អាជ្ញាធរ​ឃុំ​នៅ​ខេត្ត​ពោធិ៍សាត់​រង​ការ​ចោទ​ថា​លក់​ដី​រដ្ឋ

បច្ចុប្បន្ន បញ្ហា​ទំនាស់​ដីធ្លី​បាន​កើត​មាន​ស្ទើរ​តែ​គ្រប់​ទិសទី​ក្នុង​ប្រទេស​កម្ពុជា ឯ​រូបភាព​នៃ​ទំនាស់​ក៏​មាន​លក្ខណៈ​ខុសៗ​គ្នា​តាម​ភាព​ជាក់ស្ដែង និង​ទៅ​តាម​តំបន់​នីមួយៗ។ នៅ​ឯ​ខេត្ត​ពោធិ៍សាត់ មាន​ប្រជាពលរដ្ឋ ១៦​គ្រួសារ បាន​មក​ដាក់​បណ្ដឹង​សុំ​ឲ្យ​សមាគម​អាដហុក (Adhoc) ការពារ​សិទ្ធិ​មនុស្ស​ប្រចាំ​ខេត្ត​នេះ ជួយ​ធ្វើ​អន្តរាគមន៍ ដោយ​ពួក​គាត់​ចោទ​ប្រកាន់​មេ​ឃុំ​តាលោ ថា​លក់​ដី​របស់​រដ្ឋ​ឲ្យ​ពួក​គាត់។
ដោយ មណ្ឌល កែវ
2013-02-15
Share
ជម្លោះ​ដីធ្លី ពោធិ៍សាត់ ៣០៥ អ្នកស្រី ជិន ភឿន នៅ​ភូមិ​តាំងគោក ឃុំ​តាលោ ស្រុក​បាកាន ខេត្ត​ពោធិ៍សាត់ មក​តវ៉ា​នៅ​សមាគម​អាដហុក (Adhoc) កាល​ពី​ថ្ងៃ​ទី១៥ ខែ​កុម្ភៈ ឆ្នាំ​២០១៣។
RFA/Mondul Keo

ស្ត្រី​អ្នក​ភូមិ​ឈ្មោះ ជិន ភឿន អាយុ ៥២​ឆ្នាំ ជា​ប្រជាពលរដ្ឋ​នៅ​ភូមិ​តាំងគោក ឃុំ​តាលោ ស្រុក​បាកាន ខេត្ត​ពោធិ៍សាត់។ អ្នកស្រី​បាន​ឲ្យ​ដឹង​នៅ​ព្រឹក​ថ្ងៃ​ទី១៥ កុម្ភៈ ថា គាត់​បាន​ទិញ​ដី​មួយ​កន្លែង​ដែល​មាន​ទទឹង ២០០​ម៉ែត្រ និង​បណ្ដោយ ៥០០​ម៉ែត្រ ពី​លោក យ៉ាំ យ៉េន បច្ចុប្បន្ន​ជា​មេ​ឃុំ​តាលោ កាល​ពី​ឆ្នាំ​២០០៥ ក្នុង​តម្លៃ ៦​សែន​រៀល ស្រាប់​ឥឡូវ​អាជ្ញាធរ​បាន​ប្រាប់​គាត់​ថា ដី​នេះ​ជា​ដី​សង្គម​កិច្ច​ទៅ​វិញ។

អ្នក​ភូមិ​រូប​នេះ​បាន​សំណូម​ពរ​ឲ្យ​ក្រុម​និស្សិត​ជួយ​វាស់​វែង​ប្រគល់​ដី​នេះ​មក​ឲ្យ​គាត់​ផង៖ «ដី​នេះ​ខ្ញុំ​ទិញ​ពី​មេ​ឃុំ យ៉ាំ យ៉េន បើ​ថា​ជាប់​ដី​សង្គម​កិច្ច មេ​ឃុំ​បោះ​ត្រា​ឲ្យ​ខ្ញុំ​ធ្វើ​អី! សុំ​ឲ្យ​និស្សិត​ជួយ​វាស់វែង​ឲ្យ​ខ្ញុំ​ផង កូន​ច្រើន​ណាស់ គ្មាន​អី​ចែក​ឲ្យ​កូន​ទេ។ មេ​ឃុំ​អត់​ឲ្យ​វាស់ គេ​សង​ខាង​វាស់​រួច​ហើយ នៅ​តែ​ប្រឡោះ​កណ្ដាល​អត់​ព្រម​វាស់។ ខ្ញុំ​ចេះ​តែ​ភ័យ​ខ្លាច​អត់​មាន​ដី​ចិញ្ចឹម​កូន។ ចេញ​លិខិត​បោះ​ត្រា​ឲ្យ​ខ្ញុំ ហើយ​ម៉េច​ថា​ជា​ដី​សង្គម​កិច្ច​វិញ? គាត់​ឃាត់​មិន​ឲ្យ​ខ្ញុំ​ចូល​ទៅ​កាប់​ព្រៃ​ធ្វើ​ស្មៅ​បង្កបង្កើន​ផល​ទេ»

ដូច​គ្នា​នេះ​ដែរ សមាជិក​ក្រុម​ប្រឹក្សា​ឃុំ​តាលោ គឺ​លោក ស ធន ក៏​បាន​ឲ្យ​ដឹង​ដែរ​ថា មាន​ប្រជាពលរដ្ឋ​ជាច្រើន​គ្រួសារ​ទៀត​កំពុង​មាន​ស្ថានភាព​ដូច​អ្នកស្រី ជិន ភឿន ដែរ ពោល​គឺ​ពួក​គេ​បាន​ទិញ​ដី​នៅ​តំបន់​នេះ​ពី​អតីត​មេ​ឃុំ លោក ប្លុង ប៊ុនលី ខ្លះ និង​ខ្លះ​ទៀត​ទិញ​ពី​លោក យ៉ាំ យ៉េន មេ​ឃុំ​បច្ចុប្បន្ន៖ «ប្រជាពលរដ្ឋ​ខ្លះ​គាត់​ទិញ​អស់​២លាន​ក្នុង​មួយ​ប្លង់ ជួល​អា​ត្រាក់​ឈូស​ឆាយ​អស់​បី​បួន​លាន​ទៀត។ ឥឡូវ​ស្រាប់​តែ​ដក​របស់​គាត់។ ខ្ញុំ​ជួយ​តវ៉ា​ក្នុង​សាលា​ឃុំ​ដែរ តែ​មិន​បាន​លទ្ធផល ទើប​ខ្ញុំ​នាំ​ប្រជាពលរដ្ឋ​មក​សួរ​នាំ​ដើម្បី​ឲ្យ​ថ្នាក់​លើ​ជួយ​ដោះស្រាយ»

មេ​ឃុំ​តាលោ គឺ​លោក យ៉ាំ យ៉េន បដិសេធ​ការ​ចោទ​ប្រកាន់​នេះ។ លោក​មេ​ឃុំ​បាន​បញ្ជាក់​ថា កាល​ពី​ឆ្នាំ​២០០៥ អាជ្ញាធរ​បាន​បែង​ចែក​ដី​តំបន់​នេះ​ជូន​ប្រជាពលរដ្ឋ​មួយ​ចំនួន ដែល​ពុំ​មាន​ដី​បង្កបង្កើន​ផល​មែន។ យ៉ាង​នេះ​ក្ដី លោក​ថា​អាជ្ញាធរ​កំពុង​ធ្វើ​របាយការណ៍​សុំ​កាត់​ឆ្វៀល​ដី​ដែល​រង​ផល​ប៉ះពាល់​ជាមួយ​ដី​សង្គម​កិច្ច​នេះ​មក​ឲ្យ​ប្រជាពលរដ្ឋ​វិញ៖ «អត់​មាន​បាត់​ទៅ​ណា​ទេ ដី​គាត់​នៅ​ត្រង់​ណា​គឺ​ប្រគល់​ឲ្យ​គាត់​នៅ​ត្រង់​ហ្នឹង។ ដោយ​ឡែក​តែ​ដី​ព្រៃ​ដែល​គាត់​មិន​ទាន់​កាប់​គាស់​នោះ គឺ​យើង​មិន​ហ៊ាន​ទេ។ តែ​បើ​ដី​ដែល​គាត់​បង្កបង្កើន​ផល គឺ​យើង​នឹង​វាស់​ឲ្យ​គាត់ តែ​ដោយ​យើង​មិន​ទាន់​បាន​ចំណារ​ពី​ថ្នាក់​ជាតិ​មក ទើប​យើង​វាស់​ឲ្យ​គាត់ ព្រោះ​ដី​ហ្នឹង​មាន​គល់​បញ្ជី​រួច​ហើយ»

មន្ត្រី​សម្រប​សម្រួល​សមាគម​អាដហុក ការពារ​សិទ្ធិ​មនុស្ស​ខេត្ត​ពោធិ៍សាត់ លោក ភួង សុធា មាន​ប្រសាសន៍​ថា លោក​បាន​ទទួល​ពាក្យ​បណ្ដឹង​សុំ​ការ​ជួយ​អន្តរាគមន៍​ពី​ប្រជាពលរដ្ឋ​មែន តែ​សមាគម​អាដហុក ពុំ​ទាន់​បាន​ចុះ​ទៅ​អង្កេត​បញ្ហា​នេះ​នៅ​ឡើយ។ យ៉ាង​នេះ​ក្ដី លោក​ថា​បើ​តាម​ប្រសាសន៍​របស់​លោក​នាយក​រដ្ឋមន្ត្រី ហ៊ុន សែន ដី​ដែល​ប្រជាពលរដ្ឋ​ធ្លាប់​បាន​កាន់​កាប់ និង​អាស្រ័យ​ផល គឺ​គេ​ត្រូវ​តែ​កាត់​ឆ្វៀល​ចេញ​ប្រគល់​ជូន​ប្រជាពលរដ្ឋ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល