេជ្ជបណ្ឌិត ពុង ឈីវកេក ប្រធានអង្គការសិទ្ធិមនុស្ស លីកាដូ វិញ ការបិទស្ថានីយអង្គររដ្ឋានៅខេត្តក្រចេះគឺជារឿងគួរឲ្យសោកស្តាយ ៖ «ខ្ញុំមានការសោកស្ដាយ ដោយសាររដ្ឋាភិបាលយើងបានបិទស្ថានីយវិទ្យុនេះ ព្រោះអីនេះផ្ទុយនឹងកតិកាសញ្ញាស្ដីពីសិទ្ធិប្រជាពលរដ្ឋ និងសិទ្ធិនយោបាយ ដែលរដ្ឋាភិបាលយើងបានចុះសច្ចាប័ន តាំងពី ៩២ ។ អ៊ីចឹងប៉ះពាល់ដល់សេរីភាពក្នុងការទទួលព័ត៌មាននិងសេរីភាពក្នុងការបញ្ចេញមតិ ជាពិសេសមុនពេលបោះឆ្នោត» ។
ម្ចាស់ស្ថានីយវិទ្យុលោក អង្គរ រដ្ឋា ក៏បានឲ្យដឹងដែរថា លោកបានជួបជាមួយនឹងប្រធានខុទ្ទកាល័យរបស់លោករដ្ឋមន្រ្តី ខៀវ កាញារីទ្ធ ហើយមន្ត្រីរូបនេះ បានសន្យាថា នឹងពិចារណានិងពិភាក្សាជាមួយលោករដ្ឋមន្ត្រីក្រសួងព័ត៌មានស្តីពីការបើកវិទ្យុនេះឡើងវិញ ៕