សាលាក្ដី​ទទួល​សំណើ​សុំ​ធ្វើ​ជា​ដើម​បណ្ដឹង​ក្នុង​សំណុំ​រឿង​០០២​ជិត​៤​ពាន់

សហ​ចៅក្រម​ស៊ើប​អង្កេត​នៃ​សាលាក្ដី​ខ្មែរ​ក្រហម​បាន​សម្រេច​ទទួល​យក​ទៅ​ពិនិត្យ​នូវ​សំណើ​របស់​ជន​រងគ្រោះ​ក្នុង​របប​ខ្មែរ​ក្រហម​ចំនួន ៣.៩៨៨​នាក់ ដែល​សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​សម្រាប់​សំណុំ​រឿង​០០២។
ដោយ ឡេង ម៉ាលី
2010-08-31
អ៊ីម៉ែល
មតិ
Share
បោះពុម្ព
សាលា​ក្ដី​ខ្មែរ​ក្រហម​បើក​សវនាការ​លើ​ករណី​មេ​គុក​ទួលស្លែង ឌុច កាល​ពី​ថ្ងៃ​២៣ វិច្ឆិកា ២០០៩។
សាលា​ក្ដី​ខ្មែរ​ក្រហម​បើក​សវនាការ​លើ​ករណី​មេ​គុក​ទួលស្លែង ឌុច កាល​ពី​ថ្ងៃ​២៣ វិច្ឆិកា ២០០៩។
Courtesy of ECCC

ការ​សម្រេច​ទទួល​យក​សំណើ​សុំ​ទាំង​នេះ ត្រូវ​បាន​ប្រកាស​ឱ្យ​ដឹង​ដោយ​សហ​ចៅក្រម​ស៊ើប​អង្កេត តាម​រយៈ​សេចក្តី​ថ្លែង​ការណ៍​មួយ ដែល​ចេញ​ផ្សាយ​នៅ​ថ្ងៃ​ទី​៣០ ខែ​សីហា ឆ្នាំ​២០១០។

សហ​ចៅក្រម​ស៊ើប​អង្កេត​លើក​ឡើង​ថា ខ្លួន​បាន​អង្កេត និង​វិភាគ​យ៉ាង​ហ្មត់ចត់​លើ​សំណើ​សុំ​នីមួយៗ ទាំង​ទម្រង់​ដាក់​ព័ត៌មាន​បន្ថែម និង​ការ​រៀប​រាប់​លម្អិត​អំពី​អង្គហេតុ​ដែល​បាន​ចោទ និង​ដាក់​សុំ​ក្នុង​ពេល​កំណត់​ត្រឹម​ថ្ងៃ​ទី​៣០ មិថុនា ឆ្នាំ​២០១០។

ប្រធាន​ផ្នែក​កិច្ចការ​សាធារណៈ​នៃ​សាលាក្ដី​ខ្មែរ​ក្រហម លោក រាជ សម្បត្តិ មាន​ប្រសាសន៍​ថា ពាក្យ​សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​មាន​ចំនួន​ច្រើន ដែល​សហ​ចៅក្រម​ស៊ើប​អង្កេត​ត្រូវ​ពិនិត្យ​ពិចារណា​ភាព​ត្រឹមត្រូវ​តាម​ច្បាប់។

លោក រាជ សម្បត្តិ មាន​ប្រសាសន៍​ដូច្នេះ ៖ «សហ​ចៅក្រម​ស៊ើប​អង្កេត​គាត់​ត្រូវ​សម្រេច​ចិត្ត​ថា តើ​ចំនួន​ណា​ដាក់​ទៅ​ត្រឹមត្រូវ​តាម​លក្ខណៈ​ច្បាប់ ហើយ​ទទួល​យក​បាន ចំនួន​ណា​មិន​ត្រឹមត្រូវ​តាម​ច្បាប់។ តែ​គោលបំណង​របស់​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា គឺ​ឱ្យ​អាទិភាព​ទៅ​ជន​រង​គ្រោះ​ដែល​សុំ​តាំង​ខ្លួន​ជា​ដើម​រដ្ឋប្បវេណី​ផង ហើយ​និង​ដាក់​ពាក្យ​បណ្ដឹង​ធម្មតា​ផង»

សេចក្ដី​ថ្លែង​ការណ៍​របស់​សហ​ចៅក្រម​ស៊ើប​អង្កេត​បាន​ណែនាំ​ថា អ្នក​ដែល​អាច​សុំ​តាំង​ខ្លួន​ជា​ដើម​បណ្ដឹង​រដ្ឋប្បវេណី​បាន​ត្រូវ​តែ​បង្ហាញ​ថា គាត់​បាន​ទទួល​រង​ទុក្ខ​ទោស​ដោយ​ផ្ទាល់​ទៅ​នឹង​អង្គហេតុ​ដែល​លើក​ឡើង​ក្នុង​បណ្ដឹង​របស់​ព្រះរាជ​អាជ្ញា​នៅ​ក្នុង​ដីកា​សន្និដ្ឋាន។ សំណើ​សុំ​មួយ​ចំនួន​ដែល​ត្រូវ​បដិសេធ នឹង​នៅ​រក្សា​ទុក​ជា​ពាក្យ​បណ្ដឹង​ជា​ជន​រង​គ្រោះ​​ក្នុង​សំណុំ​រឿង ០០២​ដដែល រួម​ជាមួយ​ពាក្យ​បណ្ដឹង​ជាង ៤​ពាន់​ផ្សេង​ទៀត ដែល​បាន​ដាក់​ផ្ទាល់​ជាមួយ​សហ​ព្រះរាជ​អាជ្ញា។

សហ​ចៅក្រម​ស៊ើប​អង្កេត​ក៏​ប្រកាស​បើក​ផ្លូវ​សម្រាប់​បណ្ដឹង​ឧទ្ធរណ៍​ទៅ​អង្គ​បុរេ​ជំនុំ​ជម្រះ​ក្នុង​ថិរវេលា​កំណត់​ចំនួន ១០​ថ្ងៃ គិត​ចាប់​ពី​ថ្ងៃ​ជូន​ដំណឹង​អំពី​ដីកា​សម្រេច ហើយ​អ្នក​ធ្វើ​បណ្ដឹង​អាច​មាន​មេធាវី​ជំនួយ។

ក្នុង​សេចក្ដី​ថ្លែង​ការណ៍ សហ​ចៅក្រម​ស៊ើប​អង្កេត​បាន​រំឭក​ដែរ​ថា សំណង​ដែល​ដើម​បណ្ដឹង​រដ្ឋប្បវេណី​អាច​នឹង​ទទួល​បាន ​មិន​មែន​សំណង​ជា​លុយ​កាក់​ទេ។ អង្គ​ជំនុំ​ជម្រះ​សាលា​ដំបូង​នឹង​ពិចារណា​ដល់​ប្រយោជន៍​​ជា​រួម​នៃ​ជន​រង​គ្រោះ​ទាំង​អស់ ទោះ​ជា​បាន​ដាក់ ឬ​មិន​បាន​ដាក់​ពាក្យ​សុំ​តាំង​ខ្លួន​ជាដើម​បណ្ដឹង​រដ្ឋប្បវេណី ឬ​ពាក្យ​សុំ​ត្រូវ​បាន​ទទួល​យក ឬ​ត្រូវ​បដិសេធ​ក៏ដោយ៕

ព័ត៌មាន (0)
Share
គេហទំព័រ​ទាំងមូល