ប្រជាពលរដ្ឋមួយគ្រួសារដែលរស់នៅក្នុងភូមិព្រៃវែង នៃឃុំសំរោងយា ស្រុកពួក បានមកកាន់ការិយាល័យអង្គការសិទ្ធិមនុស្សលីកាដូ ខេត្តសៀមរាប កាលពីពេលថ្មីៗ ដើម្បីសុំឱ្យអង្គការនេះជួយជ្រោមជ្រែងផ្នែកផ្លូវច្បាប់យ៉ាងណាឱ្យពន្ធនាគារខេត្តប៉ៃលិន បានដោះលែងកូនស្រីរបស់គាត់ម្នាក់ដែលវិកលចរិត បានត្រឡប់មកជួបជុំក្រុមគ្រួសារវិញ។
អ្នកស្រី ប៉ែត ប៉ម អាយុ ៥៧ឆ្នាំ ត្រូវជាម្ដាយរបស់ក្មេងស្រីដែលមានស្មារតីមិនគ្រប់គ្រាន់នោះ។ គាត់បានមានប្រសាសន៍កាលពីរសៀលថ្ងៃអាទិត្យ ទី១០ ខែកុម្ភៈ ថា កូនស្រីរបស់គាត់ឈ្មោះ សឿន ស៊ីណាត អាយុ ២០ឆ្នាំ មានជំងឺវិកលចរិត បានជិះកង់វង្វេងបាត់ពីផ្ទះតាំងតែពីអំឡុងខែមិថុនា ឆ្នាំ២០១២។ ក្រោយពីបាត់ គឺគាត់បានដាក់ពាក្យបណ្ដឹងទៅប៉ូលិសស្រុកពួកឱ្យជួយតាមរក ក៏ប៉ុន្តែជាច្រើនថ្ងៃក្រោយមកគាត់បានទទួលដំណឹងពីប៉ូលិសស្រុកពួក ថាកូនស្រីរបស់គាត់ត្រូវប៉ូលិសខេត្តប៉ៃលិន ប្រទះឃើញ និងឃាត់ទុក។
ស្រីដដែលបានបញ្ជាក់ថា បន្ទាប់ពីគាត់ដឹងថា កូនស្រីត្រូវប៉ូលិសខេត្តប៉ៃលិន ឃាត់ទុកនោះ គឺប៉ូលិសនៃស្នងការដ្ឋាននគរបាលខេត្តប៉ៃលិន ម្នាក់ បានទូរស័ព្ទហៅគាត់ឱ្យប្រញាប់ទៅទទួលយកកូន ក៏ប៉ុន្តែនៅពេលដែលគាត់ទៅដល់ គឺមន្ត្រីប៉ូលិសនៅខេត្តប៉ៃលិន មិនអនុញ្ញាតឱ្យគាត់បានជួបកូនទេ ធ្វើឱ្យគាត់បង្ខំចិត្តត្រឡប់មកផ្ទះវិញ ហើយក្រោយមកប៉ូលិសបានយកកូនស្រីវិកលចរិត របស់គាត់ទៅឃុំក្នុងពន្ធនាគារ រហូតមកដល់ពេលនេះជាង ៧ខែហើយ។
អ្នកស្រី ប៉ែត ប៉ម បានបញ្ជាក់ថា ការយកកូនស្រីរបស់គាត់ទៅឃុំក្នុងពន្ធនាគារនោះ ហាក់ដូចជាមិនមានមូលហេតុច្បាស់លាស់ទេ៖ «ប៉ូលិសនៅប៉ៃលិន ក៏ទូរស័ព្ទហៅខ្ញុំ ២-៣ដងថា ឆាប់ទៅយក បើមិនទៅយកទេ ពន្លែងកូនចោលហើយ។ ក៏ខ្ញុំរកឡានពីនេះ (សៀមរាប) ម៉ោង ៤ ហើយ ពេលខ្ញុំទៅយកគាត់ថា អ៊ំឯងទៅដេកផ្ទះសំណាក់សិនទៅ ចាំខ្ញុំនិយាយត្រូវនឹងអ៊ំឯង នោះខ្ញុំយកកូនមកដាក់ឡានឱ្យ អត់ឱ្យកូនខ្ញុំមក គឺខ្ញុំក៏មកផ្ទះវិញទៅ។ ខ្ញុំក៏ប្រាប់ថា នៅត្រង់ណាក៏នៅទៅ ក៏ប៉ុន្តែកុំឱ្យបាត់កូនខ្ញុំ ចាំថ្ងៃណាខ្ញុំមកអើតកូនខ្ញុំទៀត។ ៨ខែហើយមិនឃើញផ្ដល់ដំណឹងឱ្យខ្ញុំសោះ»។
ស្ត្រីជាម្ដាយបានបញ្ជាក់ថា កូនស្រីរបស់គាត់មានបញ្ហាវង្វេងស្មារតីតាំងតែពីអាយុ ១៤ឆ្នាំមកម្ល៉េះ ហើយធ្លាប់វង្វេងដើរបាត់ពីផ្ទះជាច្រើនលើកមកហើយ ដោយធ្លាប់ទៅដល់ខេត្តពោធិ៍សាត់ និងខេត្តកំពង់ចាម ក៏មាន។
ទោះយ៉ាងណា វិទ្យុអាស៊ីសេរីមិនអាចទាក់ទងមន្ត្រីប៉ូលិសនៃស្នងការនគរបាលខេត្តប៉ៃលិន ដែលជាប់ពាក់ព័ន្ធ ដើម្បីសុំការអធិប្បាយបានទេ។
ចំណែកលោក នូវ ធឿង ជាប្រធានពន្ធនាគារខេត្តប៉ៃលិន បានឆ្លើយតបយ៉ាងខ្លីថា លោកមិន បានដឹងរឿងនោះទេ ទាល់តែលោកឆែកទៅផ្នែកសំណុំរឿងជាមុនសិន ទើបអាចអធិប្បាយបញ្ហានោះបាន។
លោក នូ ពុទ្ធិ ជាអ្នកសម្របសម្រួលអង្គការសិទ្ធិមនុស្សលីកាដូ ខេត្តសៀមរាប បានមានប្រសាសន៍ថា កាលពីបីថ្ងៃមុន ក្រុមគ្រួសាររបស់ក្មេងស្រីនោះបានទៅកាន់ការិយាល័យរបស់លោក ដើម្បីសុំឱ្យជួយដោះកូនចេញពីពន្ធនាគារនៅប៉ៃលិន។
លោក នូ ពុទ្ធិ៖ «គាត់មករ៉ាយរ៉ាប់រឿងហ្នឹងថា តើលីកាដូ អាចជួយអីគាត់បាន? ហើយលីកាដូ ប្រាប់គាត់វិញថា ដោយសារយើងអត់មានទីស្នាក់ការនៅខាងខេត្តនោះទេ ខ្ញុំក៏គិតឃើញអាដហុក ហើយក៏ទាក់ទងទៅអាដហុក យើងចង់ឱ្យអាដហុក ជួយនៅកន្លែងហ្នឹង»។
កញ្ញា ប្រាក់ សុភីម៉ា អ្នកសម្របសម្រួលសមាគមការពារសិទ្ធិមនុស្សអាដហុក ខេត្តប៉ៃលិន បានមានប្រសាសន៍ថា កញ្ញាបានត្រឹមតែដឹងថា ឈ្មោះក្មេងស្រីនោះគឺមាននៅក្នុងពន្ធនាគារមែន ក៏ប៉ុន្តែអង្គការអាដហុក នៅមិនទាន់អាចចូលពិនិត្យបានទេ ដោយសារតែការចេញចូលពន្ធនាគារគឺតម្រូវឱ្យមានលិខិតអនុញ្ញាតពីក្រសួងមហាផ្ទៃ ជាមុនសិន ហើយលិខិតអនុញ្ញាតនោះ គឺស្នាក់ការកណ្ដាលនៅឯទីក្រុងភ្នំពេញ កំពុងទាក់ទងធ្វើនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។