ផ្អែកតាមប្រភពបានថែ្លងចោទប្រកាន់ថា ការចែកនោះបានធ្វើទ្បើងនិយមតែបក្សពួក ប៉ុនែ្តមន្រ្តីមូលដ្ឋានពាក់ព័ន្ធក្នុងការស្រង់ឈ្មោះនោះបានបដិសេធថាជាកំហុសដោយអចេតនាតែប៉ុណ្ណោះ។
លោក វ៉ាន់ ចាន់រា អតីតជំទប់ទី១ នៃឃុំសំរោង ស្រុកភ្នំក្រវ៉ាញ ខេត្តពោធិ៍សាត់ ខាងគណបក្សហ៊្វុនស៊ិនប៉ិច តំណាងឲ្យគ្រួសារចំនួនជិត៣០គ្រួសារដែលមិនបានទទួលអំណោយអង្ករនោះបានថ្លែងថា ៖ «ភូមិសំរោង១ ភូមិសំរោង២ ភូមិអង្ក្រង ភូមិរវាង ស្មានទៅប្រហែលជា២០ទៅ៣០គ្រួសារអត់បានទទួលសោះតែម្ដង គាត់ជាអ្នកក្រីក្រពិតប្រាកដ។ មានការសោកស្ដាយ មានការឈឺឆ្អាលត្រង់ថា មេភូមិគឺជាមេភូមិរដ្ឋាភិបាល តែគេមិនបានអ៊ីចឹង អ្នកណាហ៊្វុនស៊ិនប៉ិច សមរង្ស៊ី ន.រ. (នរោត្ដម រណឫទ្ធិ) មិនឲ្យយើងទេ ឲ្យតាមខ្សែស្រឡាយ និយមបក្សពួករបស់គេ។ ខ្ញុំកើតទុក្ខមិនសុខចិត្តចំពោះប្រជាពលរដ្ឋក្រីក្រនៅភូមិសំរោង២ដែរ ហើយអត់បានអំណោយនឹងគេ ចំណែកគេមានដីស្រែ មានគោក្របី មានផ្ទះសម្បែង ម៉ូតូជិះ គេបែរជាទទួលអំណោយអង្ករក្រីក្រហ្នឹងដែរ។ ស្បៀងនេះចែកអង្ករសង្គ្រោះបន្ទាន់ចំពោះប្រជាពលរដ្ឋដាច់ស្បៀង ហើយនិងគ្មានដីស្រែចម្ការធ្វើបង្កបង្កើនផល»។
ផ្អែកតាមប្រភពឲ្យដឹងថា ការចែកស្បៀងអង្ករនោះគឺជាការសង្រ្គោះបន្ទាន់ដល់ប្រជាពលរដ្ឋក្រីក្រដាច់ស្បៀងអាហារនិងគ្មានដីស្រែចម្ការបង្កបង្កើនផល។ ការចែកស្បៀងអង្ករនោះប្រជាពលរដ្ឋម្នាក់ៗទទួលបាន៣៥គីឡូក្រាម។ ប្រភពបានឲ្យដឹងទៀតថា ការចែកនោះគឺរយៈពេល៣ឆ្នាំ ក្នុងមួយខែចែកម្តង។
មិនអាចទាក់ទង លោក ហុល នឿន ជាមេឃុំសំរោង ស្រុកភ្នំក្រវ៉ាញ ខេត្តពោធិ៍សាត់ ដើម្បីសុំសេចក្តីប្រតិកម្មជុំវិញការចោទប្រកាន់ខាងលើនេះ ប៉ុនែ្តមន្រ្តីមូលដ្ឋានមួយរូបដែលស្រង់ឈ្មោះប្រជាពលរដ្ឋដើម្បីទទួលអំណោយស្បៀងអង្ករពីអង្គការស្បៀងអាហារពិភពលោកបានបដិសេធថា វាជាកំហុសខ្វះខាតចន្លោះដោយអចេតនាក្នុងការស្រង់ឈ្មោះ។
មន្ត្រីមូលដ្ឋានដដែលបានឲ្យដឹងថា ៖ «វាមិនសមស្របទាំងអស់ទេ វាបញ្ហាត្រង់ថា គាត់មើលមិនសព្វគ្រប់នៅតាមភូមិទេ វាមានមែន ការឃើញវាមានមែន អត់មានចេតនារើសអើងទេ ប៉ុន្តែចុះបើរបស់តិច ដល់ឲ្យអ្នកនោះទៅវាខ្វះអ្នកនេះ ដល់ឲ្យអ្នកនេះខ្វះអ្នកនោះ ម៉្លោះហើយវាចេះតែច្រណែនបន្តគ្នាអ៊ីចឹងណា៎»។
មិនអាចទាក់ទងបានភ្លាមៗទេចំពោះមន្រ្តីនៃអង្គការស្បៀងអាហារពិភពលោកប្រចាំក្នុងប្រទេសកម្ពុជានិងមន្រ្តីរដ្ឋាភិបាលកម្ពុជានៅថៃ្ងសុក្រនេះ ប៉ុន្តែលោក ញឹម វណ្ណដា អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានមានថ្លែងប្រាប់វិទ្យុអាស៊ីសេរីកាលពីពេលថ្មីៗនេះឲ្យដឹងថា រដ្ឋាភិបាលកម្ពុជាសហការជាមួយអង្គការស្បៀងអាហារពិភពលោក (WFP) បានត្រៀមលក្ខណៈនិងស្បៀងអង្ករគ្រប់គ្រាន់សម្រាប់ធ្វើអន្តរាគមន៍សង្រ្គោះបន្ទាន់ដល់ប្រជាពលរដ្ឋខែ្មរដែលរងគ្រោះដាច់ស្បៀងដោយសារគ្រោះរាំងស្ងួត ទឹកជំនន់ និងកត្តាផ្សេងៗទៀតនៅក្នុងឆ្នាំ២០០៨នេះ៕