ក្រៅពីល្បីថា ជាខេត្តសំបូរធនធានត្បូងពេជ្រ ដែលជិតហិនហោចទៅហើយនោះ ខេត្តនេះ នៅមានសក្ដានុពលសំខាន់ពីរលើវិស័យកសិកម្ម និងទេសចរធម្មជាតិ អាចរកប្រាក់ចំណូលជំនួសវិញបានគ្រាន់បើដែរ។
តំបន់ទេសចរណ៍ធម្មជាតិចំនួនបី ដែលមានទីតាំងខុសគ្នា នៅក្នុងខេត្តប៉ៃលិន អាចនឹងទាក់ទាញភ្ញៀវទេសចរទៅទស្សនាបានច្រើន បើសិនក្រុមអាជ្ញាធរ អាចរកដៃគូឯកជនទៅបោះទុនវិនិយោគ រៀបចំកែលំអប្រព័ន្ធផ្លូវថ្នល់ ទឹកភ្លើង និងមណ្ឌលកម្សាន្តបាននោះ។ ក្នុងនោះ មានតំបន់ទេសចរណ៍ទឹកធ្លាក់ភ្នំខៀវ នៅសង្កាត់អូរតាវ៉ៅ តំបន់ទេសចរទឹកធ្លាក់ភ្នំក្បាលដំរី និងទឹកធ្លាក់ព្រែកឫស្សី ស្ថិតនៅសង្កាត់បរយ៉ាខា ក្រុងប៉ៃលិន ខេត្តប៉ៃលិន។
នាយករដ្ឋបាល សាលាខេត្តប៉ៃលិន លោក សៅ សារ៉ាត់ បានថ្លែងថា កន្លងទៅនេះ ភាគីថៃបានចុះ ទៅសិក្សាតំបន់ទេសចរណ៍ទឹកធ្លាក់ភ្នំក្បាលដំរី ហើយវាយតម្លៃថា ជាទីកន្លែងមួយ មានទេសភាពធម្មជាតិស្រស់ស្អាត។ លោកបន្តថា អាជ្ញាធរពុំមានលទ្ធភាពរកថវិកា ដើម្បីអភិវឌ្ឍន៍នៅតំបន់ទេសចរទាំងនោះទេ។ បច្ចុប្បន្ន អាជ្ញាធរកំពុងអំពាវនាវរកវិស័យឯកជន ដើម្បីបោះទុនទៅវិនិយោគនៅទីនោះ។
តំបន់ទេសចរណ៍ធម្មជាតិ មានព្រៃប្រឹក្សា ជ្រោះ ជ្រលងភ្នំ ដងអូរ មានទឹកធ្លាក់ពីកំពូលភ្នំទាំងបីកន្លែង នៅក្នុងខេត្តប៉ៃលិននេះ នៅពុំទាន់មានការរៀបចំ បានត្រឹមត្រូវសម្រាប់បម្រើដល់វិស័យ ទេសចរណ៍នោះទេ។ នៅតំបន់ទេសចរណ៍ទឹកធ្លាក់ភ្នំខៀវ មានក្រុមហ៊ុនក្នុងស្រុកមួយ បានបោះទុន និងកំពុងធ្វើអាជីវកម្មនៅទីនោះ។ ប៉ុន្តែ គេមិនបានសង្កេតឃើញមានការរៀបចំហេដ្ឋារចនាសម្ព័ន្ធផ្លូវថ្នល់ចូលទៅកាន់ទីនោះបានល្អ នោះទេ។ ចំណែកទឹកធ្លាក់ភ្នំក្បាលដំរី និងទឹកធ្លាក់ព្រែកឫស្សី មានជ្រលងភ្នំ មានទឹកធ្លាក់ មានទឹកអូរតូចធំ ហ៊ុំព័ទ្ធទៅដោយព្រៃឈើនៅជុំវិញយ៉ាងល្អប្រណិត។ ប៉ុន្តែតំបន់ទាំងពីរកន្លែងនេះ នៅពុំទាន់មានការរៀបចំសម្រាប់បម្រើដល់វិស័យទេសចរណ៍នោះទេ។
លោក គង់ ដួង ប្រធានមន្ទីរព័ត៌មានខេត្តប៉ៃលិន បានបញ្ជាក់ថា ភាគីថៃ ធ្លាប់ចាប់អារម្មណ៍លើ ទឹកធ្លាក់ភ្នំក្បាលដំរី។ កន្លងទៅនេះ ថៃ បានសិក្សាគូរប្លង់គម្រោងរៀបចំតំបន់ទេសចរណ៍យ៉ាងល្អប្រណិតមួយ នៅទីនោះ។
ខេត្តប៉ៃលិន ត្រូវបានរដ្ឋាភិបាលប្រកាសបង្កើតឡើង កាលពីថ្ងៃទី ៣១ ខែកក្កដា ឆ្នាំ ១៩៩៧ ក្រោយពីការច្របាច់បញ្ចូលគ្នារវាងកងទ័ពខ្មែរក្រហម និងកងទ័ពរដ្ឋាភិបាលកម្ពុជា។
ក្រោយពីទទួលបានសុខសន្តិភាព ក្នុងរយៈពេលជិត ១០ ឆ្នាំកន្លងមកនេះ ខេត្តប៉ៃលិន គេសង្កេតឃើញមានការរីកចម្រើនមួយចំនួន ដូចជា ហេដ្ឋារចនាសម្ព័ន្ធផ្លូវថ្នល់តភ្ជាប់ពីទីក្រុង រហូតដល់ព្រំដែនប្រទេសថៃ។ នៅទីក្រុងវិញ គេសង្កេតឃើញមានការរីកលូតលាស់នូវសំណង់អគារ មន្ទីរ ស្ថាប័នរបស់រដ្ឋជាច្រើន រួមទាំងមានការសាងសង់ រូបសំណាក លោកយាយ យ៉ាត រូបសំណាកស្ដេច កន និងសាងសង់វិមានឯករាជនៅចំកណ្ដាលទីប្រជុំជននៃក្រុងប៉ៃលិនទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។