បក្ស​ប្រឆាំង​ទាមទារ​ឲ្យ​សភា​ពិនិត្យ​គម្រោង​ស្នើសុំ​ថវិកា​ជំនួយ​ឡើង​វិញ

មន្ត្រី​បក្ស​ប្រឆាំង​បាន​ថ្លែង​នៅ​ថ្ងៃ​នេះ​ទាមទារ​ឲ្យ​រដ្ឋសភា​ពិនិត្យ​ឡើង​វិញ​ឲ្យ​លម្អិត​នូវ​គម្រោង​ស្នើសុំ​ថវិកា​ជំនួយ ដោយសារ​តែ​ការស្នើសុំ​នោះ​ស្មើ​នឹង​១០០%​នៃ​ប្រាក់​ចំណូល​ជាតិ​ទាំងអស់​ហើយ​នោះ។
ដោយ មុំ សុផុន
2008-11-28
អ៊ីម៉ែល
មតិ
Share
បោះពុម្ព

អ្នក​តំណាងរាស្ត្រ សុន ឆៃ មក​ពី​គណបក្ស​សមរង្ស៊ី​បាន​ថ្លែង​នៅ​ថ្ងៃ​ព្រហស្បតិ៍​នេះ​យ៉ាង​ដូច្នេះ​ថា ៖ «យើង​ឃើញ​ហើយ យើង​ខ្ចី​លុយ​រហូត​ដល់​ទឹក​ប្រាក់​ដែល​យើង​ខ្ចី​ហ្នឹង​វា​ស្មើ​នឹង​១០០%​នៃ​GDP​ហើយ... ក្នុង​ពិភពលោក​គេ​មិន​ដែល​ឲ្យ​ប្រទេស​មួយ​ទៅ​ខ្ចី​លុយ​គេ​រហូត​ដល់​ស្មើ​នឹង​ទឹក​ប្រាក់​ដែល​ប្រទេស​ទាំងមូល​រក​បាន​ក្នុង​មួយ​ឆ្នាំ បើ​យើង​ជំពាក់​គេ​ស្មើ​នឹង​យើង​រក​បាន​ក្នុង​មួយ​ឆ្នាំ គឺ​គ្មាន​វិធី​ណា​ដែល​យើង​អាច​សង​គេ​បាន​ទេ។ ដូច្នេះ​បាន​ជា​ចាំបាច់​ត្រូវ​ឲ្យ​មាន​រដ្ឋសភា​ទៅ​ពិនិត្យ​ឡើង​វិញ។ ការខ្ចី​មួយៗ... ត្រូវតែ​ចែក​គ្នា​ឲ្យ​ដាច់ កុំ​ឲ្យ​ខ្ចី​ជា​កញ្ចប់ សព្វថ្ងៃ​នេះ​យើង​ឲ្យ​ខ្ចី​ជា​កញ្ចប់»

ការថ្លែង​នេះ​ស្រប​ពេល​ដែល​រដ្ឋាភិបាល​ខ្មែរ​គ្រោង​នឹង​បើក​កិច្ចប្រជុំ​មួយ​ជាមួយ​ក្រុម​ប្រទេស​អ្នក​ផ្តល់​ជំនួយ​នា​ដើម​ខែ​ធ្នូ​ខាង​មុខ ប្រយោជន៍​គៀងគរ​រក​ថវិកា​ជំនួយ​ជាង​៥០០​លាន​ដុល្លារ​សហរដ្ឋ​អាមេរិក​នោះ។

ផ្ទុយ​ទៅ​វិញ លោក ជាម យៀប អ្នក​តំណាង​រាស្ត្រ​មក​ពី​គណបក្ស​ប្រជាជន​កម្ពុជា​បាន​ថ្លែង​ថា គម្រោង​សុំ​និង​ការចំណាយ​ថវិកា​របស់​រដ្ឋាភិបាល​តែង​បាន​ពិនិត្យ​ដោយ​រដ្ឋសភា។ ឆ្នាំ​កន្លង​ទៅ​កម្ពុជា​ទទួល​បាន​ជំនួយ​បរទេស​ចំនួន​៦៩០​លាន​ដុល្លារ។ ផែនការ​គៀងគរ​រក​ជំនួយ​បរទេស​នា​ឆ្នាំ​នេះ គឺ​បាន​ធ្វើ​ឡើង​ស្រប​ពេល​ដែល​ប្រទេស​អ្នក​ផ្តល់​ជំនួយ​ដែល​រួម​មាន​ទាំង​សហរដ្ឋ​អាមេរិក សហគមន៍​អឺរ៉ុប និង​ប្រទេស​ចិន គឺ​កំពុង​តែ​រង​ផល​ប៉ះពាល់​ពី​វិបត្តិ​សេដ្ឋកិច្ច​ពិភពលោក។

ក៏​ប៉ុន្តែ លោក ជាម យៀប ថ្លែង​រំពឹង​ទៀត​ថា តំណាង​ប្រទេស​អ្នក​ផ្តល់​ជំនួយ​នឹង​យល់ព្រម​ផ្តល់​ជំនួយ​ជាង​៥០០​លាន​ដុល្លារ​តាម​ការស្នើ​របស់​រដ្ឋាភិបាល​ខ្មែរ​ដែល​គេ​នឹង​ធ្វើ​នៅ​ក្នុង​ក្រុង​ភ្នំពេញ នា​ថ្ងៃ​ទី​៣ ខែ​ធ្នូ​ខាង​មុខ​នោះ។

លោក ជាម យៀប បាន​មាន​ប្រសាសន៍​ថា ៖ «យើង​មាន​ជំនឿ​ជាក់​ថា ដូច​ជា Consultative Group ដែល​គេ​ធ្លាប់​ឲ្យ​ថ្ងៃ​៣ ខែ​ធ្នូ​ហ្នឹង នឹង​ធ្វើ អ៊ីចឹង​ទេ​យើង​ឃើញ​វា​មាន​ជំនឿ​សុទិដ្ឋិនិយម​ថា គេ​នឹង​ជួយ​យើង​បន្ត​ទៅ​ទៀត ទោះ​បី​ជា​មាន Financial Crisis យ៉ាង​ណា​ក៏​ដោយ ក៏​ប្រទេស​ជា​មិត្ត​ឬ​ក៏​សហគមន៍​អន្តរជាតិ​ហ្នឹង​នឹង​អាច​ជួយ​ផ្ដល់​ឲ្យ​យើង​ដក​បទពិសោធន៍ កាលពី​ឆ្នាំ​២០០៨​កន្លង​ទៅ យើង​ស្នើសុំ ៦០២​លាន (ដុល្លារ) គេ​ឲ្យ​យើង​ដល់​ទៅ​៦៩០​លាន»

ឯកអគ្គរដ្ឋទូត​បារាំង លោក Jean Francois Desmazieres បាន​មាន​ប្រសាសន៍​នៅ​ថ្ងៃ​ព្រហស្បតិ៍​នេះ​ដែរ​ថា វិបត្តិ​ហិរញ្ញវត្ថុ​សាកលលោក​នឹង​មិន​មាន​ផល​ប៉ះពាល់​ធ្ងន់​ធ្ងរ​ចំពោះ​ការផ្ដល់​ជំនួយ​អភិវឌ្ឍន៍​មក​ឲ្យ​ប្រទេស​កម្ពុជា​សម្រាប់​ឆ្នាំ​២០០៩​នោះ​ឡើយ។

សូម​ជម្រាប​ថា កម្ពុជា​ត្រូវការ​ជំនួយ​បរទេស​រវាង​៥០០​លាន​ដុល្លារ​ទៅ​ជាង​៦០០​លាន​ដុល្លារ​អាមេរិក ក្នុង​ការប្រើប្រាស់​ជាមួយ​ថវិកា​ជាតិ​ដើម្បី​អភិវឌ្ឍ​ប្រទេស។ សម្រាប់​ឆ្នាំ​២០០៩​ខាង​មុខ​នេះ​រដ្ឋាភិបាល​ខ្មែរ​គ្រោង​ដំឡើង​ការចំណាយ​ថវិកា​ជាតិ​រហូត​ដល់​ជិត​២​ពាន់​លាន​ដុល្លារ​សហរដ្ឋ​អាមេរិក៕

ព័ត៌មាន (0)
Share
គេហទំព័រ​ទាំងមូល