លោក សឿង ខង បានឲ្យដឹងដូច្នេះ ៖ «មួយឃុំតាឡាតនេះ អត់មាននរណាសាបមួយថ្នាលទេ ឡើងដីគោក អាម្ទេស ត្រប់ ដំណាំសិប្បកម្ម ដំណាំដាំតាមស្រែ តាមដំបូក តាមសួនច្បារតាមចម្ការនោះវាងាប់ខ្ទេចខ្ទីរលីងហើយ។ ប្រជាជនស្បៀងកាន់តែស្ដួចទៅៗ អស់រលីងហើយ ទាំងអស់មួយឃុំនេះតែម្ដង។ សព្វថ្ងៃនេះប្រជាជនសុទ្ធតែជីកក្ដួចគ្រប់គ្រួសារ គ្រប់ភូមិ។ ជីកក្ដួចដើម្បីថាជួយបាយអី»។
លោក សឿង ខង បានបញ្ជាក់ថា ឆ្នាំមុនដំណាំស្រូវត្រូវលិចលង់ខូចខាតអស់ ដោយសារទឹកជំនន់គ្មានស្រូវអង្ករបម្រុងជាស្បៀងសម្រាប់រដូវវស្សាឆ្នាំនេះទេ ឥឡូវខែកក្កដា ជិតចូលខែសីហា ទៅហើយ គ្មានទឹកភ្លៀងអាចឲ្យសាបព្រោះធ្វើស្រែបានទៀត។ ចំណែកឯដំណាំផ្សេងៗ មានពោត សណ្ដែក ដំឡូង ល្ពៅ ននោង ត្រប់ ជាដើម ដែលជាបន្លែសម្រាប់ហូបប្រចាំថ្ងៃ ក៏ត្រូវស្វិតងាប់គ្មានសល់ដែរ។ នេះជាស្ថានភាពអាក្រក់ដែលកើតមានឡើងគួរឲ្យបារម្ភបំផុតសម្រាប់ប្រជាជនក្នុងឃុំនេះ។
លោក សឿង ខង អំពាវនាវដូច្នេះ ៖ «ជួយមកឃុំខ្ញុំឲ្យបានច្រើនបន្តិច ឆ្នាំនេះវាដាច់ស្បៀងដោយសារទឹកជំនន់ ហើយក៏ជួបការរាំងស្ងួតក្នុងឆ្នាំនេះដែរ។ ចំនួនគ្រួសារមាន ៦៧៥គ្រួសារ ប្រជាកសិករសុទ្ធសាធនៅភូមិឃុំនេះ។ អ្នកដែលបានបាយហូបហ្នឹងវាមានតែ ១០០ជាងគ្រួសារទេ»។
តំណាងសហគមន៍ភូមិស្វាយរៀង ឃុំតាឡាត លោក បៃ ថងញ៉ុត បានបញ្ជាក់ថា រដូវវស្សាឆ្នាំនេះមានភ្លៀងធ្លាក់ដោយកម្រនៅទូទាំងឃុំតាឡាត មិនអាចឲ្យមានទឹកសម្រាប់ធ្វើស្រែបានឡើយ។ ស្ថានភាពនៅចំពោះមុខ មិនត្រឹមតែគ្មានអង្ករហូបគ្រប់គ្រាន់រហូតត្រូវដាំបបរនោះទេ សូម្បីបន្លែផ្លែឈើព្រៃ និងក្ដួចជាដើម ក៏គ្មានផលសម្រាប់មនុស្សសត្វដែរ។
លោក បៃ ថងញ៉ុត មានប្រសាសន៍ថា ៖ «ក្ដួចហ្នឹងយកមកស៊ីជំនួសបាយ បានក្ដួច ដំឡូង។ ការរាំងស្ងួតអ៊ីចឹងគឺវាស្វិត ហើយវាមិនអាចថា បរិបូរទេ។ ខ្វះខាតបាត់បង់ទាំងអស់ សូម្បីតែក្ដួចក៏អត់មានមើមទេ វាក្រៀមអស់ហើយ មានតែលក់គោលក់ក្របីតែប៉ុណ្ណឹង។ អ្នកខ្លះមានគោ មានក្របីហ្នឹងអាចរស់ បើអ្នកណាអត់គោអត់ក្របី គឺដឹងថា ហូរទឹកភ្នែកហើយ មិនដឹងធ្វើម៉េចទេ»។
ផ្លែឈើព្រៃ បន្លែផ្សេងៗ និងមើមក្ដួចជាដើម បានដុះជាលក្ខណៈធម្មជាតិ មិនចាំបាច់មានការថែទាំឡើយ ប៉ុន្តែរុក្ខជាតិព្រៃទាំងនោះ វាអាចដុះរីកលូតលាស់បានក៏អាស្រ័យដោយមានទឹកភ្លៀងដែរ ប៉ុន្តែដោយឆ្នាំនេះ មានការប្រែប្រួលអាកាសធាតុ គ្មានភ្លៀងធ្លាក់គ្រប់គ្រាន់នោះ វាជាការបង្កផលប៉ះពាល់ជាទូទៅ ទាំងដំណាំកសិកម្ម និងរុក្ខជាតិព្រៃទាំងនោះផងដែរ។
ទោះជាមានការអះអាងថា ប្រជាពលរដ្ឋនៅតំបន់ខ្លះកំពុងប្រឈមមុខទៅកង្វះខាតស្បៀងអាហារនៅពេលនេះក្ដី ប៉ុន្តែកន្លងមកលោកនាយករដ្ឋមន្ត្រី ហ៊ុន សែន ធ្លាប់បានប្រកាសជាផ្លូវការថា ស្បៀងស្រូវអង្កររបស់កម្ពុជា នៅសល់រាប់លានតោន រហូតបានធ្វើការនាំចេញទៀតផង។ ជាមួយគ្នានេះ លោកនាយករដ្ឋមន្ត្រីបានបញ្ជាក់ច្បាស់ថា មិនទុកឲ្យប្រជាជនណាម្នាក់ស្លាប់ដោយអត់បាយឡើយ៕