ពលរដ្ឋជិត៥០នាក់នៅបាត់ដំបងស្នើឲ្យអាជ្ញាធរអន្តរាគមន៍កាត់ព្រំប្រទល់ដី
2008.12.30
ការស្នើសុំនេះបានធ្វើឡើងខណៈដែលអ្នកភូមិជិត៥០នាក់បានធ្វើដំណើរមកសាលាស្រុកបាណន់ នាព្រឹកថ្ងៃអង្គារ ទី៣០ ខែធ្នូ បន្ទាប់ពីក្រុមអ្នកភូមិបានដឹងថា ដីនៅចំណុចនោះត្រូវអាជ្ញាធរខេត្តបាត់ដំបងបានចុះបោះបង្គោលព្រំប្រគល់ទៅស្រុកគាស់ក្រឡ។
តំណាងប្រជាពលរដ្ឋនៅចំណុចឆករកា លោក ទី ចំរ៉ុង បានថ្លែងថា ការវាស់ព្រំកាត់ដីនៅចំណុចដីខាងលើនោះបានធ្វើឲ្យមានការលំបាកដល់អ្នកភូមិ។
លោក ទី ចំរ៉ុង បានមានប្រសាសន៍ថា ៖ «បញ្ហាដែលភ័យខ្លាចនោះគឺក្រុមមួយចំនួនដែលគាត់លួចធ្វើប្លង់មិនបានកាប់ឆ្ការអីទេ តែចងប្លង់លើដីពួកខ្ញុំគាត់ធ្វើនៅខាងគាស់ក្រឡ បញ្ហាដែលពួកខ្ញុំភ័យត្រង់ហ្នឹងឯង។ ពលរដ្ឋខ្ញុំដែលរស់នៅនៅហ្នឹងគឺក្រោមការគ្រប់គ្រងរបស់អាជ្ញាធរឃុំចែងមានជ័យ សូម្បីតែបំពេញសំណុំបែបបទអ្វី ឬក៏ធ្វើពាក្យកាន់កាប់បណ្ដោះអាសន្នអីលើដីចំណុចហ្នឹង គឺនៅក្នុងឃុំចែងមានជ័យ»។
ចំណែកឯតំណាងអ្នកភូមិនៅចំណុចអណ្តូងកន្ទួត លោកស្រី ហែម សុខន បានឲ្យដឹងថា ប្រជាពលរដ្ឋទាំង៤៩៦គ្រួសារបានបដិសេធមិនព្រមឲ្យដីនៅចំណុចទាំង៤ខាងលើស្ថិតនៅក្រោមការគ្រប់គ្រងរបស់អាជ្ញាធរស្រុកគាស់ក្រឡទេ។
លោកស្រី ហែម សុខន បានបញ្ជាក់ថា ៖ «ពលរដ្ឋទាំងអស់នោះគឺមិនទៅខាងគាស់ក្រឡទេ មិនទៅដោយសារប្រើរយៈពេលឆ្ងាយ។ មូលហេតុដែលកាត់ចូលមកស្រុកបាណន់ ទី១ ងាយស្រួលធ្វើដំណើរ ហើយទី២ បោះឆ្នោតមណ្ឌលនៅឃុំចែងមានជ័យដែលជាស្រុករបស់ខ្លួន ហើយទី៣ទៀត សាលារៀន មន្ទីរសេវាសុខភាព និងការលក់ដូរទំនិញតូចធំអីបានឆាប់ងាយស្រួល»។
លោក មិល សុផល ប្រធានការិយាល័យភូមិបាលស្រុកបាណន់ បានឲ្យដឹងថា កាលពីថ្ងៃទី១២ ខែធ្នូកន្លងទៅ គណៈកម្មការការងារខេត្តនិងអាជ្ញាធរមូលដ្ឋានបានចុះបោះបង្គោលនៅលើដីចំណុចដីឆករកាដែលព្រំដីចម្ងាយជិត៤គីឡូម៉ែត្រតាមផែនទីដែលមានស្រាប់។
លោក មិល សុផល បានមានប្រសាសន៍ថា ៖ «ការបោះបង្គោលហ្នឹងខាងឯកឧត្ដមអភិបាលខេត្តគាត់បានមានប្រសាសន៍ថាឲ្យបោះសិន ក៏ប៉ុន្តែយើងបោះយកផែនទីជាមូលដ្ឋាន យើងបោះតាមផែនទី មិនមែនបោះតាមការចង់បានរបស់ខាងណាម្នាក់ទេ»។
យ៉ាងនេះក្តីតំណាងប្រជាពលរដ្ឋទាំងនោះបានបន្តទាមទារឲ្យអាជ្ញាធរស្រុកអន្តរាគមន៍ទៅអភិបាលខេត្តកាត់ព្រំប្រទល់ដីនៅចំណុចខាងលើឲ្យចូលមកស្រុកបាណន់វិញ។
អភិបាលស្រុកបាណន់ លោក តូច ស៊ុនណារ៉ា ក្រោយពីជួបតំណាងប្រជាពលរដ្ឋចំនួន៦នាក់កាលពីព្រឹកមិញបានថ្លែងថា លោកនឹងបញ្ជូនសំណើរបស់ប្រជាពលរដ្ឋនេះទៅឲ្យលោក ប្រាជ្ញ ច័ន្ទ អភិបាលខេត្តបាត់ដំបងដើម្បីដោះស្រាយ។
លោក តូច ស៊ុនណារ៉ា បានបញ្ជាក់ថា ៖ «ឥឡូវនេះអាជ្ញាធរស្រុកបានទទួលសំណូមពររបស់គាត់ហើយដើម្បីរាយការណ៍ជម្រាបជូនទៅសុំយោបល់ពីឯកឧត្ដមអភិបាលខេត្តដើម្បីមានវិធានការដោះស្រាយបន្ត»។
លោក ប្រាជ្ញ ច័ន្ទ អភិបាលខេត្តបាត់ដំបង មិនអាចទាក់ទងសុំការបញ្ជាក់ភ្លាមៗបានទេ។
គួរបញ្ជាក់ថា ជម្លោះព្រំប្រទល់រវាងស្រុកគាស់ក្រឡនិងស្រុកបាណន់នេះបានកើតមានឡើងជាយូរមកហើយ ចំណែកឯប្រជាពលរដ្ឋកន្លងមកធ្លាប់បានទាមទារឲ្យអាជ្ញាធរមូលដ្ឋានខេត្តរហូតនាំគ្នាដើរទៅទីក្រុងភ្នំពេញដើម្បីឲ្យមានការដោះស្រាយប៉ុន្តែគ្មានលទ្ធផល៕
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត