មន្ត្រីនាំពាក្យសាលាខេត្តបន្ទាយមានជ័យ លោក អ៊ុក កែវរតនៈ បានមានប្រសាសន៍នៅថ្ងៃច័ន្ទ ទី១៧ ខែមករា ឆ្នាំ២០១១នេះថា ការបញ្ជូនខ្លួនលោក ម៉ឹក ដារ៉ា នេះ គឺបានធ្វើឡើងនៅព្រឹកថ្ងៃច័ន្ទ ទី១៧ ខែមករា ឆ្នាំ២០១១នេះ។
លោក អ៊ុក កែវរតនៈ បន្តថា ៖ «តុលាការគាត់បានបំពេញនីតិវិធីដើម្បីសួរព័ត៌មានក្នុងករណីជំហានដំបូងនេះ។ ក្រោយពីសួរព័ត៌មាន ក្រោយរយៈពេលសួរប្រហែលជាពីរម៉ោង នៅម៉ោងប្រមាណ ៩ និង ២០នាទី បញ្ជូនគាត់ទៅផ្ញើទុកនៅពន្ធនាគារខេត្តបន្ទាយមានជ័យ ហើយព្រឹកមិញ (១៧ មករា) ក៏បានបញ្ជូនឯកឧត្តម ម៉ឹក ដារ៉ា បន្តទៅភ្នំពេញវិញ នៅសល់តែប្រធានការិយាល័យប្រឆាំងការជួញដូរគ្រឿងញៀនទេ ក្រសួងមហាផ្ទៃទេ នៅបន្ទាយមានជ័យ»។
កាលពីថ្ងៃទី១៦ ខែមករា ឆ្នាំ២០១១ អង្គភាពប្រឆាំងអំពើពុករលួយរបស់រដ្ឋាភិបាលខ្មែរ បានបញ្ជូនលោក ម៉ឹក ដារ៉ា អតីតប្រធានមន្ទីរប្រយុទ្ធប្រឆាំងគ្រឿងញៀនក្រសួងមហាផ្ទៃ និងលោក ជា ឡេង អតីតប្រធានការិយាល័យប្រយុទ្ធប្រឆាំងគ្រឿងញៀននៃក្រសួងមហាផ្ទៃ ឲ្យទៅតុលាការខេត្តបន្ទាយមានជ័យ ធ្វើការសាកសួរតាមនីតិវិធីអស់រយៈពេលជាច្រើនម៉ោង។
មន្ត្រីនាំពាក្យសាលាខេត្តបន្ទាយមានជ័យដដែលបានបន្តថា លោក ជា ឡេង អតីតប្រធានការិយាល័យប្រយុទ្ធប្រឆាំងគ្រឿងញៀននៃក្រសួងមហាផ្ទៃ ត្រូវបានតុលាការសម្រេចឃុំខ្លួននៅពន្ធនាគារខេត្តបន្ទាយមានជ័យ រង់ចាំការបើកសវនាការ ៖ «គាត់នៅពន្ធនាគារខេត្តបន្ទាយមានជ័យ រង់ចាំការវិនិច្ឆ័យ ព្រោះរឿងហ្នឹងវាគ្រាន់ជាការចោទប្រកាន់ដើម្បីអង្កេត មិនទាន់ឈានទៅដល់សវនាការថា គាត់មានទោសដល់កម្រិតណាក៏អត់មានដែរ»។
អតីតមន្ត្រីប៉ូលិសប្រឆាំងការជួញដូរគ្រឿងញៀន លោក ម៉ឹក ដារ៉ា និងលោក ជា ឡេង ទាំងពីរនាក់ ត្រូវបានក្រសួងមហាផ្ទៃ ចាប់ខ្លួនកាលពីថ្ងៃទី១២ ខែមករា ឆ្នាំ២០១១ ដែលគេសង្ស័យថា មានជាប់ពាក់ព័ន្ធរឿងអាស្រូវក្នុងអំពើពុករលួយក្នុងការបង្រ្កាបការជួញដូរគ្រឿងញៀន។
លោក ម៉ឹក ដារ៉ា អតីតប្រធានមន្ទីរប្រយុទ្ធប្រឆាំងគ្រឿងញៀនក្រសួងមហាផ្ទៃ បានថ្លែងប្រាប់វិទ្យុអាស៊ីសេរី មុនការចាប់ខ្លួនមួយសប្តាហ៍ថា សំណុំរឿងនៃការចុះចាប់គ្រឿងញៀននៅប៉ោយប៉ែត មានចំនួនលើសពី ១៣លានគ្រាប់ ប៉ុន្តែនៅពេលមានការចុះពិនិត្យជាក់ស្តែងឃើញមានតែចំនួន ១៣លានគ្រាប់ខុសពីការពិត។
មន្ត្រីតុលាការខេត្តបន្ទាយមានជ័យ និងមន្ត្រីនៃអង្គភាពប្រឆាំងអំពើពុករលួយរបស់រដ្ឋាភិបាលខ្មែរ បានបដិសេធមិនធ្វើអត្ថាធិប្បាយជុំវិញការចាប់ខ្លួនក្រុមមន្ត្រីប៉ូលិសពាក់ព័ន្ធទៅបញ្ហាគ្រឿងញៀនជាបន្តបន្ទាប់នេះបានទេ។
កាលពីល្ងាចថ្ងៃសុក្រ ទី១៤ ខែមករា ឆ្នាំ២០១១ អតីតស្នងការនគរបាលខេត្តបន្ទាយមានជ័យ លោក ហ៊ុន ហ៊ាន និងលោក ឈៀង សុន ស្នងការរងនគបាលខេត្តបន្ទាយមានជ័យ ត្រូវបានតុលាការខេត្តបន្ទាយមានជ័យ សម្រេចបញ្ជូនទៅឃុំខ្លួនជាបណ្តោះអាសន្ននៅពន្ធនាគារខេត្តសៀមរាប ក្រោយពីតុលាការបានធ្វើការសាកសួរតាមនីតិវីធីរួចមក។
មន្ត្រីនគរបាលនៅស្នងការដ្ឋាននគរបាលខេត្តបន្ទាយមានជ័យចំនួន ៥នាក់ហើយ ត្រូវបានគេចាប់ឃុំខ្លួននៅក្នុងពន្ធនាគារជាបន្តបន្ទាប់ ដោយការចាប់ខ្លួននោះត្រូវគេសង្ស័យថា មានជាប់ពាក់ព័ន្ធទៅករណីជួញដូរ និងបង្ក្រាបគ្រឿងញៀន កាលពីឆ្នាំ២០១០ កន្លងទៅ នៅក្នុងខេត្តបន្ទាយមានជ័យ។
មន្ត្រីសិទ្ធមនុស្សនៃសមាគមអាដហុក លោក ស៊ុំ ចាន់គា បានមានប្រសាសន៍ថា ការចាប់ខ្លួនក្រុមមន្ត្រីនគរបាលជាបន្តបន្ទាប់មកនេះ គឺជាសញ្ញាវិជ្ជមានមួយឆ្ពោះទៅរកការអភិវឌ្ឍប្រទេសដោយត្រឹមត្រូវ និងគោរពតាមច្បាប់។ ទន្ទឹមគ្នានេះ លោកបានស្នើខាងមន្ត្រីពន្ធនាគារ និងតុលាការ ការពារសុវត្ថិភាពអ្នកទាំងនោះនៅពេលជាប់ឃុំក្នុងពន្ធនាគារ និងទាមទារឲ្យតុលាការបើកសវនាការជាសាធារណៈ៕