ថៃចង់ឲ្យកម្ពុជាដោះលែងអ្នកទោសជាសកម្មជនអាវលឿងម្នាក់ទៀត
2013.02.07
ប្រធានការិយាល័យការពារផលប្រយោជន៍ជនជាតិថៃនៅបរទេស នៃក្រសួងការបរទេសថៃ នៅកម្ពុជា លោក ស៊ូវ៉ាត់ កែវសុង (Suwat Kaewsook) ផ្ដល់បទសម្ភាសន៍ដល់អ្នកកាសែតនៅថ្ងៃទី១ ខែកុម្ភៈ ឆ្នាំ២០១៣។
ការព្យាយាមនេះ គឺក្រោយពីព្រះមហាក្សត្រខ្មែរ ព្រះបាទសម្ដេចព្រះបរមនាថ នរោត្តម សីហមុនី បានប្រទានការបន្ធូរបន្ថយទោសចំនួន ៦ខែ ក្នុងចំណោមទោសសរុប ៨ឆ្នាំ ជូនសកម្មជនអាវលឿងថៃ រូបនោះ កាលពីថ្ងៃទី១ ខែកុម្ភៈ។
មន្ត្រីការបរទេសថៃ នៅតែមានសុទិដ្ឋិនិយមថា កម្ពុជា នឹងដោះលែងអ្នកទោសថៃ ជាសមាជិកក្រុមអាវលឿងម្នាក់ទៀត ដែលកំពុងជាប់ឃុំនៅពន្ធនាគារព្រៃស ប្រទេសកម្ពុជា នៅពេលខាងមុខនេះ ដោយផ្អែកលើទំនាក់ទំនងល្អរវាងមេដឹកនាំរដ្ឋាភិបាលនៃប្រទេសទាំងពីរ។
ប្រធានការិយាល័យការពារផលប្រយោជន៍ជនជាតិថៃ នៅបរទេសប្រចាំនៅប្រទេសកម្ពុជា លោក ស៊ូវ៉ាត់ កែវសុង (Suwat Kaewsook) បានមានប្រសាសន៍ជាភាសាខ្មែរ ប្រាប់វិទ្យុអាស៊ីសេរី នាពេលថ្មីៗនេះថា រាជរដ្ឋាភិបាលកម្ពុជា និងរាជរដ្ឋាភិបាលថៃ កំពុងតែមានទំនាក់ទំនងល្អជាមួយគ្នា ដូច្នេះសេចក្តីសង្ឃឹមសម្រាប់ការដោះលែងលោក វីរៈ ស៊ុំក្វាមឃីត នៅតែមាននៅឡើយ។
លោក ស៊ូវ៉ាត់ កែវសុង៖ «មានការសហការគ្នាល្អ បញ្ហាដែលយើងមានតិចតួចខាងផ្លូវច្បាប់ ក៏ដូចជាករណីលោក វីរៈ ស៊ុំក្វាមឃីត យើងនៅគិតថានៅពេលអនាគត យើងទទួលបាននូវការមេត្តាពីខាងរាជរដ្ឋាភិបាលកម្ពុជា ជួយគាត់ទៅតាមច្បាប់»។
ចំណែកឯអ្នកទោសសកម្មជនអាវលឿងថៃ ម្នាក់ទៀតឈ្មោះ អ្នកស្រី រ៉ាត់ទ្រី ប៉ៃប៉ូតាណាប៉ៃប៉ូន (Ratree Paiputanapaiboon) ត្រូវបានព្រះមហាក្សត្រខ្មែរ ព្រះបាទសម្ដេចព្រះបរមនាថ នរោត្តម សីហមុនី បានប្រទានការលើកលែងទោស និងត្រូវបានដោះលែងជាស្ថាពរនៃទោសសរុបចំនួន ៦ឆ្នាំ កាលពីថ្ងៃទី១ ខែកុម្ភៈ កន្លងទៅនេះ។
ការប្រទានការលើកលែងទោស និងការបន្ធូរបន្ថយទោសនោះ គឺក្រោយពីប្រមុខរាជរដ្ឋាភិបាលកម្ពុជា លោក ហ៊ុន សែន បានទទួលសំណើសុំឲ្យដោះលែងពីប្រមុខរាជរដ្ឋាភិបាលថៃ អ្នកស្រី យីងឡាក់ ស៊ីណាវ៉ាត់ (Yingluck Shinawatra) កាលពីខែធ្នូ ឆ្នាំ២០១២ កន្លងទៅនេះ។
ទាក់ទងបញ្ហានេះ នាយកខុទ្ទកាល័យរបស់រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍនា គឺលោក សំ ប្រជាមានិត និងជាអ្នកនាំពាក្យក្រសួងយុត្តិធម៌ បានមានប្រសាសន៍នៅថ្ងៃទី៧ ខែកុម្ភៈ ថា លោកសុំមិនធ្វើអត្ថាធិប្បាយទេជុំវិញជំហររបស់រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍនា ដែលជាប្រធានគណៈកម្មាធិការជាតិបន្ធូរបន្ថយទោស និងលើកលែងទោសនោះ៖ «ប៉ុន្តែ គ្រាន់តែថាអ្វីដែលជាទំនាក់ទំនងល្អផ្នែកការទូត។ យើងឃើញថា ភាពរលូនផ្នែកការទូតរវាងកម្ពុជា និងថៃ នេះ គឺបានសម្រួលការងារបានច្រើន ហើយខ្ញុំជឿថា ប្រហែលជានឹងមានការសម្រួលបន្តទៀត»។
ចំណែកឯអ្នកនាំពាក្យក្រសួងមហាផ្ទៃ លោកឧត្តមសេនីយ៍ឯក ខៀវ សុភ័គ បានមានប្រសាសន៍ថា សកម្មជនអាវលឿងថៃ ឈ្មោះ វីរៈ ស៊ុំក្វាមឃីត ត្រូវបានព្រះមហាក្សត្រខ្មែរ បានប្រទានការបន្ធូរបន្ថយទោសចំនួន ៦ខែរួចហើយ៖ «ហើយសង្ឃឹមថានៅបុណ្យក្រោយៗទៀត ឧទាហរណ៍ព្រះរាជពិធីបុណ្យតាំងតុអី ពិធីបុណ្យភ្ជុំបិណ្ឌអី មានតទៅទៀត»។
អ្នកវិភាគឯករាជ លោកបណ្ឌិត សុខ ទូច ដែលតែងតែតាមដានស្ថានការណ៍នយោបាយរវាងកម្ពុជា និងថៃ កន្លងមក បានមានប្រសាសន៍ថា ភាគីថៃ បានប្រើប្រាស់ការទូតត្រជាក់ដោះស្រាយបញ្ហាអ្នកទោសសកម្មជនអាវលឿងថៃ ប៉ុន្តែថៃ តែងតែប្រើប្រាស់អំពើហិង្សាបាញ់សម្លាប់ប្រជាពលរដ្ឋខ្មែរ ដែលគេចោទថាបានចូលទឹកដីថៃ ខុសច្បាប់។
លោកបណ្ឌិត សុខ ទូច៖ «ថៃ មានបានចាប់ខ្មែរទេ នៅដែលខ្មែរធ្វើអ្វីខុស? ទោះបីជាថៃ ច្រងេងច្រងាង ធ្វើអ្វីផ្ដេសផ្ដាសរហូតដល់ស៊ើបការទៅទៀត ខ្មែរយើងចាប់ដាក់គុក។ ឯថៃ បាញ់ខ្មែរ តើគេបានប្រើប្រាស់ប្រព័ន្ធតុលាការទេលើខ្មែរដែរឬទេ? ទី៣ គេប្រើប្រាស់នយោបាយការទូតនៅពេលណាគេចង់បានយើង ពេលណាគេលែងចង់បានយើង គេតែងតែប្រើប្រាស់នូវកម្លាំងយោធា គេមើលងាយជាសមាជិកអាស៊ានដូចគ្នា»។
សាលាដំបូងរាជធានីភ្នំពេញ កាលពីថ្ងៃទី១ ខែកុម្ភៈ ឆ្នាំ២០១១ បានកាត់ទោសសកម្មជនអាវលឿងថៃ ចំនួនពីររូបឲ្យជាប់ពន្ធនាគារ ពីបទចូលទីលានយោធាកម្ពុជា ក្នុងបំណងទុច្ចរិត និងប្រមូលព័ត៌មានសម្ងាត់ ប៉ះពាល់សន្តិសុខជាតិកម្ពុជា ក្នុងអំឡុងពេលមានជម្លោះដែលថៃ ដណ្ដើមកាន់កាប់តំបន់ព្រំដែនក្បែរប្រាសាទព្រះវិហារ។
សកម្មជនអាវលឿងថៃ ឈ្មោះ វីរៈ ស៊ុំក្វាមឃីត ត្រូវបានសាលាដំបូងរាជធានីភ្នំពេញ បានកាត់ទោសឲ្យជាប់គុក ៨ឆ្នាំ និងសកម្មជនអាវលឿងថៃ ម្នាក់ទៀតឈ្មោះ រ៉ាត់ទ្រី ប៉ៃប៉ូតាណាប៉ៃប៉ូន ត្រូវបានសាលាដំបូងរាជធានីភ្នំពេញបានកាត់ទោសឲ្យជាប់គុក ៦ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន