ក្រុម​អ្នក​នេសាទ​នៅ​ខេត្ត​សៀមរាប​សុំ​ឲ្យ​អាជ្ញាធរ​បន្ធូរ​ផ្លូវ​ច្បាប់

ក្រុម​អ្នក​នេសាទ​ត្រី​លក្ខណៈ​គ្រួសារ នៅ​ក្នុង​បឹង​ទន្លេសាប សង្កាត់​ចុងឃ្នៀស ក្រុង​សៀមរាប ជាង ១៨០​គ្រួសារ បាន​និយាយ​ថា មន្ត្រី​ជលផល​បាន​ហាម​ឃាត់​ពួក​គេ​មិន​ឲ្យ​ប្រើ​ឧបករណ៍​ចាប់​ត្រី​ម្យ៉ាង ដែល​គេ​ហៅ​ថា រ៉ាវ (សំណាញ់​ក្រឡា​តូច) ក្នុង​ការ​នេសាទ​ប្រចាំ​ថ្ងៃ​បាន​ទេ។
ដោយ ហង្ស សាវយុត
2010-05-24
អ៊ីម៉ែល
មតិ
Share
បោះពុម្ព
១៤ កញ្ញា ២០០៧ : មន្ត្រី​កង​រាជ​អាវុធ​ហត្ថ ចេញ​ល្បាត​រក​បទល្មើស​នេសាទ​តាម​ដង​ទន្លេ​មេគង្គ ក្បែរ​ទីរួម​ខេត្ត​ក្រចេះ។
១៤ កញ្ញា ២០០៧ : មន្ត្រី​កង​រាជ​អាវុធ​ហត្ថ ចេញ​ល្បាត​រក​បទល្មើស​នេសាទ​តាម​ដង​ទន្លេ​មេគង្គ ក្បែរ​ទីរួម​ខេត្ត​ក្រចេះ។
AFP Photo/Tang Chhin Sothy

ក្រុម​អ្នក​នេសាទ​ត្រី​តាម​ទន្លេសាប នៅ​សង្កាត់​ចុងឃ្នៀស ក្រុង​សៀមរាប​ចំនួន​ជាង ១៨០​គ្រួសារ បាន​លើក​គ្នា​ទៅ​កាន់​សាលា​ខេត្ត​សៀមរាប កាល​ពី​ព្រឹក​ថ្ងៃ​ច័ន្ទ ទី​២៤ ខែ​ឧសភា ដើម្បី​សុំ​ឲ្យ​អាជ្ញាធរ​ខេត្ត​ជួយ​បន្ធូរ​បន្ថយ​ផ្លូវ​ច្បាប់​ឲ្យ​ពួក​គេ​បាន​ប្រើ​ឧបករណ៍​នេសាទ​ត្រី​ម្យ៉ាង ឈ្មោះ រ៉ាវ នៅ​មុន​ពេល​រដូវ​បិទ​នេសាទ​ត្រី​ជិត​មក​ដល់​ដែល​សល់​តែ ១​ខែ​ខាង​មុខ​ទៀត​នេះ។

ការ​លើក​គ្នា​មក​សុំ​ឲ្យ​មន្ត្រី​ខេត្ត​ជួយ​បន្ធូរ​បន្ថយ​ច្បាប់ ក្នុង​ការ​ប្រើ​ឧបករណ៍​នេសាទ​នោះ បន្ទាប់​ពី​មន្ត្រី​ជលផល បាន​ហាម​ឃាត់​មិន​ឲ្យ​ប្រើ​ឧបករណ៍​ទាំង​នោះ​នេសាទ​ត្រី ដោយ​គេ​អះ​អាង​ថា ជា​ឧបករណ៍​ដែល​ច្បាប់​នេសាទ​បាន​ហាម​ឃាត់។

បុរស​អ្នក​នេសាទ​ត្រី​ម្នាក់​ឈ្មោះ ហាប់ ដា ក្នុង​ចំណោម​អ្នក​នេសាទ​ជា​ច្រើន​ទៀត ដែល​លើក​គ្នា​មក​សាលា​ខេត្ត​សៀមរាប កាល​ពី​ព្រឹក​ថ្ងៃ​ច័ន្ទ បាន​មាន​ប្រសាសន៍​ថា ពួក​គាត់​ជា​អ្នក​នេសាទ​ត្រី​លក្ខណៈ​គ្រួសារ​តិច​តួច ដោយ​ដាក់​ឧបករណ៍​រ៉ាង​ក្នុង​ទន្លេសាប ប៉ុន្តែ​មន្ត្រី​ជលផល​បាន​កាប់​បំផ្លាញ​អស់ មិន​មាន​អ្វី​រក​របរ​ចិញ្ចឹម​ជីវិត​ទេ។

គាត់​បន្ត​ថា ៖ «សុំ​អភិបាល​ខេត្ត​ជួយ​បន្ធូរ​បន្ថយ ដើម្បី​ឲ្យ​ប្រជា​ពលរដ្ឋ​នេះ បាន​រក​មុខ​របរ​តូច​តាច​ដាក់​រ៉ាវ​សាច់​មង​ក្រឡា​នោះ វា​ទំហំ ៣​ហ៊ុន ជលផល​នេះ​បាន​កាប់​បំផ្លាញ​អស់​ទៅ ប្រជា​ពលរដ្ឋ​នេះ គ្នា​ដាច់​បាយ គ្នា​អត់​មាន​មុខ​របរ អត់​មាន​ស្រែ​ធ្វើ​ទេ​ណា៎»

ស្ត្រី​ម្នាក់​ទៀត​ឈ្មោះ ឈឿង សុផល ដែល​ជា​អ្នក​នេសាទ​ដែរ បាន​បន្ថែម ៖ «ម្នាក់​ៗ ដាច់​បាយ​អស់​ហើយ ដូច​ជា​រូប​ខ្ញុំ​ផ្ទាល់​អី​ចុះ​ឯង ធ្វើ​របរ​ដាក់​ណ​រ៉ាវ​សាច់​មង​នេសាទ​ត្រី​។ ខ្ញុំ​សង្ឃឹម​ថា​បាន​របរ​នេះ​ឯង ដែល​ថា ដោះ​ស្រាយ​ជីវភាព​ដល់​ពេល​ខាង​ជលផល​ចេញ​ទៅ ទៅ​កាប់​បង្គោល​កាប់​សាច់​មង​តែ​១​ដើម​ក៏​អត់​ទុក​ដែរ ហើយ​មួយ​ទៀត គេ​ដុត​ចោល​អស់​ទៀត ក៏​ខ្ញុំ​អត់​អី​រក»

ទោះ​យ៉ាង​ណា លោក ទឹម សាវុធ នាយ​ខណ្ឌ​រដ្ឋបាល​ជលផល​ខេត្ត​សៀមរាប​នៃ​អធិការដ្ឋាន​រដ្ឋបាល​ជលផល ខាង​ជើង​បឹង​ទន្លេសាប បាន​មាន​ប្រសាសន៍​ថា រដ្ឋបាល​ជលផល​មិន​បាន​យល់​ព្រម​នឹង​សំណើ​របស់​អ្នក​នេសាទ​ទាំង​នោះ​ទេ ពីព្រោះ​ពួក​គេ​បាន​មក​សុំ​អនុញ្ញាត​ប្រើ​ឧបករណ៍​នេសាទ​ខុស​ច្បាប់។

លោក​មាន​ប្រសាសន៍​បន្ត​ថា ៖ «ប្រភេទ​នេសាទ​គាត់​ហ្នឹង ខ្លះ​គាត់​ធ្វើ​ជា​លក្ខណៈ​គ្រួសារ ខ្លះ​ជា​លក្ខណៈ​សិប្បកម្ម​។ ក៏​ប៉ុន្តែ​គ្រួសារ​ហ្នឹង​ក៏​វា​ខុស​ច្បាប់ ដូច​ជា​លប​ណ​រ៉ាវ អ៊ីចឹង​គាត់​ដាក់​ប្រវែង​រហូត​ដល់​រាប់​រយ​ម៉ែត្រ​ឯ​ណោះ វា​ខុស ហើយ​ក្រឡា​អួន​គាត់​ប្រើ​តូច​ជាង​១​ហ៊ុន​កន្លះ។ លប​ណ​រ៉ាវ​អ៊ីចឹង​គេ​អត់​ឲ្យ​គាត់​ប្រើ​សាច់​មង​អ៊ីចឹង គាត់​ដាក់​សាច់​មង ដែល​ធ្វើ​ឲ្យ​វា​ខុស​។ កន្លង​មក គាត់​បាន​ទៅ​ជួប​ខ្ញុំ​នៅ​ខណ្ឌ​រដ្ឋបាល​ជល​ផល​សៀម​រាប គាត់​សុំ​ឲ្យ​ជលផល​បន្ធូរ​បន្ថយ​លើក​លែង​ការ​បង្ក្រាប​បទ​ល្មើស​មួយ​ចំនួន ជា​ពិសេស​ការ​ដាក់​រ៉ាវ​ហ្នឹង ក៏​ប៉ុន្តែ​ខ្ញុំ​បាន​ឲ្យ​គាត់​ហ្នឹង​មក​ជួប​ខេត្ត​មក ព្រោះ​ខ្ញុំ​ជា​អ្នក​អនុវត្ត​ច្បាប់»

លោក ស៊ូ ភិរិន្ទ អភិបាល​ខេត្ត​សៀមរាប បាន​មាន​ប្រសាសន៍​ថា លោក​មិន​អាច​អន្តរាគមន៍​ជួយ​បន្ធូរ​បន្ថយ​តាម​ការ​ស្នើ​សុំ​របស់​ប្រជា​នេសាទ​ទាំង​នោះ​បាន​ទេ ពីព្រោះ​ច្បាប់​នេសាទ​បាន​ចែង​មក មិន​ឲ្យ​ប្រើ​ឧបករណ៍​ក្រឡា​ល្អិត ដែល​យក​ទៅ​អូស​បណ្ដាល​ឲ្យ​ងាប់​ទាំង​ត្រី​តូច​ៗ និង​កំពឹស​មិន​សល់​នោះ៕

ព័ត៌មាន (0)
Share
គេហទំព័រ​ទាំងមូល