តុលាការ​បដិសេធ​សំណើ​សុំ​ពន្យារ​ពេល​ការ​កោះហៅ​សម​រង្ស៊ី

តុលាការ​ខេត្ត​ស្វាយរៀង​បាន​សម្រេច​មិន​ពន្យារ​ពេល​ការ​កោះ​ហៅ​លោក សម រង្ស៊ី មក​សាកសួរ តាម​សំណើ​របស់​មេធាវី​នោះ​ទេ។
ដោយ សុខ សេរី
2009-12-28
អ៊ីម៉ែល
មតិ
Share
បោះពុម្ព
លោក សម រង្ស៊ី អតីត​ប្រធាន​គណបក្ស សម សង្ស៊ី​។
លោក សម រង្ស៊ី អតីត​ប្រធាន​គណបក្ស សម សង្ស៊ី​។
RFA

តុលាការ​ខេត្ត​ស្វាយរៀង​នៅ​ថ្ងៃ​ទី​២៨ ខែ​ធ្នូ​នេះ បាន​បដិសេធ​មិន​ព្រម​ពន្យារ​ពេល​នៃ​ការ​សាកសួរ​ចម្លើយ​លោក សម រង្ស៊ី មេ​ដឹកនាំ​គណបក្ស​ប្រឆាំង​នោះ​ទេ នៅ​គ្រា​ដែល​មេធាវី​របស់​លោក​បាន​ទៅ​បង្ហាញ​ខ្លួន​ជំនួស​លោក​នៅ​ក្នុង​តុលាការ​តាម​ការ​កោះហៅ ដើម្បី​ដាក់​សំណើ​ពន្យារ​ពេល​នោះ ដោយ​មិន​កំណត់​ថៃ្ង​ជាក់លាក់។

មន្រ្តី​តុលាការ​ខេត្ត​ស្វាយរៀង​ដែល​បាន​បដិសេធ​នោះ គឺ​មាន​ព្រះរាជអាជ្ញា​និង​ចៅក្រម​ស៊ើបសួរ លោក ទ្បុង កេសភីរម្យ។

លោក ជូង ជូងី ជា​មេធាវី​ការពារ​ក្តី​ឲ្យ​លោក សម រង្ស៊ី ដែល​បាន​ចូល​ខ្លួន​ក្នុង​តុលាការ​ខេត្ត​ស្វាយរៀង នៅ​ថៃ្ង​ច័ន្ទ​នេះ បាន​មាន​ប្រសាសន៍​ប្រាប់​វិទ្យុ​អាស៊ីសេរី​តាម​ទូរស័ព្ទ​មក​ថា សំណើ​របស់​លោក​សុំ​ឲ្យ​តុលាការ​ពន្យារ​ពេល​សាកសួរ​កូន​ក្តី​របស់​លោក​ទៅ​ថៃ្ង​ក្រោយ​នោះ​ត្រូវ​បាន​បដិសេធ​យ៉ាង​ដាច់ខាត។

លោក ជូង ជូងី បាន​បញ្ជាក់​ថា ៖ «ខ្ញុំ​ទៅ​ក្នុង​នាម​មេធាវី ខ្ញុំ​បាន​ដាក់​ពាក្យ​សុំ​ពន្យារ​ពេល​ការ​ចូល​ខ្លួន​របស់​ឯកឧត្ដម សម រង្ស៊ី ដោយ​មូលហេតុ​ថា មក​ដល់​ថ្ងៃ​នេះ​ឯកឧត្ដម សម រង្ស៊ី ជាប់​បំពេញ​បេសកកម្ម​នៅ​ក្រៅ​ប្រទេស។ ក្រោយ​ពី​ព្រះរាជអាជ្ញា​គាត់​ពិនិត្យ​ហើយ គាត់​ឆ្លើយ​មក ចៅក្រម​ស៊ើប​អង្កេត​ក៏​បាន​ចារ​មក​លើ​ពាក្យ​សុំ​របស់​ខ្ញុំ​ថា មូលហេតុ​មិន​ត្រឹមត្រូវ ដូច្នេះ​មិន​អនុញ្ញាត​តាម​ការ​សុំ​ទេ»

សុខ សេរី ៖ តើ​លោក​ចង់​ពន្យារ​ពេល​ការ​សាកសួរ​ហ្នឹង​ទៅ​ថ្ងៃ​ណា​វិញ? ជូង ជូងី ៖ នេះ​គឺ​ខ្ញុំ​មិន​កំណត់​ទេ មិន​កម្រិត​ទេ អាស្រ័យ​ទៅ​លើ​ចៅក្រម។

ប្រតិកម្ម​ទៅ​នឹង​ការ​បដិសេធ​របស់​មន្រ្តី​តុលាការ​នោះ លោក សម រង្ស៊ី ជា​មេ​ដឹកនាំ​នៃ​គណបក្ស​ប្រឆាំង​ធំ​ជាង​គេ​ក្នុង​ប្រទេស​កម្ពុជា បាន​មាន​ប្រសាសន៍​តាម​ទូរស័ព្ទ​ពី​ប្រទេស​បារាំង​ដោយ​សម្ដី​ធ្ងន់ៗ​ថា តុលាការ​មិន​ឯករាជ​ឋិត​នៅ​ក្រោម​សម្ពាធ​នយោបាយ។

លោក សម រង្ស៊ី បាន​ថ្លែង​ថា ៖ «តុលាការ​មែនទែន​មិន​មែន​នៅ​ទីក្រុង​ភ្នំពេញ ហើយ​មិន​មែន​នៅ​ខេត្ត​ស្វាយរៀង​ទេ។ តុលាការ​មែនទែន អ្នក​ដែល​សម្រេច​ពី​លើ​នោះ គឺ​នៅ​ទីក្រុង​ហាណូយ នៅ​ប្រទេស​វៀតណាម​ឯ​ណោះ!»

លោក​មិន​បាន​ប្រាប់​ឲ្យ​ដឹង​ថា តើ​លោក​នឹង​វិល​ត្រឡប់​មក​ប្រទេស​កម្ពុជា​នៅ​ពេល​ណា​នោះ​ទេ​ដើម្បី​ឆ្លើយ​បំភ្លឺ​នៅ​ក្នុង​តុលាការ​ខេត្ត​ស្វាយរៀង​នោះ។

វិទ្យុ​អាស៊ីសេរី​នៅ​មិន​ទាន់​អាច​ទាក់ទង​បាន​នៅ​ទ្បើយ​ទេ​ដើម្បី​សុំ​ការ​ឆ្លើយ​តប​ពី​មន្ត្រី​តុលាការ​នៅ​ថ្ងៃ​ច័ន្ទ​នេះ​ទៅ​នឹង​ការ​បរិហារ​រិះគន់​របស់​លោក សម រង្ស៊ី។ ប៉ុន្តែ​លោក ទិត សុធា ជា​ទីប្រឹក្សា​រាជ​រដ្ឋាភិបាល​កម្ពុជា និង​ជា​អ្នក​នាំ​ពាក្យ​នៃ​អង្គភាព​ព័ត៌មាន ប្រតិកម្ម​រហ័ស នៃ​ទីស្តីការ​គណៈ​រដ្ឋមន្រ្តី បាន​មាន​ប្រសាសន៍​ថា ជា​សម្ដី​មិន​ទទួល​ខុស​ត្រូវ​មួយ។

លោក ទិត សុធា បាន​អះអាង​ថា ៖ «ឯកឧត្ដម សម រង្ស៊ី បាន​និង​កំពុង​តែ​មាក់ងាយ​ប្រព័ន្ធ​តុលាការ​កម្ពុជា ពីព្រោះ​អភិបាល​ស្រុក​ចន្ទ្រា​គឺ​ជា​ដើម​បណ្ដឹង ហើយ​រឿង​ក្ដី​នេះ​កំពុង​តែ​ស្ថិត​នៅ​ក្នុង​នីតិ​វិធី​របស់​តុលាការ​ខេត្តស្វាយរៀង។ នេះ​គឺ​ជា​សម្ដី​ដោះសា និយាយ​បែប​ឡប់ឡែ គឺ​គ្មាន​ភាព​ថ្លៃថ្នូរ មិន​ស័ក្តិសម​ជា​អ្នក​ចេះ​ដឹង​ច្បាប់»

លោក សម រង្ស៊ី បាន​រង​ការ​ចោទ​ប្រកាន់​ដោយ​តុលាការ​ខេត្ត​ស្វាយរៀង ក្រោម​បទ​បំផ្លាញ​ទ្រព្យ​សម្បតិ្ត​សាធារណៈ និង​ញុះញង់​ឲ្យ​មាន​ការ​រើសអើង​ជាតិ​សាសន៍ ដោយសារ​តែ​លោក​បាន​ដក​បង្គោល​តម្រុយ​ព្រំដែន​កម្ពុជា​វៀតណាម​លេខ​១៨៥ កាល​ពី​ថៃ្ង​ទី​២៥ ខែ​តុលា​កន្លង​ទៅ នៅ​ក្នុង​ភូមិ​កោះក្បាន​កណ្តាល ស្រុក​ចន្រ្ទា ខេត្ត​ស្វាយរៀង។

កាល​ពី​ថ្ងៃ​ទី​២៣ ខែ​ធ្នូ សប្តាហ៍​កន្លង​ទៅ​នេះ តុលាការ​ខេត្ត​ស្វាយរៀង​បាន​ចាប់​ឃុំ​ប្រជាពលរដ្ឋ​ខែ្មរ​ចំនួន ២​នាក់ គឺ​លោក ព្រំ ជា អាយុ ៤១​ឆ្នាំ និង​លោកស្រី មាស ស្រី អាយុ ៣៩​ឆ្នាំ ក្រោម​បទ​បំផ្លាញ​ទ្រព្យ​សម្បតិ្ត​សាធារណៈ ដោយសារ​តែ​បាន​ចូលរួម​ក្នុង​ការ​ដក​បង្គោល​តម្រុយ​ព្រំដែន​ជាមួយ​នឹង​លោក សម រង្ស៊ី នោះ​ដែរ៕

ព័ត៌មាន (8)
Share

អ្នក​អាន​អនាមិក

As I am khmer , I love my nation and my country.But as I have read the RFA news,Mr Sam Ranngsy seems to look down on our nation and our country. For example, he said that the real court is in Honoi city, Vietnam it is not in Phnom Phen or Svay Rieng.

Dec 29, 2009 03:05 AM

អ្នក​អាន​អនាមិក

លោកសមរង្សីត្រូវតែទៅបង្ហាញខ្លួននៅមុខតុលាការ
បើមិនដួច្នោះទេលោកសមរង្សីមិនអាចចូលស្រុកវិញបានទេ!

Dec 28, 2009 11:04 PM

អ្នក​អាន​អនាមិក

I think that Mr. Sam Rainry doesn't need to fight in Svay Rieng court for wasting time. He should bring the border matter direct to the international court.

Dec 28, 2009 10:31 PM

អ្នក​អាន​អនាមិក

លោកសម រង្សីអើយ!!! សុំត្រឡប់មកស្រុកខ្មែរ
ជួយគ្នាផង។ បក្សពួកត្រូវគេចាប់អស់ពីរនាក់ហើយ។​

Dec 28, 2009 09:05 PM

អ្នក​អាន​អនាមិក

Of course, the real court is in Hanoi, VN because Xun Xen just obeyed their order and Xun Xen did like this just protect his power only.

Dec 28, 2009 08:25 PM

មើល​មតិ​ទាំង​អស់.

គេហទំព័រ​ទាំងមូល