អាង សុធី អាយុ២៣ឆ្នាំ បានថ្លែងនៅថ្ងៃច័ន្ទថា កាលពីវេលាម៉ោង១យប់នាថ្ងៃទី១៩ ខែកក្កដា ខ្លួននិងគ្នីគ្នាជិត១០នាក់បានជិះរថយន្តកូរ៉េមួយគ្រឿងបន្ទាប់ពីបញ្ចប់ការងារដឹកខោអាវគីបទៅក្នុងទឹកដីថៃ ក៏បើកឡានត្រឡប់មកវិញ។ លុះមកដល់ចំណុចខាងមុខធនាគារអេស៊ីលីដាក្នុងក្រុងប៉ោយប៉ែត ស្រាប់តែមានបុរសពីរនាក់ជិះម៉ូតូមួយគ្រឿង ដៃមានកាន់ដំបងដេញតាមវាយនិងគប់រថយន្ត រួចនាំគ្នាគេចខ្លួនបាត់ទៅ។
សុធី បន្តថា ក្រោយមកពួកខ្លួនក៏នាំគ្នាទៅហូបបង្អែមនៅបរិវេណវត្តប៉ាលេលិយ្យ ក៏ប្រទះឃើញមនុស្សទាំងពីរនាក់នោះ ហើយអំពើហិង្សាក៏កើតឡើង ភ្លាមនោះមានមន្ត្រីប៉េអឹមពីរនាក់បានចូលមក ៤នាក់ផ្សេងទៀតមកតាមក្រោយ ៖ «ចាប់ខ្ញុំដាក់ខ្នោះហើយវ៉ៃខ្ញុំ ទាត់ខ្ញុំ អុកខ្ញុំមួយកាំភ្លើងខ្លីទៀត តែខ្ញុំគេចផុត គេចផុតវាអុកខ្ញុំមួយជង្គង់ចំឆ្អឹងជំនី ខ្ញុំដួល ងើបឡើងវាធាក់ខ្ញុំបាញ់ខ្ញុំពីក្រោយ»។
លោកស្រី ណាំ ស៊ឹម អាយុ៦៥ឆ្នាំ រស់នៅស្រុកខ្សាច់កណ្តាល ខេត្តកណ្តាល ត្រូវម្តាយជនរងគ្រោះ បានថ្លែងថា កូនលោកស្រីបច្ចុប្បន្នកំពុងដេកព្យាបាលនៅមន្ទីរពេទ្យបង្អែកមិត្តភាពកម្ពុជាជប៉ុនមង្គលបុរី។
ណាំ ស៊ឹម បន្តថា លោកស្រីបានដាក់ពាក្យប្តឹងទៅទីបញ្ជាការប៉េអឹមខេត្តហើយដើម្បីទាមទារឲ្យចាត់វិធានការដាក់ទោសប៉េអឹមរូបនោះតាមផ្លូវច្បាប់ ៖ «ចង់ឲ្យច្បាប់ហ្នឹងត្រូវធ្វើយ៉ាងម៉េច ដែលដូចថាអ្នកធំធ្វើរំលោភសិទ្ធិប្រជាជនអ៊ីចឹង?»។
មន្ត្រីប៉េអឹម ឈ្មោះ ចែត្រ សំណាង ដែលរងការចោទប្រកាន់នេះ មិនអាចទាក់ទងបញ្ជាក់បានទេ ប៉ុន្តែលោក ម៉ែន ភិរម្យ មេបញ្ជាការប៉េអឹមប្រចាំទិស អះអាងថា ចែត្រ សំណាង ត្រូវបានដកទៅបញ្ឈរជើងនៅទីបញ្ជាការដ្ឋានកងរាជអាវុធហត្ថខេត្តបន្ទាយមានជ័យហើយ។
លោក ម៉ែន ភិរម្យ អះអាងថា ប៉េអឹមលោកមិនមានបំណងបាញ់មនុស្សទាំងដៃជាប់ខ្នោះទេ ៖ «តាមពិតភ្ជង់ចាប់វាហ្នឹង ដល់វាប្រតាយគ្នាទៅក៏ផ្ទុះបណ្តោយ»។
លោកបន្តថា ជាមួយគ្នានេះសមត្ថកិច្ចក៏បានឃាត់ខ្លួនក្រុមក្មេងស្ទាវបានចំនួន៧នាក់ដែរ។
មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក លោក ស៊ុម ចាន់គា ថ្លែងថាជាកំហុសរបស់ប៉េអឹមដែលប្រើប្រាស់អាវុធមិនបានត្រឹមត្រូវ។
លោក ស៊ុម ចាន់គា បានឲ្យដឹងថា ៖ «ប្រទេសយើងដែលគោរពច្បាប់ ហើយអាជ្ញាធរមានសមត្ថកិច្ចម្នាក់ជាមន្ត្រីយុត្តិធម៌ ដល់ប្រើប្រាស់អ៊ីចឹងគឺជាករណីរំលោភសិទ្ធិមនុស្សធ្ងន់ធ្ងរណាស់»។
លោក ណឹប ណាវី គ្រូពេទ្យវះកាត់នៃមន្ទីរពេទ្យបង្អែកមិត្តភាពកម្ពុជាជប៉ុនមង្គលបុរី បានថ្លែងថា ជនរងគ្រោះកំពុងដេកព្យាបាលមានរបួសធ្ងន់ ហើយដាក់ទុយយោបង្ហូរឈាមពីសួតរយៈពេលពីមួយសប្តាហ៍ទៅ១០ថ្ងៃអស់ឈាមពីមុខរបួសក្នុងសួត។
មន្ត្រីសិទ្ធិមនុស្សបានថ្លែងថា សមាគមសិទ្ធិមនុស្សអាដហុកមិននៅស្ងៀមឡើយ ហើយពួកគេកំពុងស្រាវជ្រាវស៊ើបអង្កេតជុំវិញរឿងនេះ៕