ប្រធានគ្រប់គ្រងទូទៅ នៅរោងចក្រម្សៅមី ក្រុមហ៊ុន ម៉ែន សារុន លោក លឹញ ថន ឲ្យដឹងនៅថ្ងៃព្រហស្បតិ៍ទី១៦ ខែមិថុនា ឆ្នាំ ២០១១ ថា ក្រុមហ៊ុន ម៉ែន សារុន បានទទួលម្សៅសណ្ដែកសៀងពីមន្ទីរពិសោធន៍ស្រាវជ្រាវ សណ្តែកសៀងជាតិ នៃសហរដ្ឋអាមេរិក (NSR= National Soy Research Laboratory) និងអង្គការវីស្ស (WISHH= World Initiative for Soy in Human Health) តាមរយៈសហប្រតិបត្តិការ ជាមួយអង្គការអភិវឌ្ឍន៍ និងសង្គ្រោះអន្តរជាតិ (IRD= Internal Relief & Development) នៅក្នុងខែមីនា ឆ្នាំ ២០១១ ចំនួនជាង ៥ តោន ដើម្បីផលិតជាមីកញ្ចប់។
លោក លោក លឹញ ថន ថ្លែងថា មី ក្រុមហ៊ុន ម៉ែន សារុន និងអង្គការ សហការគ្នាផលិតមី បានដាក់ឈ្មោះថា មីប្រាជ្ញា ពីព្រោះមីនេះ មានលាយជាតិសណ្ដែកសៀងក្នុងសរសៃមី សម្រាប់បំប៉នអ្នកខ្វះជីវជាតិអាហារ នៅតំបន់ជាយក្រុងភ្នំពេញ ៖ «មីប្រាជ្ញា ជាមីមួយ ដែលយើងផលិតដោយមានការសហការហ្នឹង។ យើងបានដាក់នូវសារជាតិសណ្ដែកសៀង ហើយនឹងអិលកូវីឌ (ELCOVIT) ដើម្បីជួយបំពេញនូវអាហារូបត្ថម្ភ ដែលយើងហៅថា មីក្រូសារជាតិ ហ្នឹង ទៅដល់ប្រជាជនយើងមួយចំនួន។ ជាពិសេស អ្នកដែលមានប្រាក់ចំណូលទាប ភាគច្រើនគាត់ខ្វះខាតនូវអាហារូបត្ថម្ភ»។
របាយការណ៍បឋមនៃការអង្កេតសុខភាព និងប្រជាសាស្ត្រកម្ពុជា ផ្សាយនៅខែមីនាឆ្នាំ ២០១១ នេះ បង្ហាញថា កុមារជាច្រើន មានរាងកាយស្គមស្គាំងខ្លាំង នៅចន្លោះអាយុ ចាប់ពីកើតរហូតដល់អាយុជិត ៥ ឆ្នាំ គឺច្រើនជាងការអង្កេតនៅឆ្នាំ ២០០៥។
កង្វះអាហារូបត្ថម្ភ ក្នុងចំណោមកុមារ គឺការលូតលាស់មិនប្រក្រតី ដូចជា ក្មេងមានកម្ពស់ទាបជាងអាយុរបស់គេ។ កុមារកម្ពុជា ក្រោមអាយុ ៥ ឆ្នាំចំនួន ៤០% មានកម្ពស់ទាបជាងអាយុរបស់គេ ហើយពួកគេចំនួន ១/៣ មានការលូតលាស់ខុសធម្មតា។ កុមារចំនួន ១៤% ក្នុងចំណោមកុមារកម្ពុជាទាំងអស់ មានការលូតលាស់ខុសប្រក្រតីខ្លាំង។
កង្វះអាហារូបត្ថម្ភ នៅវ័យកុមារ មានផលប៉ះពាល់យូរអង្វែងដល់ជីវិតទាំងមូលរបស់មនុស្ស។ កង្វះអាហារូបត្ថម្ភ គឺជាមូលហេតុ ធំបំផុតតែមួយគត់ ដែលអាចបណ្ដាលឲ្យកុមារស្លាប់។
ដោយហេតុនេះ ការផលិត មីប្រាជ្ញា លោក លឹញ ថន អះអាងថា សម្បូរទៅដោយជីវជាតិបំប៉ន។ លោកថា ការផលិតមីប្រាជ្ញា ដែលមានផ្សំនូវសារជាតិសណ្ដែកសៀងនេះ ក្នុងគោលបំណង ២ យ៉ាង គឺចង់ឲ្យពលរដ្ឋក្រីក្រ មានប្រាក់ចំណូលទាប អាចទិញមីប្រាជ្ញាទទួលទានបានរាល់ថ្ងៃ ព្រោះមីប្រាជ្ញា លក់តម្លៃថោក ១ កញ្ចប់តែ ៦០០ រៀល។ ទី២ មីប្រាជ្ញានេះ មានបញ្ចូលជីវជាតិបំប៉ន គឺអាហារូបត្ថម្ភ សម្រាប់ឲ្យរាងកាយលូតលាស់ទៅតាមអាយុ និងទម្ងន់ ៖ «ជាពិសេស គឺប្រជាជន ដែលមានប្រាក់ចំណូលទាប ដើម្បីឲ្យគាត់មានឱកាស បានប្រើប្រាស់នូវផលិតផល ដែលមានបញ្ចូល មីក្រូសារជាតិ ដែលមានប្រយោជន៍សម្រាប់ជួយដល់សុខភាពរបស់គាត់ ព្រោះគាត់ភាគច្រើន ជាអ្នកកង្វះនូវអាហារូបត្ថម្ភ»។
លោកថា ការបញ្ចូលម្សៅសណ្ដែកសៀងទៅក្នុងសរសៃមី មិនធ្វើឲ្យលំបាកដល់ការផលិតមីទេ តែវាបានធ្វើឲ្យរស់ជាតិមី ផ្អែមជាងមីដែលផលិតពីម្សៅដំឡូង ឬម្សៅសាឡី។ លោកថា ក្នុង ១ ឆ្នាំងម្សៅមានទម្ងន់ ២៨០ គីឡូក្រាម បានដាក់បញ្ចូលមីក្រូសារជាតិបំប៉ន ១០០ ក្រាម។ លាយជាមួយម្សៅមីម្ដង ១០ គីឡូ រួចមកដាក់ អិលកូវីឌ(ELCOVIT) ក្រឡុកជាមួយម្សៅ ២៨០ គីឡូក្រាម រួចបន្ថែមសណ្ដែកសៀង ២០ គីឡូក្រាមទៀត ទៅក្នុងការក្រឡុកនោះ។
លោក លឹញ ថន ៖ «នៅក្នុងសណ្ដែកសៀង និងម្សៅនៅក្នុង អិលកូវីឌ មានសារជាតិវីតាមីនជាច្រើន ដូចជា វីតាមីន អេ វីតាមីន ប៊ីវ័ន វីតាមីន ប៊ីធូ (Vit. A, Vit. B1, B2) បារាំងថា វីតាមីនបេឌើ ហ្នឹង ហើយវីតាមីន បេឌូ (Vit. 12) ហើយហ្វូលីកអាស៊ីដ (Folic Acid) ហើយនឹងជាតិដែក ជាតិស័ង្កសី។ សារជាតិទាំងអស់នេះ សុទ្ធតែមានប្រយោជន៍ និងសារៈសំខាន់សម្រាប់អ្នកប្រើប្រាស់ ជាពិសេស អ្នកដែលកង្វះអាហារូបត្ថម្ភហ្នឹង»។
លោក លឹញ ថន អះអាងថា ការផលិតមីប្រាជ្ញា បានបញ្ចូលសណ្ដែកសៀងចំនួន ៨០០ គីឡូក្រាម ទៅក្នុងសរសៃមី អាចផលិតមីបានចំនួន ៥.០០០ កែស ហើយក្នុង ១ កែសមាន ៥០ កញ្ចប់។ ក្នុង ១ កញ្ចប់លក់តម្លៃ ៦០០ រៀល តម្លៃក្នុង ១ កែស ៥០ កញ្ចប់នោះ គឺ ៦ ដុល្លារ ៤៨ សេន។
លោកបានឲ្យដឹងថា កាលពីខែមេសា ក្រុមហ៊ុន ម៉ែន សារុន បានដាក់លក់ និងចែកចាយអតិថិជនភ្លក់សាកល្បង នៅពហុកីឡាដ្ឋានជាតិអូឡាំពិក «មុនចូលឆ្នាំប្រហែលជាថ្ងៃទី ១១ ដល់ថ្ងៃទី ១៤ យើងបានចូលរួមតាំងពិព័រណ៍នៅស្តាត។ ពេលនោះ គឺជាថ្ងៃដែលយើងបានផលិតមីប្រាជ្ញាដំបូង ហើយយើងបានយកទៅចែកចាយ។ យើងបានយកទៅតាំងពិព័រណ៍ ហើយយើងបានអញ្ជើញអតិថិជនឲ្យភ្លក្ស។ អ៊ីចឹងពេលដែលគាត់បានភ្លក្សទៅ គាត់ឃើញថា រសជាតិមីប្រាជ្ញាហ្នឹងឈ្ងុយឆ្ងាញ់ ហើយអ្នកដែលភ្លក្ស គឺគាត់បានជាវយកទៅញ៉ាំម្នាក់ ១ កែស ២ កែស »។
លោកឲ្យដឹងថា ក្រៅពីយកមីប្រាជ្ញា ទៅដាក់តាំងពិព័រណ៍ ក្រុមហ៊ុនបានផ្ដល់ឲ្យអតិថិជន ភ្លក្សនៅតាមផ្សារក្នុងប្រទេសកម្ពុជា ដើម្បីទទួលយកមតិរិះគន់ស្ថាបនាអំពីការផលិត មីប្រាជ្ញា ពីម្សៅសណ្ដែកសៀង ដើម្បីឱ្យការផលិតលើកក្រោយៗ ទៀត កាន់តែមានរសជាតិឆ្ងាញ់ ហើយមានការគាំទ្រ ការទទួលទិញ និងអ្នកទទួលទានកើនឡើង ព្រមទាំងជួយបង្កើនអាហារូបត្ថម្ភ ដល់ពលរដ្ឋ និងកុមារ ដែលកំពុងតែខ្វះជីវជាតិអាហារ។ ៖ «ពេលដែលយើងបន្ថែមម្សៅសណ្ដែកសៀងនេះទៅ រសជាតិវាឈ្ងុយ»។
លោកបានឲ្យដឹងថា កិច្ចសហការផលិត មីប្រាជ្ញា ពីសណ្ដែកសៀងនេះ ទើបតែបានផលិតលើកដំបូងក្នុងប្រទេសកម្ពុជា បន្ទាប់ពីក្រុមហ៊ុន បានទទួលម្សៅសណ្ដែកសៀង កាលពីខែមីនា និងចាប់ផ្ដើមផលិតដំបូងនៅមុនពេលចូលឆ្នាំខ្មែរ។ លោកថាកិច្ចសហការផលិតមីប្រាជ្ញាសំបូរជីវជាតិអាហារ បំប៉នសុខភាពរវាងក្រុមហ៊ុន ម៉ែន សារុន ជាមួយនឹងមន្ទីរពិសោធន៍ស្រាវជ្រាវ សណ្តែកសៀងជាតិ សហរដ្ឋអាមេរិក (National Soy Research Laboratory=NSR) អង្គការ វីស្ស (WISHH= World Initiative for Soy in Human Health) អង្គការអភិវឌ្ឍន៍ និងសង្គ្រោះអន្តរជាតិ (IRD= International Relief & Development) នឹងបញ្ចប់នៅខែសីហាខាងមុខ ហើយការផលិតមីប្រាជ្ញា នឹងសំរេចឲ្យបាន ១ លានកញ្ចប់សម្រាប់លក់ក្នុងតម្លៃថោក សម្រាប់ជួយជនមានចំណូលទាប នៅតាមជាយក្រុងភ្នំពេញ ដែលខ្វះជីវជាតិអាហារ។
មីប្រាជ្ញា មានកញ្ចប់ពណ៌បៃតងខ្ចី។ នៅពីក្រៅសំបកកញ្ចប់ មានសរសេរប្រាប់ពីកិច្ចសហការរវាងក្រុមហ៊ុន ម៉ែន សារុន និងអង្គការនានា និងពីសារធាតុបំប៉ន បញ្ចូលក្នុងមីប្រាជ្ញាផងដែរ៕