យុវជន​កាយឫទ្ធិ​យក​ថ្ងៃ​ ១៤ កុម្ភៈ ជា​ថ្ងៃ​ជូន​អំណោយ​ដល់​គ្រូ​បង្រៀន

ក្រុម​យុវជន​ជាតិ​កាយឫទ្ធិ​ប្រមាណ ១០០​នាក់ បាន​ជួប​ជុំ​គ្នា​នៅ​ពហុកីឡាដ្ឋាន​ជាតិ​អូឡាំពិក នៅ​ព្រឹក​ថ្ងៃ​ទី​១៤ ខែ​កុម្ភៈ ដើម្បី​ផ្ញើ​សារ​ទៅ​ដល់​យុវជន​ថា ថ្ងៃ​១៤ កុម្ភៈ មិន​មែន​ជា​បុណ្យ​សង្សារ​ទេ ​តែ​ជា​ទិវា​នៃ​សេចក្ដី​ស្រលាញ់​សម្រាប់​គ្រប់​គ្នា រួម​ទាំង​ក្រុម​គ្រួសារ អ្នក​មាន​គុណ និង​មិត្ត​ភក្តិ។
ដោយ សុ ជីវី
2013.02.14
យុវជន ១៤ កុម្ភៈ ៣០៥ យុវជន​កាយឫទ្ធិ​ជូន​អំណោយ​ដល់​គ្រូបង្រៀន នៅ​ពហុកីឡាដ្ឋាន​ជាតិ​អូឡាំពិក កាល​ពី​ព្រឹក​ថ្ងៃ​ថ្ងៃ​ទី​១៤ ខែ​កុម្ភៈ ឆ្នាំ​២០១៣។
RFA/Sochivy

ក្រុម​យុវជន​កាយឫទ្ធិ​ក្នុង​រាជធានី​ភ្នំពេញ យក​ថ្ងៃ​ទី​១៤ កុម្ភៈ ជា​ថ្ងៃ​ជូន​អំណោយ​ដល់​គ្រូ​បង្រៀន និង​មិត្ត​ភក្តិ ដើម្បី​បញ្ជាក់​ប្រាប់​យុវជន​ផ្សេង​ទៀត​ថា ថ្ងៃ​នេះ​ជា​ថ្ងៃ​នៃ​ក្ដី​ស្រឡាញ់ ដែល​មិន​មែន​ជា​បុណ្យ​សម្រាប់​តែ​អ្នក​ដែល​មាន​ដៃ​គូ​ស្នេហា​ឡើយ។

ស្នង​ការ​ជាតិ​កម្មវិធី​យុវជន​កាយឫទ្ធិ​ជាតិ​កម្ពុជា លោក លឹម ម៉ូរ៉ា មាន​ប្រសាសន៍​នៅ​ក្នុង​ពិធី​ជួប​ជុំ​នោះ​ថា ក្រុម​យុវជន​កាយឫទ្ធិ​នឹង​ចែក​រំលែក​សារ ដែល​ជា​អត្ថន័យ​ពិត​ប្រាកដ​នៃ​ថ្ងៃ​ទី​១៤ ខែ​កុម្ភៈ ដល់​យុវជន​ផ្សេង​ទៀត​នៅ​ក្នុង​មហាវិទ្យាល័យ និង​សមាជិក​ក្នុង​គ្រួសារ​របស់​ពួក​គេ៖ «ក្មួយៗ​ដែល​បាន​ចូល​រួម​ហ្នឹង​គាត់​បាន​យល់​ពី​ខ្លឹមសារ​នៃ​ទិវា​នេះ​ច្បាស់​លាស់ ហើយ​គាត់​នឹង​អាច​យក​ព័ត៌មាន​ជុំវិញ​សកម្មភាព​របស់​គាត់​ហ្នឹង យក​ទៅ​ចែក​រំលែក​ដល់​មិត្ត​ភក្តិ​រប​ស់​គាត់ ហើយ​គាត់​អាច​យក​គំរូ​នេះ​ទៅ​ប្រើ​ប្រាស់​នៅ​នៅ​ក្នុង​ការ​គោរព​ស្រឡាញ់​ចំពោះ​ក្រុម​គ្រួសារ​របស់​គាត់»

ក្រុម​និស្សិត​កាយឫទ្ធិ ចំនួន ១៤០​នាក់ ដែល​បាន​ជួបជុំគ្នា​មកពី​គ្រឹះស្ថាន​ចំនួន ៤ រួម​មាន​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច សាកលវិទ្យាល័យ​ជាតិ​គ្រប់គ្រង សាកលវិទ្យាល័យ​ភូមិន្ទ​កសិកម្ម​ចម្ការ​ដូង និង​សាកលវិទ្យាល័យ​ភូមិន្ទ​ភ្នំពេញ។ ពួក​គេ​បាន​នាំ​គ្នា​យក​ផ្កា និង​វត្ថុ​អនុស្សាវរីយ៍​ទៅ​ជូន​លោកគ្រូ​អ្នក​គ្រូ​ចំនួន ៥០០​រូប ដោយ​សំអាង​ថា ជា​ការ​ដឹងគុណ​ដល់​ពួក​គាត់។

និស្សិត​នៅ​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច កញ្ញា ផុន ស្រីពៅ អោយ​ដឹង​ថា នាង​ពេញ​ចិត្ត​នឹង​ចូលរួម​ក្នុង​ការ​ជំរុញ​អោយ​ការ​ផ្លាស់​ប្ដូរ​គំនិត​ចំពោះ​អត្ថន័យ​នៃ​ថ្ងៃ ទី​១៤ ខែ​កុម្ភៈ៖ «ពួក​ខ្ញុំ​នឹង​បន្ត​នាំ​យក​ផ្កា និង​ក្រមា​ទៅ​ចែក​ជូន​ដល់​លោកគ្រូ អ្នកគ្រូ ព្រោះ​ចង់​បញ្ជាក់​ថា ពួក​យើង​គោរព​ស្រឡាញ់​ពួក​គាត់​ដែល​ពួកគាត់​បាន​ផ្ទេរ​ចំណេះ​ពួក​យើង​កន្លង​មក។ កម្មវិធី​ហ្នឹង​ល្អ​សម្រាប់​យុវជន គឺ​អប់រំ​យុវជន​អោយ​ដឹង​ពី​ថ្ងៃ​ទី​១៤។ មាន​ន័យ​ថា ថ្ងៃ​ហ្នឹង​មិនមែន​ជា​ថ្ងៃ​បុណ្យ​សង្សារ​ទេ ជា​ថ្ងៃ​បុណ្យ​នៃ​ក្ដី​ស្រឡាញ់​សម្រាប់​ម៉ាក់​ប៉ា ឬ​លោកគ្រូ អ្នកគ្រូ ចាស់​ទុំ ដែល​យើង​ធ្លាប់​ស្គាល់​ពី​មុន»

អ្នក​សម្រប​សម្រួល​ក្រុម​យុវជន​កាយឫទ្ធិ លោក សុខ សប្បាយណា បាន​ហៅ​ការ​ជួប​ជុំ​យុវជន​កាយឫទ្ធិ​ថា ជា​ពិធី​កាយឫទ្ធិ និង​ការគោរព​ស្រលាញ់​ដែល​ផ្ដោត​លើ​ជំរុញ​លើក​ទឹក​ចិត្ត យុវជន​ចូល​រួម​សកម្មភាព​សង្គម​រំលឹក​គុណ​ដល់​សាស្ត្រាចារ្យ ថែរក្សា​ទំនៀម​ទម្លាប់​ឲ្យ​បាន​គង់វង្ស ធ្វើជា​គំរូ​ដល់​យុវជន​ដទៃ​ទៀត ឲ្យ​បាន​យល់​ថា ថ្ងៃ​ទី​១៤ ខែ​កុម្ភៈ នេះ ជាទី​វា​នៃ​ក្តី​ស្រលាញ់​ទូទៅ គឺ​សេចក្ដី​ស្រលាញ់​ក្រុម​គ្រួសារ រវាង​គ្រូ និង​សិស្ស មិត្ត​ភ័ក្តិ និង​មិត្តភ័ក្ដិ មិន​មែន​ជា​ថ្ងៃបុណ្យ​សង្សារ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។