អភិបាលក្រុងភ្នំពេញ លោក កែប ជុតិមា មានប្រសាសន៍ថា ការសាងសង់ស្ពានអាកាសនេះឡើង ដើម្បីបញ្ចៀសចរាចរណ៍កកស្ទះ ដែលពីមុននៅទីនេះ គឺជារង្វង់មូលក្បាលថ្នល់ ដែលមានអ្នកធ្វើដំណើរកកកុញ ខ្វាត់ខ្វែង ៖ «...សម្ដេចអគ្គមហាសេនាបតីតេជោ ហ៊ុន សែន បានអនុញ្ញាតឲ្យសាលារាជធានីភ្នំពេញ កសាងស្ពានអាកាសនេះឡើង ដើម្បីកាត់បន្ថយការកកស្ទះចរាចរណ៍នៅតំបន់នេះ ដោយប្រើប្រាស់ថវិកាបានមកពីការវិនិយោគរបស់រាជធានីភ្នំពេញ ជាមួយក្រុមហ៊ុនវិនិយោគទុនអាណិកជនកម្ពុជា...»។
លោក ហ៊ុន សែន នាយករដ្ឋមន្ត្រី ដែលចូលរួមជាអធិបតី នៅក្នុងការសម្ពោធស្ពាននោះ មានប្រសាសន៍ថា រំពឹងថានឹងលែងមានការស្ទះចរាចរណ៍នៅកន្លែងនោះទៀតហើយ ។ លោកនាយរដ្ឋមន្ត្រី ក៏បានអំពាវនាវឲ្យមានការគោរពច្បាប់ចរាចរណ៍ ដើម្បីថែរក្សាស្ពាននោះដែរ ៖ «ក្រោយពេលដែលយើងសម្ពោធនេះទៅ ចរាចរណ៍តាមផ្លូវនេះ គឺមិនស្ទះតទៅទៀតទេ ដោយសារអ្នកធ្វើដំណើរទៅកាន់ផ្លូវជាតិលេខ២ ហើយពីផ្លូវជាតិលេខ២ ចូលមកកាន់ទីក្រុងភ្នំពេញ ត្រូវធ្វើដំណើរតាមផ្លូវអាកាស។ ឯចំពោះអ្នកធ្វើដំណើរចេញទៅផ្លូវជាតិលេខ១ និងពីផ្លូវជាតិលេខ១ ចូលមកទីក្រុងភ្នំពេញនឹងធ្វើដំណើរនៅខាងក្រោម ហើយសង្ឃឹមថា រថយន្តទាំងឡាយនឹងមិនជ្រុលចង្កូតទៅបុកសសរស្ពាននោះទេ»។
ស្ពានអាកាសក្បាលថ្នល់ ដែលស្ថិតនៅអតីតរង្វង់មូលក្បាលថ្នល់ ត្រូវបានគេសាងសង់ កាលពីឆ្នាំ២០០៩ ក្នុងរយៈពេល ១ឆ្នាំគត់ ដោយចំណាយអស់ទឹកប្រាក់ ជាង៦លានដុល្លារ ដោយក្រុមហ៊ុនអាណិកជនខ្មែររបស់លោក ពុង ខៀវសែ។
បន្ទាប់ពីការសម្ពោធឲ្យប្រើប្រាស់ស្ពានអាកាស ទី១នេះ អាជ្ញាធរក្រុងភ្នំពេញ បានគ្រោងថា គេនឹងសាងសង់ស្ពានអាកាសទី២ បន្ថែមទៀត នៅស្តុបពេទ្យលោកសង្ឃបន្តទៀត ដើម្បីបញ្ចៀសការស្ទះចរាចរណ៍ដូចគ្នានេះដែរ។
នៅប្រទេសកម្ពុជា ចរាចរណ៍មានការកកស្ទះដោយសារមានម៉ូតូចំនួន ៨០ម៉ឺនគ្រឿង និងមានរថយន្តចំនួន ១៧ម៉ឺនគ្រឿង។ ចរាចរណ៍នៅទីក្រុងភ្នំពេញ ត្រូវបានគេរអ៊ូរទាំគ្រប់គ្នាថាកកស្ទះណែនណាន់ នៅគ្រាដែលផ្លូវថ្នល់ក្នុងក្រុងតូចចង្អៀត រួមជាមួយអ្នកធ្វើដំណើរ ធ្វើចរាចរណ៍រញ៉េរញ៉ៃ មិនសូវគោរពច្បាប់ទន្លាប់៕