ព្រឹត្តិការណ៍​ចុងក្រោយ​នៅ​តំបន់​ព្រំដែន​ខ្មែរ​-ថៃ​ដែល​មាន​ជម្លោះ

ក្នុង​រយៈពេល​២​ខែ​មក​នេះ មាន​ព្រឹត្តិការណ៍​មួយ​ចំនួន​បាន​កើត​ឡើង​នៅ​តាម​បណ្តាយ​ព្រំ​ប្រទល់​ខ្មែរ​-ថៃ រួមទាំង​ការ​ចោទ​ប្រកាន់​បាញ់​គ្រាប់​កាំភ្លើង​ផ្លោង​ច្រើន​គ្រាប់​ថ្មីៗ​ចុង​ក្រោយ​នេះ​ផង។
ដោយ ម៉ាយ៉ារិទ្ធិ
2009-02-18
អ៊ីម៉ែល
មតិ
Share
បោះពុម្ព
ទាហាន​ខ្មែរ​យាម​ល្បាត​ប្រាសាទ​ព្រះវិហារ​នៅ​ក្នុង​ខែត្រ​ព្រះវិហារ នា​ថ្ងៃ​ទី​២៨ ខែ​កក្កដា ឆ្នាំ​២០០៨ ។
ទាហាន​ខ្មែរ​យាម​ល្បាត​ប្រាសាទ​ព្រះវិហារ​នៅ​ក្នុង​ខែត្រ​ព្រះវិហារ នា​ថ្ងៃ​ទី​២៨ ខែ​កក្កដា ឆ្នាំ​២០០៨ ។
RFA Photo/Uy Sophea

ក្នុង​រយៈពេល​ជិត​២​ខែ​ដើម​ឆ្នាំ​នេះ ការ​ជួប​ពិភាក្សា​ទ្វេ​ភាគី​រវាង​ខ្មែរ​-ថៃ មាន​រួម​ទាំង​ការ​ជួប​ថ្នាក់​រដ្ឋមន្ត្រី​ក្រសួង​ការបរទេស​និង​ថ្នាក់​រដ្ឋមន្ត្រី​ក្រសួង​ការពារ​ជាតិ​នោះ​ផង ប៉ុន្តែ​សេចក្តី​រាយការណ៍​អំពី​ការ​លុកលុយ​ចូល​ទន្ទ្រាន​ក្នុង​ទឹក​ដី​កម្ពុជា​នៅ​តែ​មាន។

គណៈប្រតិភូ​ខ្មែរ​-ថៃ បាន​ជួប​គ្នា​ជា​ច្រើន​ដង​ចាប់​តាំង​ពី​ដើម​ឆ្នាំ​នេះ​មក ប៉ុន្តែ​សេចក្តី​រាយការណ៍​អំពី​ករណី​រំលោភ​នៅ​តែ​មាន។

កាល​ពី​ថ្ងៃ​ទី​១៧ កុម្ភៈ សេចក្តី​រាយការណ៍​ពី​អ្នក​ភូមិ​និង​ពី​ទាហាន​ខ្មែរ បាន​ឲ្យ​ដឹង​ថា ថៃ​បាន​បាញ់​កាំភ្លើង​ផ្លោង​ជា​ច្រើន​គ្រាប់​ធ្លាក់​ចូល​មក​ក្នុង​ទឹក​ដី​ខ្មែរ ប៉ុន្តែ មិន​បាន​ធ្វើ​ឲ្យ​មាន​ខូច​ខាត​ដល់​អាយុ​ជីវិត​ប្រជាពលរដ្ឋ​នោះ​ឡើយ។

មិន​មាន​សេចក្តី​រាយការណ៍​បញ្ជាក់​ភ្លាមៗ​ថា តើ​ការ​បាញ់​គ្រាប់​ផ្លោង​ចូល​មក​ក្នុង​បរិវេណ​ក្បែរ​ប្រាសាទ​តាក្របី នៅ​ក្នុង​ខេត្ត​ឧត្តរមានជ័យ​នោះ គឺ​ដោយសារ​តែ​មូល​ហេតុ​អ្វី​នោះ​ទេ។

មេបញ្ជាការ​រង​យោធា​ប្រចាំ​ភូមិ​ភាគ​ឧត្តរ​លោក​ឧត្តម​សេនីយ៍​ត្រី ពៅ ហេង បាន​មាន​ប្រសាសន៍​កាល​ពី​ម្សិលមិញ​ប្រាប់​វិទ្យុ​អាស៊ីសេរី​ថា ៖ «កំពុង​តែ​វិល​ទៅ​ពិនិត្យ»។

ប្រភព​ពី​នាយ​ទាហាន​ខ្មែរ​ឯ​ទៀតៗ បាន​ជូន​ដំណឹង​មក​ថា គេ​កំពុង​តែ​ធ្វើការ​ស៊ើប​អង្កេត​ដែរ បើ​ទោះ​បី​ជា​ប្រភព​ខ្លះ​បាន​សង្ស័យ​ថា ការ​បាញ់​នោះ​អាច​ជាប់​ទាក់ទង​នឹង​ទាហាន​ថៃ​ដែល​កំពុង​តែ​ធ្វើ​សម​យុទ្ធ​ពស់​វែក​មាស​នៅ​តាម​តំបន់​ក្បែរ​នោះ​ក៏​ដោយ ៖ «វា​ផ្លោង​មក​ប៉ះ​ដី​ព្រៃ​ធម្មតា​ហ្នឹង គ្រាន់​តែ​វា​ចូល​ក្នុង​ទឹក​ដី​យើង។ នេះ​វា​សម​យុទ្ធ បាញ់​គ្រាប់​ពិត​ទៅ​វា​ផ្ទុះ។ វា​ធ្វើ​វា​មាន​រថក្រោះ​មាន​អី សម​យុទ្ធ​របស់​វា​ហ្នឹង»

មន្ត្រី​ខ្មែរ​បាន​ឲ្យ​ដឹង​ថា ការ​បាញ់​ផ្លោង​ចូល​ក្នុង​ទឹក​ដី​ខ្មែរ​កាល​ពី​ម្សិលមិញ​នេះ គឺ​មាន​ចំនួន ១០​គ្រាប់ ដែល​ក្នុង​នោះ​មាន ៣​គ្រាប់​ស្អុយ​មិន​បាន​ផ្ទុះ។

មន្ត្រី​ខ្មែរ​បាន​ឲ្យ​ដឹង​ទៀត​ថា ក្រសួង​ការ​បរទេស​ខ្មែរ​កំពុង​តែ​ធ្វើការ​ជាមួយ​ខាង​ភាគី​ថៃ​ជុំវិញ​បញ្ហា​នេះ​ហើយ ដើម្បី​ឲ្យ​ថៃ​ធ្វើការ​បំភ្លឺ​តប​ចំពោះ​ការ​បាញ់​គ្រាប់​កាំភ្លើង​ធុន​ដេកា​និង​គ្រាប់​កាំភ្លើង​ត្បាល់​ចូល​មក​ក្នុង​ទឹក​ដី​ខ្មែរ​នោះ។

សេចក្តី​រាយការណ៍​បាន​ឲ្យ​ដឹង​ទៀត​ថា កង​ទាហាន​ខ្មែរ​ដែល​ការពារ​ព្រំ​ប្រទល់ ត្រូវ​មេ​បញ្ជាការ​ដាស់​តឿន​ឲ្យ​រក្សា​ភាព​ប្រុង​ប្រយ័ត្ន​ទ្វេ​ដង​ថែម​ទៀត ក្រោយ​ព្រឹត្តិការណ៍​បាញ់​កាំភ្លើង​ផ្លោង​ចូល​មក​លើ​ទឹក​ដី​ខ្មែរ​នោះ។

រហូត​មក​ទល់​នឹង​រាត្រី​ថ្ងៃ​អង្គារ​ម្សិលមិញ ភាគី​ថៃ​នៅ​មិន​ទាន់​ឆ្លើយ​តប​ចំពោះ​ការ​ចោទ​ប្រកាន់​របស់​ភាគី​ទាហាន​ខ្មែរ​អំពី​មូលហេតុ​បាញ់​កាំភ្លើង​ផ្លោង​ចំនួន ១០​គ្រាប់ ចូល​មក​ក្នុង​ទឹក​ដី​ខ្មែរ​នោះ​ឡើយ។

សូម​បញ្ជាក់​ថា ព្រឹតិ្តការណ៍​ផ្លោង​គ្រាប់​ចូល​មក​ក្នុង​ទឹក​ដី​ខ្មែរ​នេះ ត្រូវ​គេ​កត់​សម្គាល់​ថា គឺ​ជា​លើក​ទី​មួយ​ហើយ​នៅ​ក្នុង​ឆ្នាំ​ថ្មី​នេះ បើ​ទោះ​បី​ភាគី​ខ្មែរ​-ថៃ​បាន​ជួប​គ្នា​ជា​ច្រើន​ដង​គិត​តាំង​ពី​ដើម​ខែ​មករា ឆ្នាំ​នេះ​មក ដើម្បី​ដោះស្រាយ​បញ្ហា​ជម្លោះ​ទឹក​ដី​រវាង​ប្រទេស​ទាំង​២។

នៅ​ថ្ងៃ​ទី​២៥ ទៅ​ថ្ងៃ​ទី​២៦ ខែ​មករា រដ្ឋមន្ត្រី​ក្រសួង​ការ​បរទេស​ថៃ លោក កាសិទ្ធិ ភិរម្យ បាន​អញ្ជើញ​មក​ដល់​កម្ពុជា និង​បាន​ជួប​ជាមួយ​រដ្ឋមន្ត្រី​ក្រសួង​ការបរទេស​ខ្មែរ​លោក​ឧបនាយក​រដ្ឋមន្ត្រី ហោ ណាំហុង និង​បាន​ជួប​ជជែក​ជាមួយ​មន្ត្រី​ដឹកនាំ​ខ្មែរ​ជុំវិញ​បញ្ហា​វិវាទ​ព្រំ​ប្រទល់។

ការ​ជជែក​ទាំង​២​ថ្ងៃ​នោះ ត្រូវ​គេ​កត់​សម្គាល់​ថា មិន​បាន​ឈាន​ដល់​ការ​ព្រមព្រៀង​ណា​មួយ​នោះ​ទេ។ នៅ​ថ្ងៃ​ទី​២៥ និង ២៦ មករា ដដែល នៅ​គ្រា​ដែល​ថ្នាក់​ដឹកនាំ​រដ្ឋមន្ត្រី​ក្រសួង​ការ​បរទេស​ទាំង​២ កំពុង​តែ​ជួប​ជជែក​គ្នា មាន​សេចក្តី​រាយការណ៍​មក​ថា មាន​ទាហាន​ឈុត​ខ្មៅ​ថៃ​ម្នាក់​បាន​ដើរ​ចូល​មក​ក្នុង​ទឹក​ដី​ខ្មែរ ហើយ​បាន​ជាន់​មីន​សេស​សល់​ពី​អតីត​សង្គ្រាម ដែល​បណ្តាល​ឲ្យ​ផ្ទុះ​ដាច់​ជើង​នៅ​តំបន់​ប្រាសាទ​តាមាន់​ក្នុង​ខេត្ត​ឧត្តរ​មាន​ជ័យ។

ទន្ទឹម​នឹង​នោះ​ដែរ គឺ​នៅ​ថ្ងៃ​ទី​២៥ មករា មាន​សេចក្តី​រាយការណ៍​ពី​យោធា​ខ្មែរ​បាន​ឲ្យ​ដឹង​ថា មេ​បញ្ជាការ​យោធា​ថៃ​ជាន់​ខ្ពស់​មួយ​រូប​បាន​ដឹកនាំ​កម្លាំង​ទាហាន​ថៃ​ចូល​ទី​វត្ត​កែវ​សិក្ខា​គិរី​ស្វរៈ ដោយ​ការ​ចូល​នោះ​មិន​ប្រាប់​មេបញ្ជាការ​យោធា​ខ្មែរ​ឲ្យ​បាន​ដឹង​ជា​មុន​នោះ​ឡើយ។

រហូត​មក​ទល់​នឹង​ថ្ងៃ​ពុធ​ទី​៤ កុម្ភៈ មន្ត្រី​នៃ​គណៈកម្មាធិការ​ព្រំដែន​ខ្មែរ​-ថៃ បាន​បន្ត​ការ​ជួប​គ្នា​សា​ជា​ថ្មី ប៉ុន្តែ​នៅ​តែ​ឈាន​ដល់​ភាព​ទាល់​ច្រក​ជា​ដដែល។ ភាព​ទ័ល​ច្រក​នោះ គឺ​ដោយសារ​តែ​ការ​មិន​ទាន់​យល់ស្រប​លើ​ការ​ប្រើ​ពាក្យ​ព្រះវិហារ​តាម​សំនៀង​ខ្មែរ និង​ការ​ប្រើ​ពាក្យ​ព្រះ​វិហាន​តាម​សំនៀង​ថៃ។

មន្ត្រី​គណៈកម្មការ​នៃ​ប្រទេស​ទាំង​២ បាន​ឲ្យ​ដឹង​ថា បើ​គ្មាន​ការ​យល់ព្រម​ពី​រឿង​ប្រើ​ពាក្យ​ស្រប​គ្នា​ចំពោះ​រឿង​សំនៀង​ព្រះវិហារ​និង​ព្រះវិហាន​នោះ​ទេ ការ​កំណត់​អំពី​រឿង​បោះ​បង្គោល​សីមា​ព្រំដែន​នឹង​មិន​អាច​ធ្វើ​បាន​នោះ​ឡើយ។

ថ្ងៃ​ទី​៦ កុម្ភៈ កិច្ច​ប្រជុំ​ដើម្បី​ដោះស្រាយ​រវាង​បញ្ហា​ព្រំដែន​ខ្មែរ​និង​ថៃ បាន​ឈាន​ដល់​ការ​ជួប​គ្នា​ថ្នាក់​រដ្ឋមន្ត្រី​ក្រសួង​ការពារ​ជាតិ​ដែល​មាន​លោក ទៀ បាញ់ តំណាង​ឲ្យ​ភាគី​ខ្មែរ​និង​ប្រទេស​ថៃ តំណាង​ដោយ​លោក​រដ្ឋមន្ត្រី Prawith Wongsuwan។ កិច្ច​ប្រជុំ​នោះ​មិន​បាន​សម្រេច​អ្វី​គួរ​អោយ​កត់​សម្គាល់​ទេ។

រដ្ឋមន្ត្រី​ក្រសួង​ការពារ​ជាតិ​ខ្មែរ លោក ទៀ បាញ់ បាន​និយាយ​ថា គេ​គ្រាន់​តែ​ស្រប​ជា​គោលការណ៍​សិន​ចំពោះ​បញ្ហា​លើក​អំពី​ការ​ដក​ចំនួន​កងទ័ព​ដើម្បី​ឈាន​ដល់​ការ​បង្កើត​ក្រុម​ការងារ​បណ្តោះ​អាសន្ន​រួម​គ្នា ដើម្បី​ដោះ​មីន​នៅ​តំបន់​ប្រាសាទ​ខ្មែរ​ដែល​កំពុង​តែ​មាន​ជម្លោះ។

ទោះ​ជា​យ៉ាង​ណា​ក្ដី មន្ត្រី​យោធា​ថៃ​បាន​និយាយ​ពេល​នោះ​ថា ភាគី​ថៃ​មិន​បាន​យល់​ព្រម​ជាមួយ​កម្ពុជា នៅ​ក្នុង​ការ​ដក​ចំនួន​កងទ័ព​នោះ​ឡើយ។ ហើយ​នៅ​ក្នុង​ព្រឹត្តិការណ៍​ដែល​បាន​កើត​ឡើង​ចុង​ក្រោយ​ថ្ងៃ​ទី​១៧ កុម្ភៈ កន្លង​មក​នេះ នៅ​ជាមួយ​នឹង​សេចក្តី​រាយការណ៍​អំពី​ទាហាន​ថៃ​បាន​បាញ់​កាំភ្លើង​ធំ​ជា​ច្រើន​គ្រាប់​​ចូល​មក​ក្នុង​ទឹក​ដី​ខ្មែរ នា​តំបន់​បរិវេណ​ប្រាសាទ​តាក្របី ក៏​នៅ​មាន​សេចក្តី​រាយការណ៍​មួយ​ផ្សេង​ទៀត​បាន​កើត​នៅ​ឯ​ទី​វត្ត​ខ្មែរ​ក្បែរ​តំបន់​ប្រាសាទ​ព្រះវិហារ។

ទាហាន​ខ្មែរ​បាន​ឲ្យ​ដឹង​ថា មាន​កង​ទាហាន​ឈុត​ខ្មៅ​ថៃ​ប្រមាណ​ជាង ៣០​នាក់ បាន​ចូល​មក​ក្នុង​វត្ត​ខ្មែរ​កែវ​សិក្ខា​គិរី​ស្វរៈ សា​ជា​ថ្មី​ទៀត ហើយ​បាន​ហាម​ព្រះសង្ឃ​ខ្មែរ​មិន​ឲ្យ​សង់​បង្គន់​ថ្មី​និង​ពង្រីក​សាលា​ឆាន់​នោះ​ឡើយ។

គួរ​រំឭក​ថា កាល​ពី​ថ្មីៗ​កន្លង​មក​នេះ នៅ​ក្នុង​សុន្ទរកថា​ថ្មី​ចុង​ក្រោយ​មួយ​ឯ​ខេត្ត​សៀមរាប លោក​នាយក​រដ្ឋមន្ត្រី​ខ្មែរ ហ៊ុន សែន បាន​អំពាវនាវ​សូម​ឲ្យ​ទាហាន​មាន​ការ​អត់​ធ្មត់​ដើម្បី​បញ្ចៀស​ភាព​អន្តរាយ​នៃ​នយោបាយ​ជួប​ពិភាក្សា​និង​ការ​ចរចា​ទ្វេ​ភាគី​ខ្មែរ​-ថៃ។

លោក​នាយក​រដ្ឋមន្ត្រី​នៅ​តែ​សង្ឃឹម​ថា ការ​ដោះស្រាយ​ទ្វេ​ភាគី​នឹង​អាច​ឈាន​ដល់​កិច្ច​ព្រមព្រៀង​គ្នា​បាន​ដើម្បី​បញ្ចប់​ជម្លោះ​រវាង​ខ្មែរ​និង​ថៃ​នោះ៕

ព័ត៌មាន (0)
Share
គេហទំព័រ​ទាំងមូល